ആലപ്പുഴ: മിതമായ നിരക്കിൽ അതിവേഗ ഇന്റർനെറ്റ് സേവനങ്ങൾ ലഭ്യമാക്കിക്കൊണ്ട് തരംഗമായി മാറിയ കേരളവിഷൻ ബ്രോഡ്ബാൻഡ് മറ്റൊരു നാഴികക്കല്ല് കൂടി പിന്നിട്ടു (Kerala vision broadband). ആലപ്പുഴ ജില്ലയിലെ കേരളവിഷൻ ബ്രോഡ്ബാൻഡ് കണക്ഷനുകളുടെ എണ്ണം ഒരു ലക്ഷത്തിന് മുകളിലായി. ഇതോടെ സംസ്ഥാനത്ത് ഒരു ലക്ഷത്തിലധികം സജീവ ബ്രോഡ്ബാൻഡ് ഉപഭോക്താക്കളുള്ള ഏഴാമത്തെ ജില്ലയായി ആലപ്പുഴ മാറി. കണ്ണൂർ, കോഴിക്കോട്, മലപ്പുറം, തൃശൂർ, കോട്ടയം, കൊല്ലം എന്നിവയാണ് ഇതിന് മുൻപ് ഈ നേട്ടം കൈവരിച്ച മറ്റ് ജില്ലകൾ.
നിലവിൽ സംസ്ഥാനത്തുടനീളം 15 ലക്ഷത്തിലധികം സജീവ കണക്ഷനുകളുമായി കേരളത്തിലെ വയേഡ് ഇന്റർനെറ്റ് സേവനദാതാക്കളിൽ ഒന്നാം സ്ഥാനത്താണ് കേരളവിഷൻ. വിപണിയിലെ തൊട്ടടുത്ത എതിരാളിയേക്കാൾ ഇരട്ടിയോളം വിപണി വിഹിതം സ്വന്തമാക്കിയാണ് കമ്പനി മുന്നേറുന്നത്. ട്രായിയുടെ (TRAI) ഏറ്റവും പുതിയ കണക്കുകൾ പ്രകാരം രാജ്യത്തെ ആകെ ബ്രോഡ്ബാൻഡ് സേവനദാതാക്കളിൽ അഞ്ചാം സ്ഥാനത്തും, വയേഡ് ഐഎസ്പികളിൽ (Wired ISP) നാലാം സ്ഥാനത്തും കേരളവിഷനുണ്ട്. കൂടാതെ ഗ്രാമീണ മേഖലകളിൽ ഇന്റർനെറ്റ് കണക്ടിവിറ്റി നൽകുന്നതിൽ ദേശീയതലത്തിൽ രണ്ടാം സ്ഥാനവും കേരളവിഷൻ കരസ്ഥമാക്കിയിട്ടുണ്ട്.
“ആലപ്പുഴ ജില്ലയിൽ കൈവരിച്ച ഈ നേട്ടത്തിൽ ഞങ്ങൾക്ക് ഏറെ അഭിമാനമുണ്ട്. ജനങ്ങൾ ഞങ്ങളിൽ അർപ്പിച്ചിരിക്കുന്ന ആഴത്തിലുള്ള വിശ്വാസത്തിന്റെ തെളിവാണിത്. കേബിൾ ടിവി ഓപ്പറേറ്റർമാരുടെയും ജീവനക്കാരുടെയും അശ്രാന്ത പരിശ്രമത്തിന്റെ ഫലമാണിതെന്നും,” കേരളവിഷൻ ബ്രോഡ്ബാൻഡ് മാനേജിംഗ് ഡയറക്ടർ അനിൽ മംഗലത്ത് പറഞ്ഞു.
മാറുന്ന സാങ്കേതികവിദ്യ ജനങ്ങളിലെത്തിക്കാൻ എന്നും മുൻപന്തിയിലുള്ള കേരളവിഷൻ, മൊബൈലിലൂടെ കേബിൾ ടിവി കാണാൻ സഹായിക്കുന്ന ‘കെവി ഗോ’ (KV GO) അടക്കമുള്ള സംവിധാനങ്ങൾ അവതരിപ്പിച്ചിട്ടുണ്ടെന്ന് ചെയർമാൻ സുരേഷ് പി.പി വ്യക്തമാക്കി. കേരളത്തിന് പുറമെ മംഗലാപുരം, കൊൽക്കത്ത എന്നിവിടങ്ങളിലേക്കും സേവനം വ്യാപിപ്പിച്ച കമ്പനി, രാജ്യത്തെ കൂടുതൽ പ്രധാന നഗരങ്ങളിലേക്ക് കാൽവെപ്പ നടത്താനുള്ള ഒരുക്കത്തിലാണ്.
Story Summary:
Kerala Vision Broadband crossed the 1 lakh active customer milestone in Alappuzha, making it the 7th district in Kerala to reach this benchmark for the provider. Nationally, Kerala Vision holds the 4th rank among wired ISPs and 2nd in rural broadband connectivity.
