തിരുവനന്തപുരം: സംസ്ഥാനത്ത് നിലനിൽക്കുന്ന വൈദ്യുതി പ്രതിസന്ധിയുടെ പ്രധാന കാരണം മഴയുടെ ലഭ്യതക്കുറവാണെന്ന് വൈദ്യുതി വകുപ്പ് മന്ത്രി സണ്ണി ജോസഫ്. അണക്കെട്ടുകളിൽ ജലനിരപ്പ് താഴ്ന്നത് സ്ഥിതിഗതികൾ വഷളാക്കിയിട്ടുണ്ടെന്നും, അടിയന്തര സാഹചര്യത്തിൽ ഉപഭോക്താക്കൾ വൈദ്യുതി ഉപയോഗത്തിൽ സ്വയം നിയന്ത്രണം കൊണ്ടുവരണമെന്നും അദ്ദേഹം അഭ്യർത്ഥിച്ചു.(Kerala power crisis caused by low rainfall says Minister Sunny Joseph)
പലയിടങ്ങളിലും വൈദ്യുതി പാഴാക്കുന്ന പ്രവണത വർദ്ധിച്ചുവരികയാണെന്ന് മന്ത്രി ചൂണ്ടിക്കാട്ടി. പകൽ സമയങ്ങളിൽ ഒരു യൂണിറ്റ് വൈദ്യുതിക്ക് 19 പൈസ മാത്രം മതിയാകുമ്പോൾ, രാത്രികാലങ്ങളിൽ 10 രൂപ നൽകിയാലും വൈദ്യുതി ലഭിക്കാത്ത അവസ്ഥയാണുള്ളത്. മാർച്ചിലും ഏപ്രിലിലും മറ്റ് സംസ്ഥാനങ്ങളിൽ നിന്ന് വാങ്ങിയ വൈദ്യുതി ഇപ്പോൾ തിരികെ നൽകിക്കൊണ്ടിരിക്കുകയാണ്. ഇതും നിലവിലെ പ്രതിസന്ധിക്ക് ആക്കം കൂട്ടുന്നു.
സോളാർ വൈദ്യുതി കാര്യക്ഷമമായി സംഭരിക്കാൻ ആവശ്യമായ ബാറ്ററി സ്റ്റോറേജ് സംവിധാനങ്ങൾ ഉടൻ സജ്ജമാക്കും. സുരക്ഷിതമായ വൈദ്യുതി ഉപയോഗത്തെക്കുറിച്ച് വിദ്യാർത്ഥികൾക്ക് പ്രത്യേക ബോധവൽക്കരണം നൽകും. കൂടാതെ, കുടുംബശ്രീ മുഖേന വീട്ടമ്മമാർക്കും ഇതുസംബന്ധിച്ച് അവബോധം നൽകുമെന്ന് മന്ത്രി പറഞ്ഞു. മഴ കുറവാണെങ്കിലും പ്രതിസന്ധി മറികടക്കാൻ സർക്കാർ ബദൽ മാർഗ്ഗങ്ങൾ ആലോചിക്കുന്നുണ്ടെന്നും അദ്ദേഹം വ്യക്തമാക്കി. അതേസമയം, മദ്യനയം, കെപിസിസി അധ്യക്ഷ പദവി തുടങ്ങിയ രാഷ്ട്രീയ വിഷയങ്ങളുമായി ബന്ധപ്പെട്ട ചോദ്യങ്ങളോട് പ്രതികരിക്കാൻ മന്ത്രി സണ്ണി ജോസഫ് തയ്യാറായില്ല.
Story Summary
Electricity Minister Sunny Joseph has attributed Kerala’s ongoing power crisis to deficient rainfall and depleted reservoir levels. He urged citizens to practice voluntary energy conservation and announced plans to implement battery storage systems for solar energy, alongside awareness campaigns for students and families to promote efficient power usage.
