തിരുവനന്തപുരം: എൽനിനോ പ്രതിഭാസത്തെത്തുടർന്ന് സംസ്ഥാനത്ത് കാലവർഷം ദുർബലമായെന്ന് കേന്ദ്ര കാലാവസ്ഥാ വകുപ്പിന്റെ റിപ്പോർട്ട്. ഈ വർഷം ലഭിക്കേണ്ട മഴയിൽ 28 ശതമാനത്തിന്റെ കുറവാണ് സംസ്ഥാനത്താകെ രേഖപ്പെടുത്തിയത്. തിരുവനന്തപുരം, പത്തനംതിട്ട, മലപ്പുറം, കോഴിക്കോട് എന്നീ ജില്ലകളിൽ മാത്രമാണ് നിലവിൽ ശരാശരി മഴ ലഭിച്ചത്.( Kerala Monsoon Deficit And Yellow Alert Update)
ഇടുക്കിയും വയനാടുമാണ് മഴക്കുറവ് ഏറ്റവും രൂക്ഷമായി അനുഭവപ്പെടുന്ന ജില്ലകൾ. അതേസമയം, വരും ദിവസങ്ങളിൽ കാലവർഷം മെച്ചപ്പെടാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ. ഇതിന്റെ ഭാഗമായി ഇന്ന് സംസ്ഥാനത്തെ എട്ട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ജില്ലകളിലാണ് ശക്തമായ മഴയ്ക്ക് സാധ്യതയുള്ളതിനാൽ ജാഗ്രതാ നിർദ്ദേശം നൽകിയിരിക്കുന്നത്. കേരള തീരത്ത് നിലവിൽ മത്സ്യബന്ധനത്തിന് വിലക്ക് ഏർപ്പെടുത്തിയിട്ടുണ്ട്. കടൽക്ഷോഭത്തിനും ശക്തമായ കാറ്റിനും സാധ്യതയുള്ളതിനാൽ തീരദേശവാസികളും മത്സ്യത്തൊഴിലാളികളും പ്രത്യേക ജാഗ്രത പാലിക്കണമെന്നും കാലാവസ്ഥാ വകുപ്പ് മുന്നറിയിപ്പ് നൽകി.
Story Summary
Kerala is facing a significant deficit in monsoon rainfall, with a 28% drop attributed to the El Niño phenomenon. While only a few districts have received average rainfall, the IMD has issued a yellow alert for eight districts today, signaling a potential increase in rainfall activity.
