തിരുവനന്തപുരം: മുൻ പിണറായി വിജയൻ സർക്കാരിന്റെ ഏറ്റവും വലിയ സ്വപ്ന പദ്ധതിയായിരുന്ന ‘കെ റെയിൽ സിൽവർ ലൈൻ’ പദ്ധതിക്ക് ഇന്ന് ഔദ്യോഗികമായി തിരശ്ശീല വീഴുമോ എന്നറിയാം. ഇന്ന് രാവിലെ ചേരുന്ന വി ഡി സതീശൻ സർക്കാരിന്റെ രണ്ടാമത്തെ മന്ത്രിസഭായോഗത്തിൽ ഇത് സംബന്ധിച്ച നിർണ്ണായക പ്രഖ്യാപനമുണ്ടാകുമെന്നാണ് സൂചന.(Kerala Government V D Satheesan To Cancel Pinarayi Vijayan K Rail SilverLine Project)
പദ്ധതിക്കായി ഭൂമി ഏറ്റെടുക്കുന്നതുമായി ബന്ധപ്പെട്ട് പുറപ്പെടുവിച്ച എല്ലാ ഔദ്യോഗിക വിജ്ഞാപനങ്ങളും പുതിയ സർക്കാർ റദ്ദാക്കിയേക്കും. പദ്ധതി അവതരിപ്പിച്ചത് മുതൽ യു.ഡി.എഫ് ഇതിനെതിരെ ശക്തമായ ജനകീയ പ്രക്ഷോഭങ്ങൾ നടത്തിയിരുന്നു. അധികാരമേറ്റ സ്ഥിതിക്ക് പദ്ധതി പൂർണ്ണമായും ഉപേക്ഷിക്കാനും, ഭൂമി ഏറ്റെടുക്കലിനായി 2020-ൽ പുറപ്പെടുവിച്ച വിവാദ ഉത്തരവുകൾ റദ്ദാക്കാനുമാണ് സർക്കാർ ഇപ്പോൾ നിയമോപദേശം തേടിയിരിക്കുന്നത്.
പദ്ധതിക്കായി സ്ഥാപിച്ച മഞ്ഞക്കുറ്റികൾ ഔദ്യോഗികമായി തന്നെ നീക്കം ചെയ്യാനും യോഗത്തിൽ തീരുമാനമുണ്ടായേക്കും. കെ റെയിലിന് പുറമെ, കേരളം നേരിടുന്ന കടുത്ത സാമ്പത്തിക പ്രതിസന്ധി മറികടക്കാനുള്ള അടിയന്തര നടപടികളും ഇന്നത്തെ മന്ത്രിസഭായോഗത്തിന്റെ അജണ്ടയിലുണ്ട്. വരാനിരിക്കുന്ന നിയമസഭാ സമ്മേളനത്തിൽ ഗവർണർ നടത്തുന്ന നയപ്രഖ്യാപന പ്രസംഗത്തിന്റെ കരട് രേഖ പരിശോധിക്കുന്നതിനൊപ്പം കർഷകർക്കും സാധാരണക്കാർക്കുമായി ചില ജനപ്രിയ പ്രഖ്യാപനങ്ങളും ഇന്നത്തെ യോഗത്തിൽ നിന്ന് പ്രതീക്ഷിക്കുന്നുണ്ട്.
Story Summary
The newly formed V D Satheesan government is highly expected to cancel the controversial K-Rail SilverLine project notifications in its second cabinet meeting today. The UDF government is also planning to officially remove the survey stones installed by the previous government and address Kerala’s economic crisis.
