റിപ്പോർട്ട്: അൻവർ ഷരിഫ്
കരിപ്പൂർ: കോഴിക്കോട് കരിപ്പൂർ അന്താരാഷ്ട്ര വിമാനത്താവളം കേന്ദ്രീകരിച്ച് പ്രവാസി യാത്രക്കാരെ തട്ടിക്കൊണ്ടുപോയി സ്വർണ്ണവും പണവും കവർച്ച ചെയ്യുന്ന ‘സ്വർണ്ണം പൊട്ടിക്കൽ’ മാഫിയാ സംഘങ്ങൾ വീണ്ടും സജീവമാകുന്നു (Karipur Airport Gold Snatching Gangs Arrested). വിമാനത്താവള പരിസരത്ത് കവർച്ചാ ആസൂത്രണവുമായി നിലയുറപ്പിച്ച രണ്ട് വ്യത്യസ്ത ക്രിമിനൽ സംഘങ്ങളിലെ 13 പേരെ കരിപ്പൂർ പോലീസ് ഞായറാഴ്ച (07.06.2026) രാത്രി അറസ്റ്റ് ചെയ്തു. ഇവർ വിമാനത്താവളത്തിലെത്താൻ ഉപയോഗിച്ച രണ്ട് ഇന്നോവ കാറുകളും ഒരു സ്കൂട്ടറും, ഡിജിറ്റൽ തെളിവുകൾ അടങ്ങിയ 14 മൊബൈൽ ഫോണുകളും പോലീസ് പിടിച്ചെടുത്തു.
എയർപോർട്ടിന്റെ പാർക്കിംഗ് ഏരിയയിലും ഇന്റർനാഷണൽ അറൈവൽ എക്സിറ്റിന് സമീപവും സംശയകരമായ സാഹചര്യത്തിൽ കൂട്ടംകൂടി നിന്ന ഇവരെ പോലീസ് ചോദ്യം ചെയ്തപ്പോഴാണ് വിദേശത്തുനിന്നെത്തുന്ന യാത്രക്കാരനെ തട്ടിക്കൊണ്ടുപോയി സ്വർണ്ണം കവരാൻ എത്തിയതാണെന്ന ഗൂഢാലോചന പുറത്തായത്. നിലവിൽ സൗദി അറേബ്യയിലുള്ള കണ്ണൂർ പടന്നോട്ട് സ്വദേശി കൈപ്പേകണ്ടി അൻസാർ, പരപ്പനങ്ങാടി പുത്തൻകടപ്പുറം സ്വദേശി അലി അക്ബർ എന്നിവരുടെ നിർദ്ദേശപ്രകാരമാണ് ഈ ക്വട്ടേഷൻ സംഘം കരിപ്പൂരിൽ എത്തിയതെന്ന് പോലീസ് സ്ഥിരീകരിച്ചു. കവർച്ചാ പ്ലാനുകൾ വ്യക്തമാക്കുന്ന വാട്സാപ്പ് ചാറ്റുകൾ പ്രതികളുടെ ഫോണിൽ നിന്നും കണ്ടെത്തിയിട്ടുണ്ട്. പോലീസിനെ വെട്ടിച്ച് ഒരു സ്വിഫ്റ്റ് കാറിലും വിമാനത്താവളത്തിന് പുറത്തുമായി രക്ഷപ്പെട്ട മറ്റ് സംഘാംഗങ്ങൾക്കായി തെരച്ചിൽ ഊർജ്ജിതമാക്കിയിരിക്കുകയാണ്.
അതേസമയം, ഇതേ ദിവസം രാത്രി 9.30-ന് ജിദ്ദയിൽ നിന്നും എയർ ഇന്ത്യ എക്സ്പ്രസ്സ് (IX 398) വിമാനത്തിൽ കരിപ്പൂരിൽ ഇറങ്ങിയ മലപ്പുറം മുണ്ടുപറമ്പ് സ്വദേശി മുഹമ്മദ് സൽമാൻ സാലിഹ് (26) എന്ന യുവാവിനെ കാണാനില്ലെന്ന് ബന്ധുക്കൾ കരിപ്പൂർ സ്റ്റേഷനിൽ പരാതി നൽകിയിട്ടുണ്ട്. ഈ യുവാവ് വിമാനത്താവളത്തിന് പുറത്തിറങ്ങിയതിന് ശേഷം വീട്ടിൽ എത്തിയിട്ടില്ലാത്തതിനാൽ, അറസ്റ്റിലായ സ്വർണ്ണക്കവർച്ചാ സംഘങ്ങൾക്ക് ഇതിൽ പങ്കുണ്ടോയെന്ന ഗുരുതരമായ സംശയത്തിലാണ് പോലീസ്. കഴിഞ്ഞ മാസം (2026 മെയ് 13) കേന്ദ്ര സർക്കാർ സ്വർണ്ണത്തിന്റെ ഇറക്കുമതി തീരുവ 6 ശതമാനത്തിൽ നിന്നും 16 ശതമാനമായി കുത്തനെ ഉയർത്തിയതും, ഇതിന് പുറമെ 3 ശതമാനം ജിഎസ്ടി കൂടി ചുമത്തിയതുമാണ് സ്വർണ്ണക്കടത്ത് മാഫിയകൾ വീണ്ടും സജീവമാകാൻ കാരണം. ഇതോടെ ഇന്ത്യയിലെയും വിദേശത്തെയും വിപണികൾ തമ്മിൽ ഒരു കിലോ സ്വർണ്ണത്തിന് ഏകദേശം 24 ലക്ഷം രൂപയുടെ വൻ വിലവ്യത്യാസമാണ് ഉണ്ടായിരിക്കുന്നത്. ലാഭം കോടികളായതോടെ വിമാനത്താവളങ്ങൾ വഴി സ്വർണ്ണക്കടത്തും, അവരെ വഴിയിൽ വെച്ച് തട്ടിയെടുക്കുന്ന സ്വർണ്ണം പൊട്ടിക്കൽ ക്വട്ടേഷൻ സംഘങ്ങളും മലബാർ മേഖലയിൽ വീണ്ടും ക്രമസമാധാന പ്രശ്നങ്ങൾ സൃഷ്ടിക്കുകയാണെന്ന് പോലീസ് വൃത്തങ്ങൾ വ്യക്തമാക്കുന്നു.
Summary: Karipur Airport police arrested 13 members of two rival gold-snatching gangs targeting international passengers on Sunday night. The arrests took place at Calicut International Airport following a verification check in the parking and arrival zones, which uncovered a well-planned conspiracy via WhatsApp chats to abduct a passenger and seize smuggled gold. While police confiscated two Innova cars, a scooter, and 14 mobile phones used by the gang operating under Saudi-based masterminds, a 26-year-old passenger named Muhammed Salman Salih from Malappuram went missing shortly after landing from Jeddah on an Air India Express flight.
