കൊച്ചി: വരാനിരിക്കുന്ന നിയമസഭാ തിരഞ്ഞെടുപ്പിൽ യുഡിഎഫ് ആവശ്യപ്പെട്ടാൽ സ്ഥാനാർത്ഥിയാകാൻ തയ്യാറാണെന്ന് നടൻ ജോയ് മാത്യു (Joy Mathew political entry). സംസ്ഥാനത്ത് നിലവിൽ അതിശക്തമായ ഭരണവിരുദ്ധ വികാരമാണുള്ളതെന്നും യുഡിഎഫ് വൻ വിജയം നേടുമെന്നും ഒരു സ്വകാര്യ മാധ്യമത്തിന് നൽകിയ അഭിമുഖത്തിൽ അദ്ദേഹം പറഞ്ഞു.
കോൺഗ്രസിനും യുഡിഎഫിനും പൂർണ്ണ പിന്തുണ നൽകും. തിരഞ്ഞെടുപ്പിൽ ഇടതുപക്ഷ വിരുദ്ധ പ്രചാരകനായി മുൻനിരയിൽ തന്നെയുണ്ടാകും. എന്നാൽ മത്സരിക്കുന്ന കാര്യത്തിൽ നിലവിൽ യുഡിഎഫ് നേതൃത്വം തന്നെ ഔദ്യോഗികമായി ബന്ധപ്പെട്ടിട്ടില്ലെന്ന് അദ്ദേഹം വ്യക്തമാക്കി.
യുഡിഎഫിന്റെ പദ്ധതികളും നിലപാടുകളും ജനങ്ങൾ ഏറ്റെടുത്തു കഴിഞ്ഞു. തദ്ദേശ തിരഞ്ഞെടുപ്പ് ഫലം ഇതിന്റെ തെളിവാണ്. 110 സീറ്റ് ലഭിക്കുമെന്ന മുഖ്യമന്ത്രിയുടെ അവകാശവാദം വെറും പ്രതീക്ഷ മാത്രമാണെന്നും ജോയ് മാത്യു പരിഹസിച്ചു. ബേപ്പൂർ മണ്ഡലത്തിൽ മുഹമ്മദ് റിയാസിനാണ് ജയസാധ്യത കൂടുതലെന്നും മണ്ഡലങ്ങളിലെ രാഷ്ട്രീയ സാഹചര്യം വിലയിരുത്തിക്കൊണ്ട് അദ്ദേഹം കൂട്ടിച്ചേർത്തു.
സാമൂഹിക മാധ്യമങ്ങളിലൂടെയും മറ്റും സർക്കാരിന്റെ നയങ്ങളെ രൂക്ഷമായി വിമർശിക്കാറുള്ള ജോയ് മാത്യുവിന്റെ ഈ പ്രസ്താവന വരും ദിവസങ്ങളിൽ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെക്കും.
