തിരുവനന്തപുരം: സ്ത്രീകൾക്കും പെൺകുട്ടികൾക്കും ക്രിക്കറ്റ് പരിശീലനം നൽകുന്നതിനായി നിർബന്ധമായും വനിതാ കോച്ചിനെ (Female Coach) നിയമിക്കണമെന്ന് കേരള ക്രിക്കറ്റ് അസോസിയേഷന് (KCA) കർശന നിർദേശം നൽകി സംസ്ഥാന മനുഷ്യാവകാശ കമ്മീഷൻ (Kerala Cricket Association KCA female coach mandate). ക്രിക്കറ്റ് അക്കാദമികളിലും ക്യാമ്പുകളിലും പെൺകുട്ടികളുടെ സുരക്ഷ പൂർണ്ണമായി ഉറപ്പാക്കുന്നതിനായി മനുഷ്യാവകാശ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസാണ് ഈ സുപ്രധാന ഉത്തരവ് പുറപ്പെടുവിച്ചത്.
ക്രിക്കറ്റ് പരിശീലനത്തിനെത്തുന്ന പ്രായപൂർത്തിയാകാത്ത പെൺകുട്ടികളെ പുരുഷ പരിശീലകൻ ലൈംഗികമായി ഉപദ്രവിക്കുകയും നിരന്തരം അപമര്യാദയായി പെരുമാറുകയും ചെയ്യുന്നുവെന്ന മാധ്യമ വാർത്തകളുടെ അടിസ്ഥാനത്തിൽ കമ്മീഷൻ സ്വമേധയാ (Suo Motu) രജിസ്റ്റർ ചെയ്ത കേസിലാണ് ഇപ്പോൾ അന്തിമ ഉത്തരവുണ്ടായിരിക്കുന്നത്. ഏതെങ്കിലും സവിശേഷ സാഹചര്യത്തിൽ യോഗ്യരായ വനിതാ കോച്ചുമാരെ ലഭ്യമാകാതെ വരികയാണെങ്കിൽ, പരിശീലന സമയത്ത് വിശ്വസ്തയായ ഒരു മുതിർന്ന വനിതാ ഉദ്യോഗസ്ഥയുടെ സാന്നിധ്യം ക്യാമ്പുകളിൽ കെ.സി.എ നിർബന്ധമായും ഉറപ്പുവരുത്തണമെന്നും ഉത്തരവിൽ വ്യക്തമാക്കുന്നു.
ഇതിനുപുറമേ, കായികതാരങ്ങളായ പെൺകുട്ടികൾ താമസിക്കുന്ന മുറികളിലോ ഹോസ്റ്റലുകളിലോ പുരുഷന്മാർ പ്രവേശിക്കുന്നത് പൂർണ്ണമായും നിരോധിക്കണം. ഇക്കാര്യം കർശനമായി നടപ്പാക്കാൻ ക്യാമ്പ് പരിസരങ്ങളിൽ ആവശ്യമായ മുന്നറിയിപ്പ് ബോർഡുകൾ സ്ഥാപിക്കാനും കമ്മീഷൻ നിർദേശിച്ചിട്ടുണ്ട്. പരിശീലനത്തിനെത്തുന്ന കുട്ടികളുടെ സുരക്ഷ മുൻനിർത്തി മാതാപിതാക്കൾക്ക് ക്യാമ്പ് പരിസരത്ത് തുടരാൻ താല്പര്യമുണ്ടെങ്കിൽ അതിനുള്ള പൂർണ്ണ അനുവാദം നൽകണം. ക്യാമ്പുകളിലും അക്കാദമികളിലും ഉണ്ടാകാനിടയുള്ള ഏത് തരത്തിലുള്ള അനിഷ്ട സംഭവങ്ങളും മുൻകൂട്ടി തടയുന്നതിനായി ആവശ്യമായ എല്ലാ പ്രധാന സ്ഥലങ്ങളിലും രാത്രിയും പകലും പ്രവർത്തിക്കുന്ന സി.സി.ടി.വി (CCTV) ക്യാമറകൾ സ്ഥാപിക്കണമെന്നും ജസ്റ്റിസ് അലക്സാണ്ടർ തോമസ് കെ.സി.എയോട് ആവശ്യപ്പെട്ടു.
Story Summary: The Kerala State Human Rights Commission Chairperson, Justice Alexander Thomas, has directed the Kerala Cricket Association (KCA) to appoint female coaches for training women and girls. The suo motu order followed news reports of a male coach sexually harassing young girls during training. The Commission mandated that if a female coach is unavailable, a senior female official must be present. It also banned men from entering girls’ rooms, allowed interested parents to stay during sessions, and ordered CCTV installations to ensure safety.
