കൊച്ചി: എറണാകുളം കോതമംഗലം കോട്ടപ്പടിയിൽ വളർത്തുനായയെ അജ്ഞാത ജീവി കടിച്ചു കൊന്ന നിലയിൽ കണ്ടെത്തി (Kothamangalam Kottappady Muttathuppara wild animal attack). കോട്ടപ്പടി മുട്ടത്തുപ്പാറ സ്വദേശി സാബുവിന്റെ ഉടമസ്ഥതയിലുള്ള വളർത്തുനായയെയാണ് ഇന്ന് പുലർച്ചെയോടെ ഏതോ വന്യമൃഗത്തിന്റെ ആക്രമണത്തിൽ ചത്ത നിലയിൽ കണ്ടെത്തിയത്. നായയുടെ കഴുത്തിന് പുറകിലായി ആഴത്തിലുള്ള വലിയ മുറിവുകളാണ് ഏറ്റിരിക്കുന്നത്. സംഭവത്തെ തുടർന്ന് വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന ആരംഭിച്ചു.
നായയെ കൊലപ്പെടുത്തിയത് പുലിയോ മറ്റ് വന്യമൃഗങ്ങളോ ആണെന്ന കാര്യത്തിൽ വനംവകുപ്പ് അധികൃതർ ഇതുവരെ ഔദ്യോഗികമായി സ്ഥിരീകരണം നടത്തിയിട്ടില്ല. ഇന്ന് പുലർച്ചെ നാല് മണിയോടെ സാബുവിന്റെ വീട്ടിലെ നായ കടുത്ത ശബ്ദത്തിൽ കുരയ്ക്കുന്നതും മറ്റ് ചില അസ്വാഭാവിക ശബ്ദങ്ങളും പരിസരവാസികൾ കേട്ടിരുന്നു. എന്നാൽ നേരം പുലർന്നതിന് ശേഷം വീട്ടുകാർ വന്ന് നോക്കിയപ്പോഴാണ് നായയെ വീടിന് സമീപം രക്തം വാർന്ന് ചത്ത കിടക്കുന്ന നിലയിൽ കണ്ടത്.
സംഭവത്തെ തുടർന്ന് പ്രദേശവാസികൾ കടുത്ത ഭീതിയിലാണ്. വനമേഖലയോട് ചേർന്ന് കിടക്കുന്ന ജനവാസ കേന്ദ്രമായ മുട്ടത്തുപ്പാറയിൽ കഴിഞ്ഞ കുറച്ചുകാലമായി കാട്ടാന ശല്യം ഉൾപ്പെടെയുള്ള വന്യമൃഗ ശല്യം അതീവ രൂക്ഷമാണ്. ഇതിനിടയിലാണ് ജനങ്ങളെ കൂടുതൽ ആശങ്കയിലാഴ്ത്തി വളർത്തുനായയെ അജ്ഞാത ജീവി ആക്രമിച്ചു കൊന്നിരിക്കുന്നത്. വനംവകുപ്പ് എത്രയും വേഗം പ്രദേശത്ത് രാത്രികാല പട്രോളിങ് ശക്തമാക്കണമെന്നും, ക്യാമറകൾ സ്ഥാപിച്ച് വന്യമൃഗമേതാണെന്ന് കണ്ടെത്തണമെന്നുമാണ് നാട്ടുകാരുടെ പ്രധാന ആവശ്യം.
Story Summary:
A domestic dog belonging to Sabu was killed by an unidentified wild animal in Kottappady Muttathuppara, Kothamangalam. The dog sustained deep wounds behind its neck during the attack, which occurred around 4 AM today. Although locals suspect the presence of a wild animal like a leopard, forest department officials, who are currently inspecting the spot, have not yet confirmed the species. The incident has caused panic among residents in the forest-fringe area, which is already prone to wild elephant attacks.
