ആലപ്പുഴ: ഹരിപ്പാട് മണ്ഡലത്തിൽ ആധിപത്യം തുടർന്ന് രമേശ് ചെന്നിത്തല. ആവേശകരമായ പോരാട്ടത്തിനൊടുവിൽ 23,377 വോട്ടുകളുടെ ഭൂരിപക്ഷത്തിനാണ് ചെന്നിത്തല വിജയിച്ചത്. മണ്ഡലത്തിൽ ആകെ പോൾ ചെയ്ത വോട്ടുകളിൽ 68,184 വോട്ടുകൾ നേടിയാണ് അദ്ദേഹം നിയമസഭയിലേക്ക് വീണ്ടും തിരഞ്ഞെടുക്കപ്പെട്ടത്.(Ramesh Chennithala Victory Haripad, Election Results 2026)
രമേശ് ചെന്നിത്തല (യുഡിഎഫ്): 68,184, ടി.ടി. ജിസ്മോൻ (എൽഡിഎഫ്): 44,807, സന്ദീപ് വാചസ്പതി (എൻഡിഎ): 31,022 എന്നിങ്ങനെയാണ് നില. രമേശ് ചെന്നിത്തലയ്ക്ക് ഇത്തവണയും ഹരിപ്പാട് വോട്ടർമാർ നിറഞ്ഞ പിന്തുണയാണ് നൽകിയത്. ഇടതുതരംഗം ആഞ്ഞടിച്ച 2021-ൽ പോലും 13,666 വോട്ടുകളുടെ ഭൂരിപക്ഷത്തിൽ വിജയിച്ച ചെന്നിത്തലയ്ക്ക് ഇക്കുറി യുഡിഎഫ് തരംഗം ഭൂരിപക്ഷം ഗണ്യമായി വർദ്ധിപ്പിക്കാൻ സഹായിച്ചു. എൻഡിഎ സ്ഥാനാർത്ഥി സന്ദീപ് വാചസ്പതി 30,000-ത്തിലധികം വോട്ടുകൾ നേടി മണ്ഡലത്തിൽ ബിജെപിയുടെ സാന്നിധ്യം ശക്തമാക്കിയിട്ടുണ്ട്.
ഹരിപ്പാട് നഗരസഭയിലും ഭൂരിഭാഗം പഞ്ചായത്തുകളിലും തദ്ദേശ ഭരണത്തിൽ യുഡിഎഫിന് ലഭിച്ച മേൽക്കൈ നിയമസഭാ തിരഞ്ഞെടുപ്പിലും പ്രതിഫലിച്ചു. മധ്യതിരുവിതാംകൂറിലെ കോൺഗ്രസിന്റെ കരുത്തനായ നേതാവ് എന്ന നിലയിൽ രമേശ് ചെന്നിത്തലയുടെ ഈ വിജയം വരാനിരിക്കുന്ന യുഡിഎഫ് മന്ത്രിസഭയിൽ അദ്ദേഹത്തിന്റെ സ്ഥാനം കൂടുതൽ ഉറപ്പിക്കുന്നതാണ്.
അതേസമയം, പുതുപ്പള്ളിയുടെ പുണ്യമായി മാറിയ ഉമ്മൻ ചാണ്ടിയുടെ പിൻഗാമി ചാണ്ടി ഉമ്മൻ മണ്ഡലത്തിൽ അപ്രമാദിത്വം തെളിയിച്ചു. വോട്ടെണ്ണൽ പൂർത്തിയായപ്പോൾ 52,907 വോട്ടുകളുടെ സർവ്വകാല റെക്കോർഡ് ഭൂരിപക്ഷത്തോടെയാണ് ചാണ്ടി ഉമ്മൻ നിയമസഭയിലേക്ക് വീണ്ടും തിരഞ്ഞെടുക്കപ്പെട്ടത്. 2023-ലെ ഉപതിരഞ്ഞെടുപ്പിൽ നേടിയ 37,000 വോട്ടുകളുടെ ഭൂരിപക്ഷത്തെക്കാൾ ഏറെ മുന്നിലെത്താൻ ഇത്തവണ ചാണ്ടി ഉമ്മനായി.
ചാണ്ടി ഉമ്മൻ (യുഡിഎഫ്): 84,031, കെ.എം. രാധാകൃഷ്ണൻ (എൽഡിഎഫ്): 31,124, രവീന്ദ്രനാഥ് വാകത്താനം (എൻഡിഎ): 11,544 എന്നിങ്ങനെയാണ് നില. പ്രചാരണ വേളയിൽ ഉടനീളം തികച്ചും വ്യത്യസ്തമായ ശൈലിയാണ് ചാണ്ടി ഉമ്മൻ സ്വീകരിച്ചത്. പോസ്റ്ററുകൾ ഒഴിവാക്കിയും, സൈക്കിളിൽ സഞ്ചരിച്ച് വോട്ട് തേടിയും അദ്ദേഹം ജനങ്ങൾക്കിടയിൽ സജീവമായി. ഉമ്മൻ ചാണ്ടിയുടെ ജനസമ്പർക്ക ശൈലി അതേപടി പിന്തുടരുന്ന മകനെ പുതുപ്പള്ളി ഇരുകൈയ്യും നീട്ടി സ്വീകരിച്ചു എന്നതിന്റെ തെളിവാണ് ഈ വമ്പൻ ഭൂരിപക്ഷം.
2011-ൽ ഉമ്മൻ ചാണ്ടി നേടിയ 33,255 വോട്ടുകളുടെ ഭൂരിപക്ഷമായിരുന്നു ഇതുവരെ പുതുപ്പള്ളിയിലെ ഏറ്റവും ഉയർന്ന നില. എന്നാൽ ഉപതിരഞ്ഞെടുപ്പിൽ അത് തിരുത്തിക്കുറിച്ച ചാണ്ടി ഉമ്മൻ, ഇത്തവണ 52,000 കടന്ന ഭൂരിപക്ഷത്തിലൂടെ പുതുപ്പള്ളിയെ കോൺഗ്രസിന്റെ ഏറ്റവും സുരക്ഷിതമായ കോട്ടയായി ഉറപ്പിച്ചു. എൽഡിഎഫ് സ്ഥാനാർത്ഥി കെ.എം. രാധാകൃഷ്ണനും എൻഡിഎയുടെ രവീന്ദ്രനാഥ് വാകത്താനത്തിനും ചാണ്ടി ഉമ്മന്റെ മുന്നേറ്റത്തിന് മുന്നിൽ തടയിടാനായില്ല. സംസ്ഥാനത്തുടനീളം വീശിയടിച്ച യുഡിഎഫ് തരംഗം പുതുപ്പള്ളിയിൽ കൂടുതൽ ശക്തമായതോടെ, ഉമ്മൻ ചാണ്ടിക്ക് ശേഷം പുതുപ്പള്ളിയുടെ ഒരേയൊരു രക്ഷകൻ താനാണെന്ന് ചാണ്ടി ഉമ്മൻ ഒരിക്കൽ കൂടി തെളിയിച്ചിരിക്കുകയാണ്.
Story Summary
Senior Congress leader Ramesh Chennithala retained the Haripad constituency with a decisive majority of over 23,000 votes in the 2026 Kerala Assembly elections. While LDF candidate T.T. Jismon came second, NDA’s Sandeep Vachaspati secured a notable third position with 31,022 votes.
