കൊച്ചി: കോതമംഗലം നിയമസഭാ മണ്ഡലത്തിൽ എൽഡിഎഫ് കോട്ടകൾ തകർത്ത് യുഡിഎഫ് സ്ഥാനാർത്ഥി ഷിബു തെക്കുംപുറം മുന്നേറുന്നു (Kothamangalam Election Results 2026). ഒടുവിൽ വിവരം ലഭിക്കുമ്പോൾ 3701 വോട്ടുകളുടെ ലീഡുമായി ഷിബു തെക്കുംപുറം കരുത്ത് കാട്ടുകയാണ്. ഈ വിജയം കോതമംഗലത്തെ ജനങ്ങൾക്കും ഐക്യജനാധിപത്യ മുന്നണിക്കും സമർപ്പിക്കുന്നുവെന്ന് അദ്ദേഹം മാധ്യമങ്ങളോട് പ്രതികരിച്ചു.
കേരളത്തിലുടനീളം യുഡിഎഫ് വലിയ മുന്നേറ്റമാണ് നടത്തുന്നതെന്നും മുന്നണി നൂറ് സീറ്റുകൾ കടക്കുമെന്നും ഷിബു പ്രത്യാശ പ്രകടിപ്പിച്ചു. കഴിഞ്ഞ അഞ്ച് വർഷം യുഡിഎഫ് നടത്തിയ ചിട്ടയായ പ്രവർത്തനങ്ങളാണ് ഈ ഉജ്ജ്വല വിജയത്തിന് പിന്നിലെന്നും ഓരോ പഞ്ചായത്തുകളിലും പ്രതീക്ഷിച്ചതിനേക്കാൾ മികച്ച ലീഡ് ലഭിക്കുന്നുണ്ടെന്നും അദ്ദേഹം കൂട്ടിച്ചേർത്തു.
മണ്ഡലത്തിൽ ഷിബു എന്ന പേരിൽ തന്നെ മറ്റ് രണ്ട് സ്വതന്ത്ര സ്ഥാനാർത്ഥികൾ കൂടി ഉണ്ടായിരുന്നെങ്കിലും വോട്ടർമാർ യുഡിഎഫിനൊപ്പം ഉറച്ചുനിന്നുവെന്നാണ് പ്രാഥമിക ഫലങ്ങൾ നൽകുന്ന സൂചന. നിലവിലെ എംഎൽഎയും എൽഡിഎഫ് സ്ഥാനാർത്ഥിയുമായ ആന്റണി ജോൺ ആണ് രണ്ടാമത്. അജി നാരായണനാണ് എൻഡിഎ സ്ഥാനാർത്ഥി.
Story Summary: UDF candidate Shibu Thekkumpuram is leading in Kothamangalam by 3,701 votes, signaling a major shift in the constituency. Dedicating his success to the people and UDF workers, Shibu expressed confidence that the front will secure over 100 seats across Kerala.
