കോഴിക്കോട്: സംസ്ഥാനത്ത് യു.ഡി.എഫ് തരംഗം പ്രവചിക്കുന്ന എക്സിറ്റ് പോൾ ഫലങ്ങളെ തള്ളി മന്ത്രി മുഹമ്മദ് റിയാസ്. മുൻകാലങ്ങളിലും എക്സിറ്റ് പോളുകൾക്ക് വലിയ പാളിച്ചകൾ സംഭവിച്ചിട്ടുണ്ടെന്നും ജനവിധി എൽ.ഡി.എഫിന് അനുകൂലമായിരിക്കുമെന്നും അദ്ദേഹം പറഞ്ഞു. (Exit polls don’t matter, Minister PA Mohammed Riyas says there will be a continuation of government rule )
കോഴിക്കോട് ജില്ലയിലും തന്റെ മണ്ഡലമായ ബേപ്പൂരിലും ഇടതുമുന്നണി മികച്ച വിജയം നേടുമെന്നും അദ്ദേഹം ആത്മവിശ്വാസം പ്രകടിപ്പിച്ചു. യു.ഡി.എഫിന് അനുകൂലമായ ന്യൂനപക്ഷ ഏകീകരണം സംസ്ഥാനത്ത് ഉണ്ടായിട്ടില്ല. പകുതിയിലധികം ന്യൂനപക്ഷ വോട്ടർമാരുള്ള ബേപ്പൂരിൽ എൽ.ഡി.എഫ് സർവ്വകാല റെക്കോർഡ് ഭൂരിപക്ഷത്തോടെ വിജയിക്കും.
കോഴിക്കോട് ജില്ലയിൽ എൽ.ഡി.എഫിന് ഒരിടത്തും വീഴ്ചകൾ സംഭവിക്കില്ല. എല്ലാ മണ്ഡലങ്ങളിലും അനുകൂല സാഹചര്യമാണ് നിലനിൽക്കുന്നത്. വടകര താലൂക്കിൽ മുൻപ് ഇടതുമുന്നണിക്ക് വോട്ട് കുറഞ്ഞ സാഹചര്യം ഉണ്ടായിരുന്നു. എന്നാൽ ഇത്തവണ അത് കൃത്യമായി മനസ്സിലാക്കി ആവശ്യമായ തിരുത്തലുകൾ വരുത്തിയിട്ടുണ്ട്. എക്സിറ്റ് പോളുകൾ എന്തുതന്നെ പറഞ്ഞാലും താഴെത്തട്ടിലുള്ള പ്രവർത്തനങ്ങളും ജനങ്ങളുടെ പിന്തുണയും ഇടതുപക്ഷത്തിനൊപ്പമാണെന്ന് റിയാസ് വ്യക്തമാക്കി.
