കൊല്ലം: കരീപ്ര പഞ്ചായത്തിലെ സ്വീകരണ പരിപാടിക്കിടെ അയിഷാ പോറ്റിക്കുനേരേ അസഭ്യവർഷം നടത്തുകയും പര്യടനം തടസ്സപ്പെടുത്താൻ ശ്രമിക്കുകയും ചെയ്ത സംഭവത്തിൽ രണ്ട് സി.പി.എം. പ്രവർത്തകർക്കെതിരേ പോലീസ് കേസെടുത്തു. കുഴിമതിക്കാട് സ്വദേശി പ്രസാദ്, ചൂരപ്പൊയ്ക സ്വദേശി സതീഷ് എന്നിവർക്കെതിരേയാണ് എഴുകോൺ പോലീസ് നടപടിയെടുത്തത്.(Case filed against 2 CPM workers for abusive language towards Aisha Potty )
ഞായറാഴ്ച ഉച്ചയോടെ അയിഷാ പോറ്റിയുടെ സ്വീകരണ പര്യടനം കരീപ്ര ചൂരപ്പൊയ്കയിൽ എത്തിയപ്പോഴായിരുന്നു സംഭവം. റോഡരികിൽ നിന്നിരുന്ന പ്രസാദും സതീഷും ചേർന്ന് സ്ഥാനാർഥിയുടെ വാഹനം തടയാൻ ശ്രമിച്ചു.
വഞ്ചന കാട്ടിയതല്ലേ എന്ന് ചോദിച്ചുകൊണ്ട് ഇവർ അയിഷാ പോറ്റിക്കുനേരെ അസഭ്യവർഷം നടത്തുകയായിരുന്നു. സംഭവത്തിന്റെ വീഡിയോ ദൃശ്യങ്ങൾ വ്യാപകമായി പ്രചരിച്ചതോടെ പോലീസ് അന്വേഷണം ആരംഭിച്ചു. സ്ത്രീത്വത്തെ അപമാനിച്ചതടക്കമുള്ള ഗുരുതരമായ വകുപ്പുകൾ ചുമത്തിയാണ് പോലീസ് കേസെടുത്തിരിക്കുന്നത്.
