അഹമ്മദാബാദ്: ഐപിഎൽ രണ്ടാം ക്വാളിഫയറിൽ രാജസ്ഥാൻ റോയൽസിനെ ഏഴു വിക്കറ്റിന് തകർത്ത് ഗുജറാത്ത് ടൈറ്റൻസ് ഫൈനലിലേക്ക് മാർച്ച് ചെയ്തു. രാജസ്ഥാൻ ഉയർത്തിയ കൂറ്റൻ വിജയലക്ഷ്യമായ 215 റൺസ്, 18.4 ഓവറിൽ മൂന്നു വിക്കറ്റ് മാത്രം നഷ്ടപ്പെടുത്തിയാണ് ഗുജറാത്ത് അനായാസം മറികടന്നത്. ഞായറാഴ്ച നടക്കുന്ന കലാശപ്പോരാട്ടത്തിൽ റോയൽ ചലഞ്ചേഴ്സ് ബെംഗളൂരുവാണ് ഗുജറാത്തിന്റെ എതിരാളികൾ.(Gujarat Titans Reach IPL Final By Defeating Rajasthan Royals)
ക്യാപ്റ്റൻ ശുഭ്മാൻ ഗില്ലിന്റെ (104) തകർപ്പൻ സെഞ്ച്വറിയും സായ് സുദർശന്റെ (58) അർധ സെഞ്ച്വറിയുമാണ് ഗുജറാത്തിന്റെ വിജയത്തിന് അടിത്തറ പാകിയത്. ഓപ്പണിങ് വിക്കറ്റിൽ ഇരുവരും ചേർന്ന് 77 പന്തിൽ നിന്ന് 167 റൺസ് അടിച്ചുകൂട്ടി രാജസ്ഥാൻ ബൗളർമാരെ നിഷ്പ്രഭരാക്കി. 53 പന്തിൽ 15 ഫോറും മൂന്ന് സിക്സുമടക്കമായിരുന്നു ഗില്ലിന്റെ ഇന്നിങ്സ്.
നേരത്തെ ടോസ് നേടി ആദ്യം ബാറ്റിങ്ങിനിറങ്ങിയ രാജസ്ഥാൻ റോയൽസ് വൈഭവ് സൂര്യവംശിയുടെ (96) മികവിൽ ആറു വിക്കറ്റ് നഷ്ടത്തിൽ 214 റൺസ് നേടിയിരുന്നു. സെഞ്ച്വറിക്ക് നാല് റൺസകലെ വെച്ച് വൈഭവ് പുറത്തായെങ്കിലും, രവീന്ദ്ര ജഡേജയുമായി (45*) ചേർന്ന് 127 റൺസ് കൂട്ടുകെട്ടുണ്ടാക്കി ടീമിന് മികച്ച സ്കോർ സമ്മാനിച്ചു. അവസാന ഓവറുകളിൽ ഡോണോവൻ ഫെരെയ്ര (11 പന്തിൽ 38) നടത്തിയ വെടിക്കെട്ട് ബാറ്റിങ്ങാണ് രാജസ്ഥാനെ 200 കടത്തിയത്.
Story Summary
Gujarat Titans secured their spot in the IPL final after a commanding seven-wicket victory over Rajasthan Royals in the second qualifier. Led by Shubman Gill’s magnificent century and Sai Sudharsan’s half-century, Gujarat chased down a target of 215 with ease, setting up a final clash against Royal Challengers Bengaluru.
