ന്യൂയോർക്ക്: സ്പെയിനിന്റെ ചരിത്രപരമായ ഫിഫ ലോകകപ്പ് കിരീടധാരണ ചടങ്ങിലും തന്റേതായ ശൈലിയിലുള്ള പെരുമാറ്റം കൊണ്ട് ശ്രദ്ധാകേന്ദ്രമായി മാറിയിരിക്കുകയാണ് അമേരിക്കൻ പ്രസിഡന്റ് ഡോണൾഡ് ട്രംപ്. ഫൈനലിൽ അർജന്റീനയെ തോൽപ്പിച്ച് ചാമ്പ്യന്മാരായ സ്പെയിൻ ടീമിന് ലോകകപ്പ് ട്രോഫി സമ്മാനിച്ചത് ട്രംപായിരുന്നു. എന്നാൽ ട്രോഫി കൈമാറിയ ശേഷം വേദിയിൽ നിന്ന് മാറാൻ അദ്ദേഹം കൂട്ടാക്കാതിരുന്നത് നേരിയ ആശയക്കുഴപ്പത്തിനും ചിരി പടർത്തുന്ന ദൃശ്യങ്ങൾക്കും കാരണമായി.(US President Donald Trump Lingers On Stage At FIFA World Cup Final )
നേരത്തെ ക്ലബ് ലോകകപ്പ് വേളയിൽ ചെൽസി താരങ്ങൾക്ക് കിരീടം സമ്മാനിച്ചപ്പോഴും വേദിയിൽ നിന്ന് ഇറങ്ങാൻ ട്രംപ് വിസമ്മതിച്ചത് വലിയ ചർച്ചയായിരുന്നു. സമാനമായ രംഗങ്ങളാണ് ന്യൂജേഴ്സി സ്റ്റേഡിയത്തിലും ആവർത്തിച്ചത്. ട്രോഫി നൽകിയ ശേഷം ട്രംപ് വേദിയിൽ തന്നെ നിലയുറപ്പിച്ചു. ഇത് കാര്യമാക്കാതെ സ്പാനിഷ് താരങ്ങൾ കിരീടനേട്ടം ആഘോഷിക്കാൻ തുടങ്ങുകയും ചെയ്തു. ഒടുവിൽ ഫിഫ പ്രസിഡന്റ് ജിയാനി ഇൻഫാന്റിനോ നേരിട്ടെത്തി ട്രംപിനോട് സംസാരിക്കുകയും അദ്ദേഹത്തെ വേദിയിൽ നിന്ന് താഴേക്ക് നയിക്കുകയുമായിരുന്നു. ആദ്യം ഇറങ്ങാൻ മടിച്ചെങ്കിലും ഇൻഫാന്റിനോയുടെ അഭ്യർത്ഥനയ്ക്ക് പിന്നാലെ അദ്ദേഹം വേദിവിട്ടു. പോകും മുൻപ് സ്പാനിഷ് കളിക്കാർക്ക് മുന്നിൽ വെച്ച് 80-കാരനായ ട്രംപ് തന്റെ പ്രശസ്തമായ ‘ട്രംപ് ഡാൻസ്’ ചുവടുകൾ പുറത്തെടുക്കാനും മറന്നില്ല.
രാഷ്ട്രീയ ഭിന്നതകൾ നിലനിൽക്കുന്ന പശ്ചാത്തലത്തിൽ സ്പെയിൻ പ്രസിഡന്റ് പെഡ്രോ സാഞ്ചസിനെ കടുത്ത ഭാഷയിൽ വിമർശിച്ചിരുന്ന ട്രംപിന്റെ കൈയിൽ നിന്ന് തന്നെ സ്പാനിഷ് ടീം ലോകകിരീടം ഏറ്റുവാങ്ങിയത് മറ്റൊരു ശ്രദ്ധേയമായ കാര്യമായി. നേരത്തെ ട്രോഫി സമ്മാനിക്കാനായി ട്രംപും ഇൻഫാന്റിനോയും മൈതാനത്തേക്ക് എത്തിയപ്പോൾ സ്റ്റേഡിയത്തിലുണ്ടായിരുന്ന കാണികളിൽ ഒരു വിഭാഗം കൂവലോടെയാണ് യുഎസ് പ്രസിഡന്റിനെ സ്വീകരിച്ചത്. തന്റെ ഔദ്യോഗിക ഹെലികോപ്റ്ററിലാണ് ട്രംപ് ഫൈനൽ മത്സരം കാണാൻ സ്റ്റേഡിയത്തിൽ എത്തിയിരുന്നത്.
Story Summary
US President Donald Trump grabbed attention at the 2026 FIFA World Cup presentation ceremony by lingering on stage after presenting the trophy to champions Spain. FIFA President Gianni Infantino had to step in and gently guide the 80-year-old president off the stage, who then performed a quick signature ‘Trump dance’ before leaving.
