ന്യൂയോർക്ക്: ലോകകപ്പ് ഫുട്ബോൾ ടൂർണമെന്റിന് ദിവസങ്ങൾ മാത്രം ബാക്കിനിൽക്കെ, ടിക്കറ്റ് വിൽപ്പനയിൽ വൻ അഴിമതിയും കൃത്രിമത്വവും നടത്തിയെന്ന ഗുരുതര ആരോപണങ്ങളിൽ ഫിഫ പ്രതിസന്ധിയിൽ (FIFA World Cup 2026 Ticket Scam). തങ്ങളുടെ ഔദ്യോഗിക പ്ലാറ്റ്ഫോമിൽ ടിക്കറ്റ് നിരക്കുകൾ കുത്തനെ ഉയർത്തിപ്പിടിക്കുകയും, അതേസമയം വിറ്റഴിയാത്ത വലിയൊരു ഭാഗം ടിക്കറ്റുകൾ മൂന്നാം കക്ഷി റീസെയിൽ വെബ്സൈറ്റുകൾ വഴി കുറഞ്ഞ വിലയ്ക്ക് രഹസ്യമായി വിറ്റഴിക്കുകയും ചെയ്യുന്നുവെന്നാണ് ഫിഫയ്ക്കെതിരെയുള്ള പുതിയ കണ്ടെത്തൽ. ഹൂസ്റ്റണിലെ എൻആർജി സ്റ്റേഡിയത്തിൽ നടക്കുന്ന സൗദി അറേബ്യ – കേപ് വെർദെ ഗ്രൂപ്പ് ഘട്ട മത്സരത്തിന്റെ ടിക്കറ്റുകളിലാണ് ഇത്തരത്തിൽ വലിയ തിരിമറി കണ്ടെത്തിയത്. ബോസ്റ്റൺ സർവ്വകലാശാലയിലെ ഇക്കണോമിക്സ് പ്രൊഫസറായ ഫ്ലോറിയൻ എഡറർ ആണ് ഈ ‘ടിക്കറ്റ് കളി’ സോഷ്യൽ മീഡിയയിലൂടെ പുറത്തുകൊണ്ടുവന്നത്.
സാധാരണയായി ആരാധകർക്ക് കളി കാണാൻ കഴിയാതെ വരുമ്പോൾ ഒന്നോ രണ്ടോ ടിക്കറ്റുകളാണ് റീസെയിൽ സൈറ്റുകളിൽ വിൽക്കാറുള്ളത്. എന്നാൽ സീറ്റ്ഗീക്ക് (SeatGeek) പോലുള്ള സെക്കൻഡറി മാർക്കറ്റുകളിൽ മുഴുവൻ വരികളിലെയും നൂറുകണക്കിന് സീറ്റുകൾ ഒന്നിച്ച് വിൽപനയ്ക്ക് വന്നതാണ് സംശയത്തിന് ഇടയാക്കിയത്. ഫിഫയുടെ ഔദ്യോഗിക സൈറ്റിൽ 700 ഡോളർ (ഏകദേശം 58,000 രൂപ) വിലയിട്ടിരിക്കുന്ന സീറ്റുകൾ ഈ റീസെയിൽ സൈറ്റിൽ വെറും 200 ഡോളറിനാണ് (ഏകദേശം 16,000 രൂപ) വിൽക്കുന്നത്. സ്വന്തം പ്ലാറ്റ്ഫോമിൽ വില കുറച്ചാൽ നേരത്തെ കൂടിയ വിലയ്ക്ക് ടിക്കറ്റ് എടുത്ത ആരാധകർ നഷ്ടപരിഹാരവും റീഫണ്ടും ആവശ്യപ്പെട്ട് രംഗത്തെത്തുമെന്ന ഭയം കാരണമാണ് ഫിഫ ഈ കള്ളക്കളി നടത്തുന്നത് എന്നാണ് സാമ്പത്തിക വിദഗ്ധരുടെ ആക്ഷേപം. എന്നാൽ സീറ്റ്ഗീക്ക് അധികൃതർ ഫിഫയുമായി യാതൊരു കരാറുമില്ലെന്ന് പറഞ്ഞ് ഈ ഒത്തുകളി നിഷേധിച്ചിട്ടുണ്ട്. ടിക്കറ്റ് വില കൃത്രിമമായി വർദ്ധിപ്പിച്ചതിനും സ്റ്റേഡിയങ്ങളിലെ സീറ്റിംഗ് പ്ലാനുകളിൽ ആരാധകരെ പറ്റിച്ചതിനുമായി ന്യൂയോർക്ക് അറ്റോർണി ജനറൽ ലെറ്റീഷ്യ ജെയിംസും ന്യൂജേഴ്സി അറ്റോർണി ജനറൽ ജെന്നിഫർ ഡാവൻപോർട്ടും സംയുക്തമായി ഫിഫയ്ക്ക് അടുത്തിടെ സബ്പീന അയച്ച് നിയമനടപടികൾ ആരംഭിച്ചിരുന്നു.
Summary: With the 2026 FIFA World Cup just days away, soccer’s governing body, FIFA, is facing severe backlash over allegations of a ticketing “shell game.” Experts, including Boston University economics professor Florian Ederer, revealed that massive blocks of unsold tickets for games like Saudi Arabia vs. Cape Verde are being quietly dumped onto third-party resale sites like SeatGeek for $200, while official FIFA platforms maintain a steep price of $700. Critics argue FIFA is doing this to avoid massive refund demands from fans who already paid face value.
