മുംബൈ: പ്രശസ്ത ഹിന്ദി ടെലിവിഷൻ താരം സഞ്ചിത ഉഗാലെ (Sanchita Ugale dies by suicide) യെ നാസിക്കിലെ (Nalasopara) വാടകവീട്ടിൽ തൂങ്ങിമരിച്ച നിലയിൽ കണ്ടെത്തി. 22 വയസ്സായിരുന്നു. ‘കുംകും ഭാഗ്യ’ (Kumkum Bhagya), ‘വാഗ്ലേ കി ദുനിയ’ (Wagle Ki Duniya) തുടങ്ങിയ ജനപ്രിയ പരമ്പരകളിലൂടെയും ദംഗൽ ടിവിയിലെ ‘ദിൽവാലി ദുൽഹ ലേ ജായേഗി’ എന്ന സീരിയലിലൂടെയും പ്രേക്ഷകർക്ക് പ്രിയങ്കരിയായ നടിയുടെ അപ്രതീക്ഷിത വിയോഗം ഉത്തരേന്ത്യൻ ടെലിവിഷൻ ലോകത്തെ ഒന്നടങ്കം ഞെട്ടിച്ചിരിക്കുകയാണ്.
തിങ്കളാഴ്ച രാവിലെയാണ് സഞ്ചീതയെ വീട്ടിനുള്ളിൽ മരിച്ച നിലയിൽ കണ്ടെത്തിയത്. ആത്മഹത്യ ചെയ്യാനുണ്ടായ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. മരണത്തിന് മണിക്കൂറുകൾക്ക് മുൻപ് പോലും ഇൻസ്റ്റാഗ്രാമിൽ പുതിയൊരു റീൽസ് വീഡിയോ പങ്കുവെച്ച് ‘മറ്റൊരു ഹിറ്റ്’ (Another Banger) എന്ന് സഞ്ചീത കുറിച്ചിരുന്നു. അതുകൊണ്ട് തന്നെ അതീവ സന്തോഷവതിയായി കാണപ്പെട്ട നടി പെട്ടെന്ന് ഇത്തരമൊരു കടുംകൈ ചെയ്തത് എന്തിനാണെന്ന ആശയക്കുഴപ്പത്തിലാണ് സുഹൃത്തുക്കളും പോലീസും.
സംഭവത്തിൽ മുംബൈ പോലീസ് എഡിആർ (ADR) രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റുമോർട്ടത്തിനായി സർക്കാർ ആശുപത്രിയിലേക്ക് മാറ്റി. സഞ്ചീതയുടെ മൊബൈൽ ഫോൺ കസ്റ്റഡിയിലെടുത്ത പോലീസ്, മരണത്തിലേക്ക് നയിച്ച എന്തെങ്കിലും വ്യക്തിപരമായ പ്രശ്നങ്ങളോ സാമ്പത്തിക പ്രതിസന്ധികളോ ഉണ്ടോയെന്ന് കണ്ടെത്താൻ സഹപ്രവർത്തകരെയും കുടുംബാംഗങ്ങളെയും ചോദ്യം ചെയ്തുവരികയാണ്.
ടെലിവിഷൻ രംഗത്തിന് പുറമെ ബോളിവുഡിലും സഞ്ചീത സാന്നിധ്യമറിയിച്ചിട്ടുണ്ട്. വിക്കി കൗശൽ നായകനായ ‘ഛാവാ’ (Chhaava), മനോജ് ബാജ്പേയിയുടെ ‘സൈലൻസ് 2’ എന്നീ ചിത്രങ്ങളിലും അവർ ശ്രദ്ധേയമായ വേഷങ്ങൾ കൈകാര്യം ചെയ്തിരുന്നു. നടിയുടെ അകാല വിയോഗത്തിൽ നിരവധി പ്രമുഖ താരങ്ങളും ആരാധകരും സോഷ്യൽ മീഡിയയിലൂടെ അനുശോചനം രേഖപ്പെടുത്തി.
