കൊച്ചി: മഹേഷ് നാരായണൻ സംവിധാനം ചെയ്യുന്ന സ്പൈ ആക്ഷൻ ത്രില്ലർ ‘പേട്രിയറ്റ്’ 2026 മെയ് ഒന്നിന് തിയേറ്ററുകളിൽ പ്രദർശനത്തിനെത്തുന്നു. മലയാളത്തിലെ മുൻനിര താരങ്ങൾ അണിനിരക്കുന്ന ചിത്രത്തിന് വിദേശ വിപണികളിൽ വൻ തരംഗമാണ് ഇപ്പോൾ പ്രകടമാകുന്നത്.(Patriot early review, Mammootty and Mohanlal film Comes out well, Overseas censor reports strong)
റിലീസിന് ദിവസങ്ങൾ ബാക്കി നിൽക്കെ വിദേശ രാജ്യങ്ങളിലെ അഡ്വാൻസ് ബുക്കിങ്ങിൽ മികച്ച മുന്നേറ്റമാണ് ചിത്രം നടത്തുന്നത്. ഇതുവരെയുള്ള കണക്കുകൾ പ്രകാരം വിദേശ പ്രീ-സെയിൽസ് രണ്ട് ലക്ഷം യുഎസ് ഡോളർ (ഏകദേശം 1.88 കോടി രൂപ) പിന്നിട്ടു. ട്രേഡ് അനലിസ്റ്റ് ജെറിൻ ജോർജുകുട്ടി പുറത്തുവിട്ട കണക്കുകൾ പ്രകാരം 201,000 ഡോളറാണ് നിലവിലെ ഗ്രോസ് കളക്ഷൻ.
ചിത്രത്തിന്റെ വിദേശ സെൻസറിംഗ് നടപടികൾ പൂർത്തിയായി വരുന്നതായി സിനിമാ ട്രാക്കർ എക്സിലൂടെ അറിയിച്ചു. ചിത്രം വളരെ മികച്ച രീതിയിലാണ് ഒരുക്കിയിരിക്കുന്നതെന്നും മമ്മൂട്ടിക്കും മോഹൻലാലിനും ഒരുപോലെ പ്രാധാന്യമുള്ള വേഷങ്ങളാണ് ചിത്രത്തിലുള്ളതെന്നും സെൻസർ ബോർഡിൽ നിന്നുള്ള ആദ്യ പ്രതികരണങ്ങൾ സൂചിപ്പിക്കുന്നു. സുഷിൻ ശ്യാം സംഗീതവും മനുഷ് നന്ദൻ ഛായാഗ്രഹണവും നിർവ്വഹിക്കുന്ന ചിത്രത്തിന്റെ എഡിറ്റിംഗ് മഹേഷ് നാരായണനും രാഹുൽ രാധാകൃഷ്ണനും ചേർന്നാണ് കൈകാര്യം ചെയ്തിരിക്കുന്നത്. മമ്മൂട്ടി, മോഹൻലാൽ എന്നിവർക്കൊപ്പം കുഞ്ചാക്കോ ബോബൻ, ഫഹദ് ഫാസിൽ, നയൻതാര, ദർശന രാജേന്ദ്രൻ തുടങ്ങിയ വമ്പൻ താരനിരയാണ് ഈ ചിത്രത്തിൽ അണിനിരക്കുന്നത്. മലയാള സിനിമയിലെ എക്കാലത്തെയും വലിയ പ്രൊജക്റ്റുകളിൽ ഒന്നായാണ് ‘പേട്രിയറ്റ്’ വിലയിരുത്തപ്പെടുന്നത്.
