ന്യൂയോർക്ക്: ലോകമെമ്പാടുമുള്ള ജാസ് സംഗീത പ്രേമികളുടെ പ്രിയങ്കരനായ അമേരിക്കൻ സാക്സോഫോൺ ഇതിഹാസം സണ്ണി റോളിൻസ് (95) അന്തരിച്ചു ( Jazz Legend Sonny Rollin). ന്യൂയോർക്കിലെ വുഡ്സ്റ്റോക്കിലുള്ള വസതിയിലായിരുന്നു അന്ത്യമെന്ന് അദ്ദേഹത്തിന്റെ പിആർഒ പ്രസ്താവനയിലൂടെ അറിയിച്ചു. ജോൺ കോൾട്രെയ്ൻ, വെയ്ൻ ഷോട്ടർ എന്നിവർക്കൊപ്പം ജാസ് സംഗീത ലോകത്തെ ഏറ്റവും സ്വാധീനിച്ച അസാധാരണ പ്രതിഭകളിൽ ഒരാളായിരുന്നു അദ്ദേഹം. 1930 സെപ്റ്റംബർ 7-ന് ഹാർലെമിൽ ജനിച്ച വാൾട്ടർ തിയോഡോർ റോളിൻസ് എന്ന സണ്ണി റോളിൻസ്, ചെറുപ്രായത്തിൽ തന്നെ സംഗീത ലോകത്ത് സജീവമായിരുന്നു. തന്റെ കരിയറിലെ കടുത്ത ആത്മവിശ്വാസക്കുറവ് പരിഹരിക്കാൻ 1959-ൽ ന്യൂയോർക്കിലെ വില്യംസ്ബർഗ് പാലത്തിൽ ദിവസവും 15 മണിക്കൂറോളം ചെലവഴിച്ച് അദ്ദേഹം നടത്തിയ കഠിന പരിശീലനം ജാസ് ചരിത്രത്തിലെ പ്രശസ്തമായ അധ്യായമാണ്. ഇതിന്റെ ഫലമായി പുറത്തിറങ്ങിയ “ദി ബ്രിഡ്ജ്” എന്ന ആൽബം അദ്ദേഹത്തെ ആഗോളതലത്തിൽ പ്രശസ്തനാക്കി.
ആറ് പതിറ്റാണ്ടിലേറെ നീണ്ട സംഗീത ജീവിതത്തിൽ ഒരു ബാൻഡ് ലീഡർ എന്ന നിലയിൽ മാത്രം അറുപതിലധികം ആൽബങ്ങൾ അദ്ദേഹം പുറത്തിറക്കിയിട്ടുണ്ട്. ‘സാക്സോഫോൺ കൊളോസസ്’ എന്ന വിഖ്യാത ആൽബം ഉൾപ്പെടെയുള്ള അദ്ദേഹത്തിന്റെ സൃഷ്ടികൾ സാക്സോഫോൺ വായനയിലെ മെലഡിയെയും ഇംപ്രൊവൈസേഷനെയും ഒരു പുതിയ തലത്തിലേക്ക് എത്തിച്ചു. 1950-കളിൽ സായുധ കവർച്ചയ്ക്കും മയക്കുമരുന്ന് ഉപയോഗത്തിനും ജയിൽ ശിക്ഷ അനുഭവിച്ചിരുന്ന അദ്ദേഹം, പിന്നീട് യോഗയിലൂടെയും കഠിനമായ വ്യായാമമുറകളിലൂടെയും സംഗീതത്തിലേക്ക് ശക്തമായി തിരിച്ചുവരികയായിരുന്നു. പ്രശസ്തമായ ‘റോളിങ് സ്റ്റോൺസ്’ ബാൻഡിനൊപ്പവും അദ്ദേഹം പ്രവർത്തിച്ചിട്ടുണ്ട്. രണ്ട് ഗ്രാമി അവാർഡുകളും ലൈഫ് ടൈം അച്ചീവ്മെന്റ് അവാർഡും നേടിയിട്ടുള്ള അദ്ദേഹം ശ്വാസകോശ രോഗത്തെ തുടർന്ന് 2014-ലാണ് സംഗീതരംഗത്തുനിന്ന് വിരമിച്ചത്. തന്റെ തലമുറയിലെ ജാസ് ഭീമന്മാരിൽ അവശേഷിച്ച അവസാനത്തെ കണ്ണിയായിരുന്നു സണ്ണി റോളിൻസ്.
Summary: Legendary American jazz saxophonist Sonny Rollins has passed away at his home in Woodstock, New York, at the age of 95. Known as one of the most influential improvisers in jazz history, Rollins famously honed his distinctive sound during a self-imposed practice sabbatical on the Williamsburg Bridge. Winner of two Grammy Awards and a Lifetime Achievement Award, he was the last surviving giant of a golden era of jazz music.
