നടനായും സംവിധായകനായും മലയാള സിനിമയിൽ തന്റേതായ ഇടം കണ്ടെത്തിയ ബേസിൽ ജോസഫ് വീണ്ടും സംവിധാനത്തിലേക്ക് തിരിച്ചെത്തുന്നുവെന്ന വാർത്തകൾ ആരാധകരിൽ വലിയ ആവേശമാണ് നിറയ്ക്കുന്നത്. തെലുങ്ക് സൂപ്പർ താരം അല്ലു അർജുനെ നായകനാക്കി ബേസിൽ ഒരു ചിത്രം സംവിധാനം ചെയ്യുന്നുവെന്ന അഭ്യൂഹങ്ങൾക്കിടെ, താരം സോഷ്യൽ മീഡിയയിൽ പങ്കുവെച്ച ഒരു ചിത്രം ആരാധകർക്കിടയിൽ ചർച്ചയായിരിക്കുകയാണ്. (Basil Allu Arjun Movie)
തന്റെ ഇൻസ്റ്റാഗ്രാം സ്റ്റോറിയിൽ ബേസിൽ ജോസഫ് ഒരു തൊപ്പിയുടെ ചിത്രം പങ്കുവെച്ചിരുന്നു. ആ തൊപ്പിയിൽ ‘ഐക്കൺ’ (Icon) എന്ന് എഴുതിയിട്ടുണ്ട്. അല്ലു അർജുനെ ആരാധകർ വിശേഷിപ്പിക്കുന്നത് ‘ഐക്കൺ സ്റ്റാർ’ എന്നാണ്. ഇതാണ് ഈ ചിത്രം അല്ലു അർജുനുമായുള്ള ബേസിലിന്റെ പുതിയ ചിത്രത്തെക്കുറിച്ചുള്ള സൂചനയാണെന്ന വിലയിരുത്തലിലേക്ക് ആരാധകരെ എത്തിച്ചത്. ടൊവിനോ തോമസ് അടക്കമുള്ള താരങ്ങൾ പോസ്റ്റിന് താഴെ കമന്റുകളുമായെത്തിയത് ചർച്ചകൾക്ക് ചൂടേറ്റി.
അല്ലു അർജുന്റെ സഹോദരൻ അല്ലു സിരീഷിന്റെ വിവാഹത്തിന് ബേസിൽ അതിഥിയായി എത്തിയത് നേരത്തെ തന്നെ വലിയ ചർച്ചയായിരുന്നു. ബോളിവുഡിൽ ശക്തിമാൻ ഒരുക്കാൻ ബേസിൽ പദ്ധതിയിട്ടിരുന്നെങ്കിലും അത് ഉപേക്ഷിക്കപ്പെട്ടിരുന്നു. അതിനാൽ, പുതിയ പ്രോജക്റ്റ് അല്ലു അർജുനൊപ്പമുള്ളതാകാൻ സാധ്യതയുണ്ടെന്നാണ് റിപ്പോർട്ടുകൾ. എന്നാൽ ഇക്കാര്യത്തിൽ ഔദ്യോഗികമായ സ്ഥിരീകരണം ഇതുവരെ ലഭ്യമായിട്ടില്ല. ‘മിന്നൽ മുരളി’ക്ക് ശേഷം ബേസിൽ സംവിധാനം ചെയ്യുന്ന ചിത്രം കാണാനായി കാത്തിരിക്കുകയാണ് ആരാധകർ.
Summary: Director-actor Basil Joseph has sparked rumors of a potential collaboration with Telugu superstar Allu Arjun after sharing a photo of a cap featuring the word “Icon” on social media. Fans believe this points to an upcoming directorial project, though no official announcement has been made regarding the rumored film.
