മുംബൈ: ഇന്ത്യൻ സിനിമാ ചരിത്രത്തിലെ എക്കാലത്തെയും വലിയ വിജയങ്ങളിലൊന്നായ ‘ദിൽവാലെ ദുൽഹനിയ ലേ ജായേംഗെ’ ചിത്രീകരിച്ച മഹാരാഷ്ട്രയിലെ ആപ്ത റെയിൽവേ സ്റ്റേഷൻ സന്ദർശിച്ച് നടൻ അനുപം ഖേർ (Anupam Kher Apta Station). 32 വർഷങ്ങൾക്ക് ശേഷമാണ് താരം ഈ ലൊക്കേഷനിൽ തിരിച്ചെത്തുന്നത്. ഈ സ്റ്റേഷനെ ഒരു വിനോദസഞ്ചാര കേന്ദ്രമായി വികസിപ്പിക്കണമെന്ന് അദ്ദേഹം മഹാരാഷ്ട്ര സർക്കാരിനോട് അഭ്യർത്ഥിച്ചു.
സിനിമയിലെ ഐക്കണിക് രംഗമായ “ജാ സിമ്രാൻ ജാ…” എന്ന ഡയലോഗും ഷാരൂഖ് ഖാനും ഗുണ്ടകളും തമ്മിലുള്ള സംഘട്ടനവും ചിത്രീകരിച്ചത് ഈ സ്റ്റേഷനിലായിരുന്നു. ലൊക്കേഷനിൽ നിന്നുള്ള വീഡിയോ അനുപം ഖേർ ഇൻസ്റ്റാഗ്രാമിൽ പങ്കുവെച്ചു. “ഗോഡ് ഫാദർ” സിനിമ ചിത്രീകരിച്ച സിസിലിയിലെ ലൊക്കേഷൻ സന്ദർശിക്കുന്നത് പോലെയാണ് തനിക്ക് ഈ അനുഭവം തോന്നിയതെന്ന് അദ്ദേഹം പറഞ്ഞു. കാലം ഒരു നിമിഷം നിലച്ചുപോയതുപോലെ തോന്നിയെന്നും അദ്ദേഹം കൂട്ടിച്ചേർത്തു.
View this post on Instagram
ലോകമെമ്പാടുമുള്ള സിനിമാ ലൊക്കേഷനുകൾ വിനോദസഞ്ചാര കേന്ദ്രങ്ങളായി സംരക്ഷിക്കപ്പെടാറുണ്ട്. ആപ്ത സ്റ്റേഷനും അത്തരത്തിൽ ഒരു പൈതൃകമായി സംരക്ഷിക്കപ്പെടണമെന്ന് അദ്ദേഹം കുറിച്ചു. മഹാരാഷ്ട്രയിലെ റായ്ഗഡ് ജില്ലയിൽ മുംബൈയിൽ നിന്ന് ഏകദേശം 75-80 കിലോമീറ്റർ അകലെയാണ് ആപ്ത റെയിൽവേ സ്റ്റേഷൻ സ്ഥിതി ചെയ്യുന്നത്. പൻവേൽ-രോഹ റൂട്ടിലുള്ള ഈ ചെറിയ സ്റ്റേഷൻ സിനിമാ പ്രേമികളുടെ പ്രിയപ്പെട്ട ഇടങ്ങളിൽ ഒന്നാണ്.
Summary: Veteran actor Anupam Kher visited Apta Railway Station in Maharashtra, where the iconic climax of ‘Dilwale Dulhania Le Jayenge’ (DDLJ) was filmed 32 years ago. Sharing a nostalgic video, Kher urged the Maharashtra government to preserve and develop the station as a tourist destination, comparing its cultural significance to international film locations like those of “The Godfather.”
