ചെന്നൈ: അമ്മ മോഹിനി മണിയുടെ വിയോഗത്തിന് ദിവസങ്ങൾക്കുശേഷം നടൻ അജിത് കുമാർ വീണ്ടും റേസിങ് ലോകത്തേക്ക് മടങ്ങി ( Ajith Kumar Returns To Racing). ജൂൺ 5ന് റേസിങ് ട്രാക്കിൽ പരിശീലനത്തിനായി എത്തിയ അജിത്തിന്റെ ചിത്രങ്ങൾ ഔദ്യോഗിക ‘അജിത് കുമാർ റേസിങ്’ സോഷ്യൽ മീഡിയ പേജിലൂടെ പുറത്തുവിട്ടു. “ഭാരമേറിയ ഹൃദയത്തോടെയാണ് ജോലിയിലേക്ക് മടങ്ങുന്നത്. എന്നാൽ ജീവിതം മുന്നോട്ട് പോകണം” എന്ന കുറിപ്പോടെയാണ് പുതിയ ചിത്രങ്ങൾ പങ്കുവെച്ചത്. ഈ പോസ്റ്റ് ആരാധകർക്കിടയിലും മോട്ടോർസ്പോർട്സ് പ്രേമികൾക്കിടയിലും വലിയ ശ്രദ്ധ നേടുകയാണ്.
അജിത്തിന്റെ മാതാവ് മോഹിനി മണി മേയ് 30നാണ് ചെന്നൈയിൽ അന്തരിച്ചത്. ആരോഗ്യനില കുറച്ചുകാലമായി മോശമായിരുന്നുവെന്നും ഉറക്കത്തിനിടെയാണ് സമാധാനപരമായി അന്തരിച്ചതെന്നും കുടുംബം പുറത്തിറക്കിയ പ്രസ്താവനയിൽ അറിയിച്ചിരുന്നു. മോഹിനി മണിയുടെ വിയോഗവാർത്ത പുറത്തുവന്നതിന് പിന്നാലെ സിനിമാ-രാഷ്ട്രീയ രംഗത്തെ നിരവധി പ്രമുഖർ അജിത്തിന്റെ വസതിയിലെത്തി ആദരാഞ്ജലി അർപ്പിച്ചിരുന്നു. തമിഴ്നാട് മുഖ്യമന്ത്രി വിജയ്, നടി തൃഷ കൃഷ്ണൻ തുടങ്ങി നിരവധി പേർ കുടുംബാംഗങ്ങളെ നേരിൽ കണ്ടു അനുശോചനം അറിയിച്ചു.
സാമൂഹിക മാധ്യമങ്ങളിൽ പ്രചരിച്ച ദൃശ്യങ്ങളിൽ, കർശന സുരക്ഷാ സംവിധാനങ്ങൾക്കിടയിൽ അജിത്തിന്റെ വീട്ടിലെത്തിയ വിജയ് അദ്ദേഹത്തെ ചേർത്ത് പിടിച്ച് ആശ്വസിപ്പിക്കുന്ന രംഗങ്ങളും ശ്രദ്ധ നേടിയിരുന്നു. തൃഷ കൃഷ്ണനും കുടുംബാംഗങ്ങളെ സന്ദർശിച്ച് അനുശോചനം രേഖപ്പെടുത്തി.
സിനിമാ രംഗത്തെ തിരക്കുകൾക്കൊപ്പം മോട്ടോർസ്പോർട്സിനോടുള്ള അജിത് കുമാറിന്റെ അഭിനിവേശം ഏറെ ശ്രദ്ധേയമാണ്. നിരവധി അന്താരാഷ്ട്ര റേസിങ് മത്സരങ്ങളിൽ പങ്കെടുത്തിട്ടുള്ള താരം, അടുത്തിടെ റേസിങ് പ്രവർത്തനങ്ങളിൽ കൂടുതൽ സജീവമായിരുന്നു. വ്യക്തിപരമായ ദുഃഖത്തിനിടയിലും തന്റെ പ്രൊഫഷണൽ പ്രതിബദ്ധത തുടർന്നുകൊണ്ടാണ് അദ്ദേഹം വീണ്ടും ട്രാക്കിലേക്ക് മടങ്ങിയെത്തിയിരിക്കുന്നത്. അജിത്തിന്റെ പുതിയ പോസ്റ്റിന് കീഴിൽ ആയിരക്കണക്കിന് ആരാധകരാണ് പിന്തുണയും അനുശോചനവും അറിയിച്ച് പ്രതികരിച്ചിരിക്കുന്നത്.
Summary: Actor Ajith Kumar has returned to racing just days after the death of his mother, Mohini Mani. Sharing photos from the track, the Ajith Kumar Racing team said he was back to work “with a heavy heart” while receiving support from fans and well-wishers.
