ഡെറാഡൂൺ: ഉത്തരാഖണ്ഡിലെ തെഹ്രി ഗർവാളിൽ ദളിത് വിദ്യാർത്ഥിയായ കേതൻ ലാൽ (18) ക്രൂരമർദനത്തെത്തുടർന്ന് കൊല്ലപ്പെട്ടു. ഒരു സവർണ കുടുംബത്തിലെ പെൺകുട്ടിയുമായുള്ള സൗഹൃദത്തിന്റെ പേരിൽ പെൺകുട്ടിയുടെ പിതാവും കുടുംബാംഗങ്ങളും ചേർന്ന് കേതനെ മണിക്കൂറുകളോളം തടഞ്ഞുവെച്ച് മർദിച്ചെന്നാണ് പരാതി. കേസിൽ പെൺകുട്ടിയുടെ പിതാവ് യശ്ബീർ സിംഗ് പൻവാർ, മുത്തച്ഛൻ വിദ്യദത്ത് പൻവാർ എന്നിവരെ പോലീസ് അറസ്റ്റ് ചെയ്തു.(Dalit Student Brutally Murdered In Tehri Garhwal Due To Caste Prejudice)
പ്ലസ് ടു വിദ്യാർത്ഥിയായ കേതൻ ലാൽ കഴിഞ്ഞ ആറു മാസമായി പെൺകുട്ടിയുമായി സൗഹൃദത്തിലായിരുന്നു. ഞായറാഴ്ച രാത്രി പെൺകുട്ടി വീട്ടിലേക്ക് വിളിച്ചതനുസരിച്ച് സുഹൃത്തായ ദിവാകറിനൊപ്പം കേതൻ അവിടെയെത്തുകയായിരുന്നു. എന്നാൽ, ഇരുവരെയും പെൺകുട്ടിയുടെ കുടുംബാംഗങ്ങൾ പിടികൂടി ഒരു മുറിയിൽ അടച്ചിട്ട് രാത്രി മുഴുവൻ ക്രൂരമായി മർദിച്ചു. കേതന്റെ കാലുകളിൽ ആണികൾ തറച്ചതായും, മർദനത്തിനിടെ ജാതിപ്പേര് വിളിച്ച് അധിക്ഷേപിച്ചതായും പിതാവ് നൽകിയ പരാതിയിൽ പറയുന്നു.
പിറ്റേന്ന് രാവിലെ പ്രതികൾ തന്നെ വിളിച്ച് മകനെ കൊലപ്പെടുത്തിയെന്നും മൃതദേഹം പുഴയോരത്തുണ്ടെന്നും ഭീഷണി സ്വരത്തിൽ അറിയിച്ചതായി കേതന്റെ പിതാവ് പറഞ്ഞു. ഉടൻ തന്നെ സ്ഥലത്തെത്തിയെങ്കിലും ഗുരുതരമായി പരിക്കേറ്റ കേതൻ ആശുപത്രിയിലേക്ക് കൊണ്ടുപോകും വഴി മരണപ്പെട്ടു. ഒപ്പമുണ്ടായിരുന്ന സുഹൃത്ത് ദിവാകർ ചികിത്സയിലാണ്.
കൊലപാതകം (ബിഎൻഎസ് 103(1)), എസ്സി/എസ്ടി (അതിക്രമം തടയൽ) നിയമം എന്നിവ പ്രകാരം കേസെടുത്തതായി തെഹ്രി ഗർവാൾ എസ്എസ്പി ശ്വേത ചൗബേ അറിയിച്ചു. പെൺകുട്ടിയുടെ കുടുംബത്തിന് ഈ സൗഹൃദത്തിൽ വലിയ എതിർപ്പുണ്ടായിരുന്നുവെന്നും, നേരത്തെ തന്നെ ഇക്കാര്യം യുവാവിന്റെ കുടുംബത്തെ അറിയിച്ചിരുന്നുവെന്നും പോലീസ് വ്യക്തമാക്കി. സംഭവത്തിൽ കൂടുതൽ പേർക്ക് പങ്കുണ്ടോയെന്ന് അന്വേഷിച്ചുവരികയാണ്.
Story Summary
An 18-year-old Dalit student named Ketan Lal was tortured to death by the family of a minor girl in Tehri Garhwal, Uttarakhand, due to their disapproval of their friendship. The victim’s father alleged that the attackers subjected him to brutal assault, including hammering nails into his legs, before dumping him near a rivulet. Police have arrested the girl’s father and grandfather under murder and SC/ST atrocity charges.
