ബെല്ലാരി: യുവാവിനെ കൊലപ്പെടുത്തി മൃതദേഹം കത്തിച്ച സംഭവത്തിൽ ദമ്പതികളുൾപ്പെടെ മൂന്നുപേർ അറസ്റ്റിൽ. ബെല്ലാരി സ്വദേശികളായ ദൊഡ്ഡ ബസവനഗൗഡ (32), ഭാര്യ ശ്വേത (26), ഇവരുടെ സഹോദരൻ എം. വിജയ് (23) എന്നിവരാണ് പിടിയിലായത്. 26 വയസ്സുള്ള യുവാവിനെ കൊലപ്പെടുത്തിയ ശേഷം തെളിവ് നശിപ്പിക്കാനായി മൃതദേഹം കത്തിക്കുകയായിരുന്നുവെന്ന് പോലീസ് പറഞ്ഞു.(Ballari murder case, Ballari Couple and Brother Arrested for Murdering Man)
ജൂൺ എട്ടിന് രാവിലെ ശിവപുര തംബ്രഹള്ളി എൽഎൽസി കനാലിന് സമീപമാണ് മൃതദേഹം ഭാഗികമായി കത്തിക്കരിഞ്ഞ നിലയിൽ കണ്ടെത്തിയത്. സംഭവത്തിന് തലേദിവസം യുവാവിനെ കാണാനില്ലെന്ന് ബന്ധുക്കൾ പരാതി നൽകിയിരുന്നു. തുടർന്ന് നടത്തിയ അന്വേഷണത്തിലാണ് ഞെട്ടിക്കുന്ന കൊലപാതക വിവരം പുറത്തറിയുന്നത്.
ഏകദേശം ഒരു വർഷമായി യുവാവ് ശ്വേതയെ നിരന്തരം ശല്യം ചെയ്തിരുന്നതായി ബല്ലാരി എസ്പി സുമൻ ഡി. പെന്നേക്കർ വ്യക്തമാക്കി. അശ്ലീല വീഡിയോകൾ അയച്ചും ലൈംഗികമായി വഴങ്ങാൻ നിർബന്ധിച്ചും ഇയാൾ യുവതിയെ മാനസികമായി തളർത്തിയിരുന്നു. സഹികെട്ട യുവതി ഇക്കാര്യം ഭർത്താവിനെയും സഹോദരനെയും അറിയിക്കുകയായിരുന്നു. ഇതേത്തുടർന്നാണ് യുവാവിനെ വകവരുത്താൻ ഇവർ ഗൂഢാലോചന നടത്തിയത്.
ജൂൺ ഏഴിന് കനാലിന് സമീപം വെച്ച് കാണാമെന്ന് പറഞ്ഞ് യുവതി യുവാവിനെ വിളിച്ചുവരുത്തി. അവിടെ വെച്ച് കാത്തുനിന്നിരുന്ന ഭർത്താവും സഹോദരനും ചേർന്ന് യുവാവിനെ കയർ ഉപയോഗിച്ച് ശ്വാസം മുട്ടിച്ചു കൊല്ലുകയായിരുന്നു. കൃത്യത്തിന് മുൻകൂട്ടി പ്ലാൻ ചെയ്ത ഇവർ കാറിൽ പെട്രോളും കയറും കരുതിയിരുന്നു. കൊലപാതകത്തിന് ശേഷം മൃതദേഹം 10 കിലോമീറ്റർ അകലെയുള്ള സ്ഥലത്തേക്ക് മാറ്റി, പെട്രോളൊഴിച്ച് കത്തിക്കുകയായിരുന്നു. കൊലപാതകത്തിന് ശേഷം പ്രതികൾ ബംഗളൂരുവിലേക്ക് കടന്നെങ്കിലും, സാങ്കേതിക തെളിവുകളുടെയും ഫോൺ രേഖകളുടെയും സഹായത്തോടെ പോലീസ് ഇവരെ പിടികൂടുകയായിരുന്നു. കൊല്ലപ്പെട്ട യുവാവിന്റെ ഫോൺ പരിശോധിച്ചപ്പോൾ മറ്റ് പല സ്ത്രീകൾക്കും ഇയാൾ സമാനമായ രീതിയിൽ അശ്ലീല സന്ദേശങ്ങൾ അയച്ചിരുന്നതായി കണ്ടെത്തിയിട്ടുണ്ട്. പ്രതികൾ കുറ്റം സമ്മതിച്ചതായും, കൂടുതൽ ചോദ്യം ചെയ്യലിനായി ഇവരെ കസ്റ്റഡിയിൽ വാങ്ങുമെന്നും പോലീസ് അറിയിച്ചു.
Story Summary
A married couple and the woman’s brother have been arrested for murdering a 26-year-old man in Ballari, Karnataka. The accused allegedly lured the victim to a secluded area near a canal, strangled him, and burned his body to destroy evidence after he persistently harassed the woman for nearly a year.
