ബെംഗളൂരു : കാവേരി നദീജല തർക്കം വീണ്ടും രൂക്ഷമാകുന്നതിനിടെ കർണാടക തമിഴ്നാട്ടിലേക്ക് വെള്ളം തുറന്നുവിട്ടു (Cauvery water dispute). മൈസൂരുവിലെ കബനി അണക്കെട്ടിന്റെ ഷട്ടറുകളാണ് ഉയർത്തിയത്. സെക്കൻഡിൽ 10,000 ഘനയടി വെള്ളമാണ് തമിഴ്നാട്ടിലേക്ക് ഒഴുക്കിവിടുന്നത്. വയനാട് അടക്കമുള്ള കേരളത്തിലെ മലയോര മേഖലകളിൽ ശക്തമായ മഴ തുടരുന്ന സാഹചര്യത്തിൽ കബനി അണക്കെട്ടിലേക്ക് സെക്കൻഡിൽ 15,500 ഘനയടിയോളം വെള്ളം ഒഴുകിയെത്തിയതോടെയാണ് അണക്കെട്ട് തുറക്കാൻ അധികൃതർ നിർബന്ധിതരായത്.
നേരത്തെ, തമിഴ്നാട്ടിലെ കുറുവായ് കൃഷിക്കായി അടുത്ത 15 ദിവസത്തേക്ക് പ്രതിദിനം 3,500 ക്യുസെക്സ് വീതം ജലം വിട്ടുനൽകാൻ കാവേരി വാട്ടർ റെഗുലേഷൻ കമ്മിറ്റി (CWRC) നിർദ്ദേശം നൽകിയിരുന്നു. എന്നാൽ സംസ്ഥാനത്ത് മഴക്കുറവും വരൾച്ചയും നിലനിൽക്കുന്നുണ്ടെന്നും വെള്ളം വിട്ടുനൽകാൻ സാധിക്കില്ലെന്നും ചൂണ്ടിക്കാട്ടി കർണാടക അപ്പീൽ നൽകിയെങ്കിലും കാവേരി വാട്ടർ മാനേജ്മെന്റ് അതോറിറ്റി (CWMA) ഇത് തള്ളുകയായിരുന്നു.
ഇതിനിടെ, തമിഴ്നാടിന് വെള്ളം വിട്ടുനൽകുന്നതിനെതിരെ കർണാടകയിൽ പ്രതിഷേധം ആളിപ്പടരുകയാണ്. വിഷയം ചർച്ച ചെയ്യാൻ തമിഴ്നാട് മുഖ്യമന്ത്രി വിളിച്ച് ചേർത്ത യോഗങ്ങൾക്ക് മറുപടിയായി, തമിഴ്നാടുമായി ചർച്ചയ്ക്ക് അനുയോജ്യമായ അന്തരീക്ഷമല്ല നിലവിലുള്ളതെന്ന് കർണാടക ഉപമുഖ്യമന്ത്രി ഡി.കെ. ശിവകുമാർ വ്യക്തമാക്കി. പ്രശ്നങ്ങൾ തണുക്കുന്നതുവരെ കൂടിക്കാഴ്ച നീട്ടിവെക്കാനും ബംഗളൂരു സന്ദർശനം ഒഴിവാക്കാനും അദ്ദേഹം ആവശ്യപ്പെട്ടിട്ടുണ്ട്.
മാണ്ഡ്യ, മൈസൂരു, ശ്രീരംഗപട്ടണം എന്നിവിടങ്ങളിൽ കർഷകരുടെയും കന്നഡ സംഘടനകളുടെയും നേതൃത്വത്തിൽ വൻ പ്രതിഷേധ പ്രകടനങ്ങളാണ് നടക്കുന്നത്. തമിഴ്നാട് പ്രതിനിധികൾ കർണാടകയിൽ എത്തിയാൽ ശക്തമായി തടയുമെന്ന് സംഘടനകൾ മുന്നറിയിപ്പ് നൽകി. പ്രതിഷേധങ്ങളുടെ ഭാഗമായി ഓഗസ്റ്റ് 13-ന് സംസ്ഥാനവ്യാപകമായി ബന്ദിനും കന്നഡ സംഘടനകൾ ആഹ്വാനം ചെയ്തിട്ടുണ്ട്.
Story Summary: Amidst mounting political tension and protests, Karnataka opened the spillway gates of the Kabini dam to release 10,000 cusecs of water to Tamil Nadu following heavy inflows from Kerala. Meanwhile, pro-Kannada groups have intensified demonstrations across Mandya and Mysuru, calling for a Karnataka bandh on August 13.
