ചെന്നൈ: തമിഴ്നാട് മുഖ്യമന്ത്രി വിജയ് നായകനാകുന്ന ‘ജനനായകൻ’ റിലീസ് ദിനത്തിൽ തന്നെ ആദ്യ ഷോ കാണാൻ നടി തൃഷ കൃഷ്ണൻ തിയേറ്ററിലെത്തി. ചെന്നൈയിലെ കോയമ്പേട് റോഹിണി തിയേറ്ററിലായിരുന്നു തൃഷയുടെ സാന്നിധ്യം (Trisha Jana Nayagan FDFS). താരത്തിന്റെ വരവും സിനിമ കണ്ടശേഷമുള്ള മടങ്ങിപ്പോക്കും സമൂഹമാധ്യമങ്ങളിൽ വൈറലായിരിക്കുകയാണ്. വെള്ള ടി-ഷർട്ടും ജീൻസും ധരിച്ചെത്തിയ തൃഷയെ കാണാൻ ആരാധകർ വലിയ തോതിൽ തിയേറ്ററിന് പുറത്ത് തടിച്ചുകൂടി. സിനിമ കഴിഞ്ഞ് പുറത്തിറങ്ങിയ താരത്തെ ആരാധകർ വളഞ്ഞതോടെ സുരക്ഷാ ജീവനക്കാരുടെ സഹായത്തോടെയാണ് തൃഷ കാറിലേക്ക് എത്തിയത്. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
അതേസമയം, വിജയ് അഭിനയിക്കുന്ന അവസാന സിനിമയെന്ന നിലയിലാണ് ‘ജനനായകൻ’ പ്രേക്ഷകർക്കിടയിൽ പ്രത്യേക ശ്രദ്ധ നേടുന്നത്. ചിത്രം കണ്ടിറങ്ങിയ ശേഷം മാധ്യമങ്ങളോട് പ്രതികരിച്ച തൃഷയുടെ അമ്മ ഉമാ കൃഷ്ണൻ, സിനിമ വളരെ ഇഷ്ടപ്പെട്ടെന്നും വിജയ് ഇനി സിനിമകളിൽ അഭിനയിക്കില്ലെന്ന കാര്യം തന്നെ വിഷമിപ്പിക്കുന്നുവെന്നും പറഞ്ഞു.
Actor Trisha arrives at Rohini Theatre to watch TN CM Vijay starrer Jana Nayagan on the day of its mega release #CMJosephVijay #jananayagan pic.twitter.com/pKJ4DFQxWV
— Radhika Ramaswamy (@radhika1705) July 23, 2026
“ചിത്രം വളരെ നന്നായി ആസ്വദിച്ചു. വിജയ്യുടെ അവസാന ചിത്രമാണെന്നത് ദുഃഖകരമാണ്. അദ്ദേഹത്തെ ഇനി സിനിമയിൽ കാണാനാകില്ലെന്നത് വിഷമമുണ്ട്. അദ്ദേഹത്തെ മിസ് ചെയ്യും,” എന്നാണ് ഉമാ കൃഷ്ണൻ പ്രതികരിച്ചത്. വ്യാഴാഴ്ചയാണ് ‘ജനനായകൻ’ ലോകമെമ്പാടുമുള്ള തിയേറ്ററുകളിൽ റിലീസ് ചെയ്തത്. കേരളത്തിൽ രാവിലെ ആറുമണിക്കായിരുന്നു ആദ്യ പ്രദർശനം. ഏറെ നാളത്തെ കാത്തിരിപ്പിനൊടുവിലാണ് ചിത്രം പ്രേക്ഷകരിലേക്ക് എത്തിയത്.
എച്ച്. വിനോദ് സംവിധാനം ചെയ്ത ചിത്രം കെ.വി.എൻ. പ്രൊഡക്ഷൻസിന്റെ ബാനറിൽ വെങ്കട് കെ. നാരായണയാണ് നിർമിച്ചിരിക്കുന്നത്. ബോബി ഡിയോൾ വില്ലൻ കഥാപാത്രത്തെ അവതരിപ്പിക്കുന്ന ചിത്രത്തിൽ പൂജ ഹെഗ്ഡെ, മമിത ബൈജു, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.
Summary: Actress Trisha Krishnan watched the first-day-first-show of Jana Nayagan at Chennai’s Rohini Theatre. After the screening, her mother Uma Krishnan said she enjoyed the film and expressed sadness that it is Vijay’s final movie before stepping away from cinema.
