ഹൈദരാബാദിൽ നിന്ന് ലണ്ടൻ ഹീത്രു വിമാനത്താവളത്തിലേക്ക് പുറപ്പെട്ട ബ്രിട്ടീഷ് എയർവേസ് (BA276) വിമാനത്തിലെ മൂന്ന് പൈലറ്റുമാർക്കും പറക്കുന്നതിനിടയിൽ ഭക്ഷ്യവിഷബാധയേറ്റതായി സംശയം (British Airways Pilots Fall Ill After Hyderabad Stopover). ഹൈദരാബാദിൽ തങ്ങിയ സമയത്ത് ഉണ്ടായ ഭക്ഷ്യവിഷബാധയെത്തുടർന്നാണ് പൈലറ്റുമാർക്ക് ശാരീരിക അസ്വസ്ഥത അനുഭവപ്പെട്ടത്. സംഭവത്തിൽ എയർലൈൻ അധികൃതർ ഔദ്യോഗിക അന്വേഷണം പ്രഖ്യാപിക്കുകയും, ഹൈദരാബാദിലെ ക്രൂ അക്കോമഡേഷനും ഹോട്ടൽ ക്രമീകരണങ്ങളും പരിശോധിച്ചുവരികയാണെന്ന് അറിയിക്കുകയും ചെയ്തു.
റിപ്പോർട്ടുകൾ പ്രകാരം, വിമാനം 30,000 അടി ഉയരത്തിൽ പറക്കുന്നതിനിടയിലാണ് ആദ്യ പൈലറ്റിന് ഗുരുതരമായ ശാരീരിക അസ്വസ്ഥതയുണ്ടാവുകയും ഡ്യൂട്ടി നിർവഹിക്കാൻ കഴിയാത്ത സാഹചര്യം ഉണ്ടാവുകയും ചെയ്തത്. തുടർന്ന് അദ്ദേഹത്തിന് വിമാനത്തിൽ വെച്ച് തന്നെ ഓക്സിജൻ നൽകുകയും, ലണ്ടനിൽ എത്തിയ ഉടൻ തന്നെ അടിയന്തര വൈദ്യസഹായം ലഭ്യമാക്കുകയും ചെയ്തു. മറ്റ് രണ്ട് പൈലറ്റുമാർക്കും ശാരീരിക അസ്വസ്ഥതകൾ ഉണ്ടായിരുന്നെങ്കിലും അവർ യാത്രാമധ്യേ വിമാനത്തിന്റെ നിയന്ത്രണം ഏറ്റെടുത്ത് സുരക്ഷിതമായി ലാൻഡ് ചെയ്യുകയായിരുന്നു. എങ്കിലും യാത്ര പുരോഗമിക്കവെ ഇവരുടെ ആരോഗ്യനിലയും വഷളായിരുന്നു.
യാത്രയ്ക്ക് മുൻപ് ഹൈദരാബാദിലെ ഹോട്ടൽ ലോഞ്ചിൽ വെച്ച് മൂന്ന് പൈലറ്റുമാരും ഒന്നിച്ച് പ്രഭാതഭക്ഷണം കഴിച്ചിരുന്നു. കൂടാതെ പുറത്തുനിന്നുള്ള കമ്പനി നൽകിയ പാക്ക് ചെയ്ത കുടിവെള്ളവുമാണ് ഇവർ ഉപയോഗിച്ചത്. ഭക്ഷണമാണോ അതോ കുടിവെള്ളമാണോ പ്രശ്നമായതെന്ന് കണ്ടെത്താൻ അന്വേഷണ സംഘം പരിശോധന നടത്തിവരുന്നു. സംഭവത്തെ തുടർന്ന് ജീവനക്കാരുടെ സുരക്ഷയ്ക്ക് മുൻഗണന നൽകുമെന്നും, ഹൈദരാബാദിലെ ഹോട്ടൽ സൗകര്യങ്ങൾ ഉൾപ്പെടെയുള്ളവ പുനഃപരിശോധിക്കുകയാണെന്നും ബ്രിട്ടീഷ് എയർവേസ് വ്യക്തമാക്കി.
Summary: British Airways has launched an investigation after all three pilots operating a flight from Hyderabad to London fell ill mid-air due to suspected food poisoning following an overnight stopover, forcing the airline to review its local hotel and crew accommodation arrangements.
