അങ്കമാലി: കുടലിലേക്കുള്ള രക്തപ്രവാഹം തടസ്സപ്പെടുന്ന അതീവ ഗുരുതരമായ പ്രകൃതത്തിലുള്ള അക്യൂട്ട് മിസെന്ററിക് ഇസ്കീമിയ (Acute Mesenteric Ischemia) ബാധിച്ച രോഗിയെ രണ്ട് സങ്കീർണ്ണ ശസ്ത്രക്രിയകളിലൂടെ ജീവിതത്തിലേക്ക് തിരികെ കൊണ്ടുവന്ന് അപ്പോളോ അഡ്ലക്സ് ആശുപത്രി (Apollo adlux hospital). കടുത്ത വയറുവേദനയെ തുടർന്ന് അത്യാഹിത വിഭാഗത്തിൽ പ്രവേശിപ്പിക്കപ്പെട്ട അബ്ദുൾ റഹ്മാൻ എന്ന രോഗിക്കാണ് ആശുപത്രിയിലെ വിദഗ്ധ മെഡിക്കൽ സംഘം പുതുജീവൻ നൽകിയത്.
ആശുപത്രിയിൽ നടത്തിയ വിശദമായ പരിശോധനയിലാണ് കുടലിലേക്ക് രക്തമെത്തിക്കുന്ന പ്രധാന ധമനിയിൽ ഗുരുതരമായ തടസ്സം കണ്ടെത്തിയത്. രക്തയോട്ടം നിലച്ചതോടെ രോഗിയുടെ ചെറുകുടലിന്റെ ഭൂരിഭാഗവും ജീവനറ്റ നിലയിലായിരുന്നു. തുടർന്ന് സർജിക്കൽ ഗ്യാസ്ട്രോഎന്ററോളജി വിഭാഗം കൺസൾട്ടന്റ് ഡോ. കാർത്തിക് കുൽശ്രേസ്തയുടെ നേതൃത്വത്തിലുള്ള മെഡിക്കൽ സംഘം രോഗിയെ അടിയന്തര ശസ്ത്രക്രിയക്ക് വിധേയനാക്കി. ശസ്ത്രക്രിയയിലൂടെ നശിച്ചുപോയ കുടലിന്റെ ഭാഗങ്ങൾ നീക്കം ചെയ്യുകയും, അവശേഷിച്ച 50-60 സെന്റീമീറ്റർ മാത്രം വരുന്ന ചെറുകുടൽ വിദഗ്ധമായി സംരക്ഷിക്കുകയും ചെയ്തു.
ചെറുകുടലിന്റെ വലിയൊരു ഭാഗം നീക്കം ചെയ്യേണ്ടി വന്നതിനാൽ രോഗിക്ക് ആഹാരത്തിൽ നിന്നുള്ള പോഷകങ്ങൾ ആഗിരണം ചെയ്യാൻ സാധിക്കാത്ത സാഹചര്യം ഉടലെടുത്തു. ഈ പ്രതിസന്ധി മറികടക്കാൻ ഇന്റസ്റ്റൈനൽ റീഹാബിലിറ്റേഷൻ (Intestinal Rehabilitation) ചികിത്സാരീതി ആരംഭിച്ചു. കുടലിന് വിശ്രമം നൽകുന്നതിനായി വയറ്റിൽ താൽക്കാലികമായി ‘സ്റ്റോമ’ (Stoma) നിർമ്മിക്കുകയും ‘ഹോം പാരന്ററൽ ന്യൂട്രിഷൻ’ (HPN) വഴി വീട്ടിൽ വെച്ച് തന്നെ സിരകളിലൂടെ പൂർണ്ണ പോഷണം നൽകുകയും ചെയ്തു. കൂടാതെ ദഹനരസങ്ങൾ വീണ്ടും അവശേഷിക്കുന്ന കുടലിലേക്ക് എത്തിച്ച് പോഷകങ്ങൾ ആഗിരണം ചെയ്യിക്കുന്ന ‘ബൈൽ റീഫീഡിംഗ്’ (Bile Refeeding) ചികിത്സയും വിജയകരമായി നടപ്പിലാക്കി.
രോഗിയുടെ ആരോഗ്യനില മെച്ചപ്പെട്ടതിനെ തുടർന്ന് രണ്ടാംഘട്ട ശസ്ത്രക്രിയയിലൂടെ താൽക്കാലികമായി ഉണ്ടാക്കിയ സ്റ്റോമ നീക്കം ചെയ്യുകയും, അവശേഷിച്ച ചെറുകുടലിനെ വൻകുടലുമായി വിജയകരമായി കൂട്ടിയോജിപ്പിക്കുകയും ചെയ്തു. നിലവിൽ രോഗി പൂർണ്ണ ആരോഗ്യവാനായി സാധാരണ ഭക്ഷണക്രമത്തിലേക്കും ജീവിതത്തിലേക്കും മടങ്ങിയെത്തി. സർജിക്കൽ ഗ്യാസ്ട്രോഎന്ററോളജി അസോസിയേറ്റ് കൺസൾട്ടന്റ് ഡോ. സോനു സെബാസ്റ്റ്യൻ, ജനറൽ സർജൻ ഡോ. വിനയ് രാമചന്ദ്രൻ എന്നിവരും ചികിത്സയ്ക്ക് നേതൃത്വം നൽകി.
Story Summary: Apollo Adlux Hospital successfully saved the life of a patient diagnosed with Acute Mesenteric Ischemia through two complex surgeries and advanced Intestinal Rehabilitation. Led by Dr. Karthik Kulshrestha, the surgical team removed the damaged small intestine, preserved the remaining portion, and utilized Home Parenteral Nutrition (HPN) and Bile Refeeding to restore the patient’s digestive system to normalcy.
