തന്റെ കരിയറിലെ എക്കാലത്തെയും മികച്ച ചിത്രങ്ങളിലൊന്നായ ‘കിരീടം’ 4K പ്രിവ്യൂ ഷോയ്ക്കിടെ വികാരാധീനനായി സൂപ്പർസ്റ്റാർ മോഹൻലാൽ. ചിത്രം റീ-റിലീസിന് മുന്നോടിയായി ആരാധകരോട് സംസാരിക്കവെയാണ്, കൂടെ അഭിനയിച്ച് ഇന്ന് നമ്മെ വിട്ടുപിരിഞ്ഞ പ്രിയപ്പെട്ട സഹപ്രവർത്തകരെ ഓർത്ത് താരം വിതുമ്പിയത്. തനിക്ക് ആദ്യമായി ദേശീയ പുരസ്കാരം നേടിക്കൊടുത്ത ചിത്രത്തിന്റെ സംവിധായകൻ സിബി മലയിലിന് അദ്ദേഹം നന്ദി അറിയിച്ചു. (Mohanlal on Kireedam)
“എന്റെ 48 വർഷത്തെ അഭിനയജീവിതത്തിൽ ഏറ്റവും എടുത്തുപറയാവുന്ന സിനിമകളിലൊന്നാണ് കിരീടം. എനിക്ക് ആദ്യമായി ദേശീയ പുരസ്കാരം ലഭിച്ച ചിത്രം. എന്റെ രണ്ടാമത്തെ ദേശീയ പുരസ്കാരവും സിബിയുടെ (സിബി മലയിൽ) സിനിമയിലായിരുന്നു. 37 വർഷങ്ങൾക്ക് ശേഷവും ഈ സിനിമ കാണുമ്പോൾ വല്ലാത്തൊരു വികാരമാണ്. കൂടെയുണ്ടായിരുന്ന ഒരുപാട് പേർ ഇന്ന് നമ്മളെ വിട്ടുപോയി. ഇങ്ങനെയൊരു സിനിമയെടുക്കാൻ ഇനി അങ്ങനെയുള്ള ആളുകളൊന്നും നമ്മുടെ കൂടെയില്ലല്ലോ എന്ന് ഞാൻ സിബിയോട് ചോദിച്ചുപോയി. അതിന്റെ സങ്കടമുണ്ട്,” മോഹൻലാൽ പറഞ്ഞു.
37 വർഷങ്ങൾക്ക് മുൻപുള്ള പരിമിതമായ സൗകര്യങ്ങൾ വെച്ച് ഇങ്ങനെയൊരു ചിത്രം നിർമ്മിക്കാൻ സാധിച്ചത് വലിയൊരു കാര്യമാണെന്നും അദ്ദേഹം കൂട്ടിച്ചേർത്തു. 1989-ൽ പുറത്തിറങ്ങിയ ഈ വിസ്മയ ചിത്രം ഡോൾബി അറ്റ്മോസിൽ 4K ദൃശ്യമികവോടെയാണ് ഈ വെള്ളിയാഴ്ച വീണ്ടും തിയേറ്ററുകളിലെത്തുന്നത്. ലോഹിതദാസിന്റെ തിരക്കഥയിൽ സിബി മലയിൽ ഒരുക്കിയ കിരീടം, മലയാള സിനിമയുടെ ചരിത്രത്തിലെ തന്നെ ഏറ്റവും മികച്ച ചിത്രങ്ങളിൽ ഒന്നായാണ് കണക്കാക്കപ്പെടുന്നത്.
തിലകൻ, മാമുക്കോയ, ഒടുവിൽ ഉണ്ണികൃഷ്ണൻ, മുരളി, കവിയൂർ പൊന്നമ്മ, മോഹൻരാജ് (കീരിക്കാടൻ ജോസ്) തുടങ്ങി മൺമറഞ്ഞ ഒരു വലിയ താരനിര തന്നെ ഈ ചിത്രത്തിൽ അവിസ്മരണീയ പ്രകടനം കാഴ്ചവെച്ചിട്ടുണ്ട്. സെവൻ ആർട്സ് ഇന്റർനാഷണൽ ലിമിറ്റഡ് എൻ.എഫ്.ഡി.സിയുമായി സഹകരിച്ചാണ് ചിത്രം അവതരിപ്പിക്കുന്നത്. സേതുമാധവൻ എന്ന കഥാപാത്രത്തിലൂടെ മോഹൻലാൽ പ്രേക്ഷകഹൃദയങ്ങളിൽ കുടിയിരുന്ന ചിത്രം വീണ്ടും തിയേറ്ററുകളിൽ വലിയ തരംഗം സൃഷ്ടിക്കുമെന്ന പ്രതീക്ഷയിലാണ് ആരാധകർ.
Summary: Actor Mohanlal became emotional during the 4K preview show of his classic film ‘Kireedam’, remembering the many legendary co-stars who are no longer with us. Expressing his deep gratitude to director Sibi Malayil, Mohanlal reminisced about the 37-year-old masterpiece, remarking that the legendary cast and the unique emotional resonance of the film are irreplaceable in today’s cinematic landscape as it prepares for a grand re-release.
