ബംഗളൂരു: തിരക്കേറിയ ദേശീയപാതയിൽ വച്ച് കാർ യാത്രക്കാരായ കുടുംബത്തിന് നേരെ ഗുണ്ടാസംഘത്തിന്റെ ക്രൂരമായ ആക്രമണം. ബംഗളൂരു-മൈസൂരു എക്സ്പ്രസ്വേയിലെ മദ്ദൂർ പരിധിയിൽ വച്ചുണ്ടായ ഈ ദാരുണ സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. മറ്റൊരു വാഹനത്തിന്റെ ഡാഷ്കാം ക്യാമറയിലാണ് അക്രമത്തിന്റെ ഭയപ്പെടുത്തുന്ന ദൃശ്യങ്ങൾ പതിഞ്ഞത്.(Family Attacked By Mob On Bengaluru Mysuru Expressway Dashcam Video Viral)
ഹൈവേയുടെ നടുവിലിട്ട് ഒരു നീല കാർ തടഞ്ഞുനിർത്തിയ ഗുണ്ടാസംഘം, അതിന്റെ വാതിലുകൾ ബലമായി തുറന്ന് ഡ്രൈവിംഗ് സീറ്റിലിരുന്ന വ്യക്തിയെ ക്രൂരമായി മർദ്ദിക്കുന്നത് ദൃശ്യങ്ങളിൽ വ്യക്തമാണ്. സ്ത്രീയും കുട്ടിയുമടങ്ങുന്ന നാലോ അഞ്ചോ പേരാണ് കാറിലുണ്ടായിരുന്നത്. കാറിലുണ്ടായിരുന്നവരെ അക്രമികൾ മാരകായുധങ്ങൾ ഉപയോഗിച്ചാണ് മർദ്ദിച്ചത്. ഒടുവിൽ കാറിലുണ്ടായിരുന്ന സ്ത്രീ പുറത്തേക്കോടി വന്ന് അക്രമികളോട് കൈകൂപ്പി അപേക്ഷിക്കുന്നതും ഡ്രൈവറെ റോഡിലേക്ക് വലിച്ചിഴച്ചിട്ട് മർദ്ദിക്കുന്നതും ദൃശ്യങ്ങളിലുണ്ട്.
റോഡിലൂടെ പോയ മറ്റ് യാത്രക്കാർ ഇടപെട്ടാണ് ഒടുവിൽ രംഗം ശാന്തമാക്കിയത്. ആക്രമണത്തിന് പിന്നിലെ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. ദൃശ്യങ്ങൾ വൈറലായതോടെ വൻ ജനരോഷമാണ് ഉയരുന്നത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
Story Summary
A shocking video captured on a dashcam shows a mob mercilessly attacking a family inside their car on the busy Bengaluru-Mysuru Expressway near Maddur. The group of men blocked the car, forced the doors open, and assaulted the driver with metal objects in front of a woman and child. Passersby eventually intervened, and the police are investigating the incident.
