റിപ്പോർട്ട്: അൻവർ ഷരിഫ്
കൊണ്ടോട്ടി: സംസ്ഥാനവ്യാപകമായി ആഭ്യന്തര വകുപ്പ് നടപ്പിലാക്കുന്ന ലഹരിവിരുദ്ധ കർശന സുരക്ഷാ പദ്ധതിയായ ‘ഓപ്പറേഷൻ തൂഫാൻ: ദി നാർക്കോ ഹണ്ട്’ (Operation Toofan: The Narco Hunt) ദൗത്യത്തിന്റെ ഭാഗമായി കൊണ്ടോട്ടിയിൽ മയക്കുമരുന്ന് സംഘം പിടിയിൽ (Kondotty Drug Bust). കരിപ്പൂർ അന്താരാഷ്ട്ര വിമാനത്താവള പരിസരം കേന്ദ്രീകരിച്ച് നടത്തിയ ലഹരിവിരുദ്ധ സ്പെഷ്യൽ ഡ്രൈവിനിടയിലാണ് മയക്കുമരുന്ന് വിൽപ്പന നടത്തിവന്ന ലഹരിക്കടത്ത് സംഘത്തിലെ രണ്ട് പ്രധാന കണ്ണികളെ പോലീസ് അറസ്റ്റ് ചെയ്തത്. വാഴക്കാട് നൂഞ്ഞിക്കര സ്വദേശി വലിയ ചോലയിൽ അസറുദ്ദീൻ (26), തിരൂരങ്ങാടി മമ്പുറം സ്വദേശി ചുക്കാൻ മേലോട്ടിൽ വീട്ടിൽ മുഹമ്മദ് ഫാസിൽ (31) എന്നിവരാണ് കൊണ്ടോട്ടി പോലീസിന്റെയും ഡാൻസാഫ് സംഘത്തിന്റെയും വലയിലായത്.
പ്രതികളിൽ നിന്ന് വിൽപ്പനയ്ക്കായി കാറിൽ സൂക്ഷിച്ചിരുന്ന 2.5 ഗ്രാമോളം നിരോധിത മാരക സിന്തറ്റിക് മയക്കുമരുന്നായ എം.ഡി.എം.എയും 20.5 ഗ്രാം കഞ്ചാവും പോലീസ് പിടിച്ചെടുത്തു. ലഹരിവസ്തുക്കൾ കൃത്യമായി അളന്ന് തിരിച്ച് വിതരണം ചെയ്യാൻ ഉപയോഗിച്ചിരുന്ന ഡിജിറ്റൽ ഇലക്ട്രിക് ത്രാസ്, മയക്കുമരുന്ന് വിറ്റ വകയിൽ ലഭിച്ച പണം, ഇവർ സഞ്ചരിച്ചിരുന്ന കാറും പോലീസ് കസ്റ്റഡിയിലെടുത്തിട്ടുണ്ട്. മലപ്പുറം ജില്ലാ പോലീസ് മേധാവി ചൈത്രാ തെരേസാ ജോൺ ഐ.പി.എസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ കൊണ്ടോട്ടി എ.എസ്.പി കാർത്തിക് ബാലകുമാർ, ഇൻസ്പക്ടർ അനുദാസ് കെ, സബ് ഇൻസ്പക്ടർ കൃഷ്ണ പ്രസാദ് എന്നിവരുടെ നേതൃത്വത്തിലാണ് പ്രത്യേക പരിശോധന സംഘം പ്രതികളെ വലയിലാക്കിയത്. കരിപ്പൂർ വിമാനത്താവള മേഖലയും അന്താരാഷ്ട്ര മയക്കുമരുന്ന് മാഫിയകളും തമ്മിലുള്ള ബന്ധത്തെക്കുറിച്ച് പോലീസ് അന്വേഷണം വ്യാപിപ്പിച്ചിട്ടുണ്ട്.
Summary: As part of the Kerala Police’s newly launched statewide anti-drug enforcement drive, “Operation Toofan: The Narco Hunt,” the Kondotty police and the District Anti-Narcotics Special Action Force (DANSAF) arrested two members of an active drug-peddling network near Calicut International Airport. The accused, Identified as Azharuddin (26) from Vazhakkad and Muhammad Fazil (31) from Tirurangadi, were caught during a late-night interception based on confidential intelligence received by Malappuram District Police Chief Chaitra Teresa John IPS.
