ന്യൂഡൽഹി: പശ്ചിമേഷ്യൻ യുദ്ധപ്രതിസന്ധി കടലിലും കനക്കുന്നതിനിടെ, ഒമാൻ തീരത്ത് വെച്ച് മിസൈലാക്രമണത്തിന് ഇരയായ വിദേശ എണ്ണക്കപ്പലിൽ നിന്ന് 24 ഇന്ത്യൻ നാവികരെ അത്ഭുതകരമായി രക്ഷപെടുത്തി (MT Marivex Oil Tanker Rescue). ഇന്ത്യൻ കോസ്റ്റ് ഗാർഡും ഒമാൻ സൈന്യവും സംയുക്തമായി നടത്തിയ അതിവേഗ രക്ഷാപ്രവർത്തനത്തിലൂടെയാണ് നാവികർക്ക് പുതുജീവൻ ലഭിച്ചത്. പലാവു രാജ്യത്തിന്റെ പതാക ഘടിപ്പിച്ച ‘എം.ടി മാരിവെക്സ്’എന്ന എണ്ണക്കപ്പലിന് നേരെയാണ് തിങ്കളാഴ്ച മിസൈലാക്രമണമുണ്ടായത്. ആക്രമണത്തിന് പിന്നാലെ കപ്പലിന് തീപിടിച്ചതായും വലിയ സുരക്ഷാ ഭീഷണിയുണ്ടെന്നും സന്ദേശം ലഭിച്ചയുടൻ മുംബൈയിലെ മാരിടൈം റെസ്ക്യൂ കോർഡിനേഷൻ സെന്റർ ഒമാൻ അധികൃതരുമായി അടിയന്തരമായി ബന്ധപ്പെടുകയായിരുന്നു.
Swift response by #MRCC #Mumbai following missile attack on MT Marivex in #OmanSRR.
On receiving information, MRCC Mumbai immediately coordinated with OMSC Oman, ensuring the safe rescue of 24 #Indian crew by #Oman Navy helicopters.@IndiaCoastGuard remains steadfast in its… pic.twitter.com/ULDjzgEK4g
— Indian Coast Guard (@IndiaCoastGuard) June 9, 2026
തുടർന്ന് ഒമാൻ നാവികസേനയുടെ അത്യാധുനിക ഹെലികോപ്റ്ററുകൾ കപ്പലിന്റെ ഡെക്കിന് മുകളിലെത്തി സാഹസികമായാണ് ഇന്ത്യൻ ജീവനക്കാരെ ഓരോരുത്തരെയായി എയർലിഫ്റ്റ് ചെയ്ത് സുരക്ഷിത സ്ഥാനങ്ങളിലേക്ക് മാറ്റിയത്. ഇതിന്റെ ഞെട്ടിക്കുന്ന ദൃശ്യങ്ങൾ ഇന്ത്യൻ കോസ്റ്റ് ഗാർഡ് സാമൂഹിക മാധ്യമങ്ങളിലൂടെ പുറത്തുവിട്ടു. ഇന്ത്യയിലെ കാർവാറിൽ നിന്നും ഒമാനിലെ ദുഖം തുറമുഖത്തേക്ക് എണ്ണയുമായി പോവുകയായിരുന്ന കപ്പലാണ് ആക്രമിക്കപ്പെട്ടത്. കപ്പലിലുണ്ടായിരുന്ന 24 ഇന്ത്യൻ നാവികരും പൂർണ്ണ സുരക്ഷിതരാണെന്നും ഇവരെ അടിയന്തരമായി നാട്ടിലെത്തിക്കാനുള്ള നടപടികൾ സ്വീകരിച്ചതായും ഷിപ്പിംഗ് മന്ത്രാലയം ഡയറക്ടർ ഓപേഷ് കുമാർ ശർമ്മ അറിയിച്ചു. അന്താരാഷ്ട്ര കപ്പൽ ചാലുകളിൽ ഇന്ത്യൻ നാവികരുടെ ജീവൻ സംരക്ഷിക്കാൻ അയൽരാജ്യങ്ങളുമായി ചേർന്ന് കോസ്റ്റ് ഗാർഡ് ജാഗ്രതയോടെ പ്രവർത്തിക്കുന്നുണ്ടെന്ന് സൈന്യം വ്യക്തമാക്കി.
Summary: In a swift international operation, the Indian Coast Guard, coordinating with Omani authorities, safely rescued 24 Indian seafarers from a Palau-flagged oil tanker, MT Marivex, which caught fire following a missile attack off the coast of Oman on Monday. Upon receiving the distress signal, Mumbai’s Maritime Rescue Coordination Centre (MRCC) activated communication channels with Oman maritime control, enabling Oman Navy helicopters to execute a precise air evacuation directly from the burning vessel’s deck.
