കൊച്ചി: ‘ബീനാ കണ്ണൻ കൊറ്റ്യൂർ മിസ് യൂണിവേഴ്സ് കേരള 2026’ (Miss Universe Kerala 2026) കിരീടം മാവേലിക്കര സ്വദേശി കെസിയ ലിസ് മെജോ സ്വന്തമാക്കി (Miss Universe Kerala 2026 winner Kezia Liz Mejo). കൊച്ചി ഗ്രാൻഡ് ഹയാത്ത് ഹോട്ടലിൽ വെച്ച് നടന്ന ആവേശകരമായ ഗ്രാൻഡ് ഫിനാലെയിലാണ് കെസിയ സുവർണ്ണ കിരീടം ചൂടിയത്. ദേശീയ തലത്തിൽ നടക്കുന്ന പ്രമുഖ സൗന്ദര്യമത്സരമായ ‘മിസ് യൂണിവേഴ്സ് ഇന്ത്യ’യിൽ കേരളത്തിന്റെ ഔദ്യോഗിക പ്രതിനിധിയായി ഇനി കെസിയ പങ്കെടുക്കും. ഗ്ലാമാനന്ദ് എന്റർടൈൻമെന്റ് പ്രൈവറ്റ് ലിമിറ്റഡ് ആണ് ദേശീയ തലത്തിലുള്ള മിസ് യൂണിവേഴ്സ് ഇന്ത്യ മത്സരം സംഘടിപ്പിക്കുന്നത്.
മാവേലിക്കര സ്വദേശികളായ മെജോ എബ്രഹാമിന്റെയും സുജ മെജോയുടെയും മകളാണ് 19-കാരിയായ കെസിയ ലിസ് മെജോ. നിലവിൽ ബെംഗളൂരുവിൽ നിയമപഠനം (Law Student) നടത്തുന്ന കെസിയ ഇപ്പോൾ കുടുംബത്തോടൊപ്പം കൊച്ചിയിലാണ് താമസം. മുൻപ് 2024-ൽ ‘മിസ് ടീൻ ഇന്ത്യ’ (Miss Teen India) പട്ടം കരസ്ഥമാക്കിയിട്ടുള്ള കെസിയ, ലോകത്തിലെ ഏറ്റവും വലിയ കൗമാര സൗന്ദര്യമത്സരത്തിൽ ഇന്ത്യയെ പ്രതിനിധീകരിച്ച് ശ്രദ്ധ നേടിയിട്ടുണ്ട്. കേരളത്തിൽ നിന്നുള്ള ആദ്യ മിസ് യൂണിവേഴ്സ് ആകുക എന്നതാണ് തന്റെ ലക്ഷ്യമെന്ന് കെസിയ വ്യക്തമാക്കി.
ശക്തമായ പോരാട്ടം നടന്ന മത്സരത്തിൽ തൃശൂർ സ്വദേശി മാളവിക രാജേന്ദ്രൻ ദേവ് ഫസ്റ്റ് റണ്ണറപ്പായി തിരഞ്ഞെടുക്കപ്പെട്ടു. രാജേന്ദ്രൻ കെ.എസ് – പ്രിയ പി.കെ എന്നിവരുടെ മകളാണ് മാളവിക. കോട്ടയം സ്വദേശി ലിസ് ജെയ്മോൻ ജേക്കബ് ആണ് സെക്കൻഡ് റണ്ണറപ്പ് പദവി സ്വന്തമാക്കിയത്. ക്വീൻ ഫ്രെയിം സ്റ്റുഡിയോസ് സംഘടിപ്പിച്ച ഈ പരിപാടിയുടെ ടൈറ്റിൽ സ്പോൺസർ ബീനാ കണ്ണൻ കൊറ്റ്യൂറും, പവർഡ് ബൈ പാർട്ണർ ഫ്രാൻസിസ് ആലുക്കാസുമാണ്.
മിസ് യൂണിവേഴ്സ് ഇന്ത്യ ചെയർമാൻ നിഖിൽ ആനന്ദ്, ഫ്രാഞ്ചയ്സ് ഓപ്പറേഷൻസ് ഡയറക്ടർ അംജാദ് ഖാൻ, മിസ് യൂണിവേഴ്സ് ഇന്ത്യ 2025 വിജയി മണിക വിശ്വകർമ്മ, മുൻ മിസ് യൂണിവേഴ്സ് കേരള ഐശ്വര്യ ശ്രീനിവാസൻ, മിസ് യൂണിവേഴ്സ് ഇന്ത്യ 2024 വിജയി റിയ സിംഗ, നാഷണൽ അവാർഡ് ജേതാവും സിനിമാ താരവുമായ അപർണ ബാലമുരളി എന്നിവരടങ്ങുന്ന പ്രമുഖ പാനലാണ് വിജയികളെ തിരഞ്ഞെടുത്തത്.
അർച്ചന രവിയാണ് മിസ് യൂണിവേഴ്സ് കേരളയുടെ ഡയറക്ടർ. ഖജാ റാവുത്തർ പരിപാടിയുടെ ഔദ്യോഗിക സ്റ്റൈലിസ്റ്റായും പ്രശസ്ത കൊറിയോഗ്രാഫർ ഷാം ഖാൻ ഷോ ഡയറക്ടറായും കൊറിയോഗ്രാഫറായും പ്രവർത്തിച്ചു.
Story Summary: Kezia Liz Mejo from Mavelikara has been crowned Miss Teen Diva and Miss Universe Kerala 2026 at a grand finale held at Grand Hyatt, Kochi. The 19-year-old law student will now officially represent Kerala in the upcoming Miss Universe India pageant. Thrissur’s Malavika Rajendran Dev and Kottayam’s Liz Jaymon Jacob secured first and second runner-up titles respectively.
