കൊച്ചി: താരസംഘടനയായ ‘അമ്മ’യിൽ (AMMA) ഭാരവാഹികൾ തമ്മിലുള്ള ചേരിപ്പോരും തർക്കങ്ങളും രൂക്ഷമാകുന്നു (Ansiba Hassan complaint Tini Tom). നടൻ ടിനി ടോമിനെതിരെ നൽകിയ പരാതിയിൽ നേരിട്ട് ഹാജരാകാൻ നടി അൻസിബ ഹസന് സംഘടന നിർദ്ദേശം നൽകി. ജൂൺ ഒന്നിനോ മൂന്നിനോ എക്സിക്യൂട്ടീവ് കമ്മിറ്റിക്ക് മുന്നിൽ നേരിട്ടെത്തി തെളിവുകൾ സമർപ്പിക്കാനാണ് ആവശ്യപ്പെട്ടിരിക്കുന്നത്. എന്നാൽ, നിലവിലെ കമ്മിറ്റിക്ക് മുന്നിൽ ഹാജരാകുന്നതിന് പകരം തന്നെ നിഷ്പക്ഷമായി കേൾക്കാൻ പ്രത്യേക സമിതി രൂപീകരിക്കണമെന്നാണ് അൻസിബ സംഘടനയ്ക്ക് നൽകിയ മറുപടി. രമേഷ് പിഷാരടി, മാലാ പാർവതി, ധ്യാൻ ശ്രീനിവാസൻ എന്നിവർ ഉൾപ്പെടുന്ന സമിതിക്ക് മുന്നിൽ മാത്രമേ ഹാജരാകൂ എന്ന നിലപാടിലാണ് താരം. ജൂൺ ഒന്നിനോ അല്ലെങ്കിൽ ഏഴാം തീയതിക്ക് ശേഷമോ ഹാജരാകാമെന്നും അൻസിബ സംഘടനയെ അറിയിച്ചിട്ടുണ്ട്. കൂടാതെ, ലക്ഷ്മിപ്രിയ നൽകിയ പരാതിയിൽ തന്നെ വിളിപ്പിച്ച വനിതാ പൊലീസ് ഉദ്യോഗസ്ഥയ്ക്കെതിരെയും അൻസിബ ഇപ്പോൾ പരാതി നൽകിയിട്ടുണ്ട്.
അമ്മ പ്രസിഡന്റ് ശ്വേതാ മേനോനും ജനറൽ സെക്രട്ടറി കുക്കു പരമേശ്വരനും തമ്മിൽ കഴിഞ്ഞ ദിവസം ചർച്ചകൾ നടത്തിയെങ്കിലും സംഘടനയ്ക്കുള്ളിലെ ഭിന്നത പരിഹരിക്കാനായിട്ടില്ല. ഇരുവരും രണ്ട് ചേരികളിലാവുകയും മറ്റ് ഭാരവാഹികൾക്കിടയിൽ ഉപഗ്രൂപ്പുകൾ രൂപപ്പെടുകയും ചെയ്തതോടെ സംഘടനയുടെ പ്രവർത്തനം പൂർണ്ണമായും സ്തംഭിച്ച അവസ്ഥയിലാണ്.
ടിനി ടോമിനും ലക്ഷ്മിപ്രിയക്കുമെതിരെ വംശീയ അധിക്ഷേപം അടക്കമുള്ള ഗുരുതര ആരോപണങ്ങൾ ഉന്നയിച്ച് ജോയിന്റ് സെക്രട്ടറിയായിരുന്ന അൻസിബ ഹസൻ കഴിഞ്ഞ ദിവസം രാജിവെച്ചിരുന്നു. ഇതിന് പിന്നാലെ ഭാരവാഹികൾ പരസ്പരം സാമ്പത്തിക തട്ടിപ്പ് ആരോപണങ്ങളുമായി രംഗത്തെത്തിയതോടെയാണ് രംഗം വഷളായത്. ടിനി ടോമിനെതിരെ ശക്തമായ നിയമനടപടികളുമായി മുന്നോട്ട് പോകാനാണ് അൻസിബയുടെ തീരുമാനം.
ശ്വേതയും കുക്കുവും തമ്മിൽ സംസാരിച്ച് പ്രശ്നങ്ങൾ പരിഹരിക്കാൻ ശ്രമിക്കുന്നുണ്ടെങ്കിലും ഭാരവാഹികൾ പരസ്പരം ഏറ്റുമുട്ടുന്ന സാഹചര്യത്തിൽ ഇരുവരുടെയും ഇടപെടൽ കൊണ്ട് മാത്രം തർക്കം തീരില്ലെന്നാണ് വിലയിരുത്തൽ. മമ്മൂട്ടിയും മോഹൻലാലും ഉൾപ്പെടെയുള്ള മുതിർന്ന താരങ്ങൾ സംഘടനയിലെ സംഭവവികാസങ്ങൾ അന്വേഷിക്കുന്നുണ്ടെങ്കിലും തൽക്കാലം വിഷയത്തിൽ നേരിട്ട് ഇടപെടേണ്ടതില്ലെന്ന നിലപാടിലാണ് അവർ. അടുത്ത മാസം കൂടുന്ന ‘അമ്മ’യുടെ ജനറൽ ബോഡി യോഗത്തിൽ നിലവിലെ ഭരണസമിതി തുടരണോ അതോ പിരിച്ചുവിടണമോ എന്ന കാര്യത്തിൽ അന്തിമ തീരുമാനമുണ്ടാകും.
Story Summary: The actors’ association AMMA has directed actress Ansiba Hassan to appear in person regarding her complaint against Tini Tom. Ansiba has demanded a special committee including Ramesh Pisharody and Dhyan Sreenivasan to hear her plea, amid ongoing leadership rifts between Swetha Menon and Kukku Parameswaran.
