കൊച്ചി: ഓഹരി ഉടമകൾക്കായി ഏറ്റവും കൂടുതൽ മൂല്യം സൃഷ്ടിച്ച കമ്പനികളുടെ ആഗോള പട്ടികയിൽ ചരിത്രനേട്ടവുമായി ടിവിഎസ് മോട്ടോർ കമ്പനി (TVS Motor global ranking 1). ഡ്യൂറബിൾ കൺസ്യൂമർ ഗുഡ്സ് (Durable Consumer Goods) വിഭാഗത്തിലാണ് ടിവിഎസ് വേണു ഗ്രൂപ്പിന്റെ ഭാഗമായ ടിവിഎസ് മോട്ടോർ ആഗോളതലത്തിൽ ഒന്നാം സ്ഥാനം സ്വന്തമാക്കിയത്. ജർമ്മനിയിലെ പ്രമുഖ ബിസിനസ്സ് വാരികയായ ‘വേർത്ഷാഫ്റ്റ്സ്വോഹെ’ (WirtschaftsWoche), പ്രശസ്ത ആഗോള കൺസൾട്ടൻസി സ്ഥാപനമായ ബോസ്റ്റൺ കൺസൾട്ടിംഗ് ഗ്രൂപ്പിന്റെ (BCG) വാല്യൂ ക്രിയേറ്റേഴ്സ് വിശകലനത്തെ അടിസ്ഥാനമാക്കി പുറത്തുവിട്ട ‘ലോകത്തിലെ ഏറ്റവും മികച്ച ഓഹരികൾ’ (Best Stocks in the World) എന്ന വാർഷിക റാങ്കിങ്ങിലാണ് ടിവിഎസ് ഈ അപൂർവ്വ നേട്ടം കൈവരിച്ചത്.
ലോകമെമ്പാടുമുള്ള 35 വ്യവസായ മേഖലകളിൽ നിന്നുള്ള രണ്ടായിരത്തിലധികം പ്രമുഖ ലിസ്റ്റഡ് കമ്പനികളെ വിലയിരുത്തിയാണ് ഈ സ്വതന്ത്ര പഠനം നടത്തിയത്. യുഎസ്എ, ജപ്പാൻ, ചൈന, ഇന്ത്യ തുടങ്ങിയ രാജ്യങ്ങളിലെ വൻകിട ആഗോള കമ്പനികളെ പിന്തള്ളിയാണ് ടിവിഎസ് ഒന്നാമതെത്തിയത്. 2021 മുതൽ 2025 വരെയുള്ള അഞ്ച് വർഷത്തെ കാലയളവിൽ ശരാശരി 51 ശതമാനം വാർഷിക ടോട്ടൽ ഷെയർഹോൾഡർ റിട്ടേൺ (Total Shareholder Return) നൽകാൻ ടിവിഎസ് മോട്ടോറിന് സാധിച്ചു. 22 ശതമാനമുള്ള ശക്തമായ വരുമാന വളർച്ചയും 18 ശതമാനം പ്രീമിയം വിപണി മൂല്യനിർണ്ണയവുമാണ് കമ്പനിയെ ഈ നേട്ടത്തിന് അർഹമാക്കിയത്.
കമ്പനി ചെയർമാൻ സുദർശൻ വേണുവിന്റെ തന്ത്രപരമായ കാഴ്ചപ്പാടുകളുടെയും മികച്ച നേതൃത്വത്തിന്റെയും ഫലമായാണ് ഈ വലിയ അംഗീകാരം ലഭിച്ചതെന്ന് ടിവിഎസ് മോട്ടോർ കമ്പനി ചീഫ് മെന്റർ പ്രൊഫസർ സർ റാൽഫ് സ്പെത് പറഞ്ഞു. പരിസ്ഥിതി സൗഹൃദ ഇലക്ട്രിക് വാഹനങ്ങളിലുള്ള (EV) മുന്നേറ്റവും, കമ്പനിയുടെ ഉടമസ്ഥതയിലുള്ള പ്രശസ്ത ബ്രിട്ടീഷ് ബ്രാൻഡായ നോർട്ടൺ (Norton) മോട്ടോർസൈക്കിളിന്റെ ആഗോള വിപണിയിലെ മികച്ച തിരിച്ചുവരവും കമ്പനിയെ ഭാവിയിൽ കൂടുതൽ ശക്തമാക്കുമെന്നും അദ്ദേഹം കൂട്ടിച്ചേർത്തു.
2025-26 സാമ്പത്തിക വർഷത്തിൽ ചരിത്രത്തിലെ ഏറ്റവും മികച്ച പ്രകടനമാണ് കമ്പനി കാഴ്ചവെച്ചത്. ടിവിഎസ് മോട്ടോറിന്റെ വാർഷിക വരുമാനം മുൻവർഷത്തെ അപേക്ഷിച്ച് 30 ശതമാനം ഉയർന്ന് 47,270 കോടി രൂപയായി. പ്രവർത്തന ലാഭം 40 ശതമാനം വർദ്ധനവോടെ 4,975 കോടി രൂപയായും വാർഷിക വിൽപന 24 ശതമാനം വർദ്ധിച്ച് 58.9 ലക്ഷം യൂണിറ്റുകളിലെത്തുകയും ചെയ്തു. നിലവിൽ ഇന്ത്യയിലും ഇന്തോനേഷ്യയിലുമായി നാല് അത്യാധുനിക നിർമ്മാണ യൂണിറ്റുകളുള്ള കമ്പനി, ഗുണമേന്മയ്ക്കുള്ള പ്രശസ്തമായ ‘ഡെമിംഗ് പുരസ്കാരം’ നേടിയ ഏക ഇരുചക്ര വാഹന നിർമ്മാതാക്കളാണ്.
Story Summary: TVS Motor Company has ranked No. 1 globally in the ‘Durable Consumer Goods’ category for shareholder value creation by Germany’s WirtschaftsWoche and BCG. Delivering a 51% average annual Total Shareholder Return (2021-2025), the company recorded a historic revenue of ₹47,270 crore in FY26.
