കൊച്ചി: രാജ്യത്തെ ചെറുകിട-ഇടത്തരം (MSME) വ്യവസായ മേഖലയ്ക്ക് കൂടുതൽ കരുത്തുപകരാനും വായ്പകൾ സംരംഭകരിലേക്ക് വേഗത്തിൽ എത്തിക്കാനുമായി സ്മോൾ ഇൻഡസ്ട്രീസ് ഡെവലപ്മെന്റ് ബാങ്ക് ഓഫ് ഇന്ത്യ (SIDBI) പുതിയ ഡിജിറ്റൽ പദ്ധതികൾ ആവിഷ്കരിച്ചു (SIDBI new digital portals MSME). എസ്ഐഡിബിഐയുടെ 37-ാമത് സ്ഥാപകദിനാഘോഷ ചടങ്ങിൽ കേന്ദ്ര ധനമന്ത്രി നിർമ്മല സീതാരാമൻ പുതിയ സംരംഭങ്ങളുടെ ഉദ്ഘാടനം നിർവ്വഹിച്ചു.
ഗ്രാമീണ മേഖലകളിൽ വായ്പാ ലഭ്യത കൂടുതൽ എളുപ്പമാക്കുന്നതിനായി റീജിയണൽ റൂറൽ ബാങ്കുകളുമായി (RRB) സഹകരിച്ചുള്ള ‘എസ്ഐഡിബിഐ ആർആർബി കോ-ലെൻഡിങ് പോർട്ടൽ’, എംഎസ്എംഇകൾക്ക് ആവശ്യമായ അത്യാധുനിക യന്ത്രോപകരണങ്ങളും ധനസഹായവും ലഭ്യമാക്കുന്ന ‘എസ്ഐഡിബിഐ മാക്ഫിൻ മാർട്ട്’ (www.machineryportal.sidbi.in) എന്നീ ഡിജിറ്റൽ പ്ലാറ്റ്ഫോമുകളാണ് ചടങ്ങിൽ രാജ്യത്തിന് സമർപ്പിച്ചത്. കൂടാതെ, അടുത്ത മൂന്ന് വർഷത്തിനുള്ളിൽ പതിനായിരത്തോളം ഗ്രാമീണ ചെറുകിട-കുടിൽ വ്യവസായ യൂണിറ്റുകളുടെ മുഖച്ഛായ മാറ്റാൻ ലക്ഷ്യമിട്ടുള്ള ‘മോഡേണൈസേഷൻ ഓഫ് റൂറൽ എന്റർപ്രൈസസ്’ (MoRE) പദ്ധതിക്കും ചടങ്ങിൽ തുടക്കം കുറിച്ചു.
ഇന്ത്യയുടെ ആഭ്യന്തര വളർച്ചയിലും കൂടുതൽ തൊഴിലവസരങ്ങൾ സൃഷ്ടിക്കുന്നതിലും കയറ്റുമതി വർധിപ്പിക്കുന്നതിലും എംഎസ്എംഇകൾ നിർണായക പങ്കാണ് വഹിക്കുന്നതെന്ന് ധനമന്ത്രി നിർമ്മല സീതാരാമൻ പറഞ്ഞു. പശ്ചിമേഷ്യയിലെ സംഘർഷങ്ങളെ തുടർന്നുണ്ടായ ആഗോള പ്രതിസന്ധികളിൽ നിന്ന് എംഎസ്എംഇ മേഖലയെ സംരക്ഷിക്കാൻ കേന്ദ്രസർക്കാർ സ്വീകരിച്ച സഹായ നടപടികളും മന്ത്രി വിശദീകരിച്ചു. ഇതിന്റെ ഭാഗമായി നടപ്പാക്കിയ ‘എമർജൻസി ക്രെഡിറ്റ് ലൈൻ ഗ്യാരണ്ടി സ്കീം 5.0’ (ECLGS) ഉൾപ്പെടെയുള്ള പദ്ധതികൾ സംരംഭകർക്ക് വലിയ ആശ്വാസമായതായും മന്ത്രി ചൂണ്ടിക്കാട്ടി.
ഡിജിറ്റൽ സാങ്കേതികവിദ്യയിലൂടെയും പുതിയ പങ്കാളിത്തങ്ങളിലൂടെയും എംഎസ്എംഇ വായ്പാ രംഗത്ത് വിപ്ലവകരമായ മാറ്റങ്ങൾ കൊണ്ടുവരാനുള്ള നിരന്തര ശ്രമങ്ങളുടെ ഭാഗമായാണ് പുതിയ ഡിജിറ്റൽ പോർട്ടലുകൾക്ക് തുടക്കം കുറിച്ചതെന്ന് എസ്ഐഡിബിഐയുടെ ചെയർമാനും മാനേജിങ് ഡയറക്ടറുമായ മനോജ് മിത്തൽ വ്യക്തമാക്കുകയുണ്ടായി.
Story Summary: Union Finance Minister Nirmala Sitharaman launched new digital initiatives by SIDBI on its 37th Foundation Day to boost MSME credit. The platforms include the SIDBI RRB Co-Lending Portal, Machfin Mart for machinery access, and the MoRE scheme to modernize 10,000 rural enterprises within three years.
