ന്യൂഡൽഹി: ഇന്ത്യാ-പസഫിക് മേഖലയിൽ സുരക്ഷയും വികസനവും ലക്ഷ്യമിട്ടുള്ള ഓസ്ട്രേലിയ, ഇന്ത്യ, ജപ്പാൻ, അമേരിക്ക എന്നീ രാജ്യങ്ങളുടെ സഖ്യമായ ‘ക്വാഡ്’ കൂട്ടായ്മയുടെ വിദേശകാര്യ മന്ത്രിമാരുടെ നിർണായക യോഗം ഡൽഹിയിൽ നടന്നു (Quad Foreign Ministers Meeting). ഇന്തോ-പസഫിക് മേഖലയിലെ ചൈനയുടെ വർദ്ധിച്ചുവരുന്ന സ്വാധീനത്തെ പ്രതിരോധിക്കുന്നതിന്റെ ഭാഗമായി പസഫിക് ദ്വീപ് രാഷ്ട്രമായ ഫിജിയിൽ പുതിയൊരു തുറമുഖം സംയുക്തമായി നിർമ്മിക്കാൻ യോഗത്തിൽ തീരുമാനമായി.
യുഎസ് വിദേശകാര്യ സെക്രട്ടറി മാർക്കോ റൂബിയോ, ഇന്ത്യൻ വിദേശകാര്യ മന്ത്രി എസ്. ജയശങ്കർ, ഓസ്ട്രേലിയൻ വിദേശകാര്യ മന്ത്രി പെന്നി വോങ്, ജാപ്പനീസ് വിദേശകാര്യ മന്ത്രി തോഷിമിത്സു മൊട്ടേഗി എന്നിവരാണ് ന്യൂഡൽഹിയിലെ ഹൈദരാബാദ് ഹൗസിൽ നടന്ന യോഗത്തിൽ പങ്കെടുത്തത്. നാല് രാജ്യങ്ങളും ചേർന്നുള്ള കൂട്ടായ്മയുടെ ആദ്യത്തെ സംയുക്ത അടിസ്ഥാന സൗകര്യ വികസന പദ്ധതിയാണിത്. തുറമുഖ നിർമ്മാണത്തിന് പുറമെ ഊർജ്ജ സുരക്ഷ ഉറപ്പാക്കുന്നതിനായുള്ള ‘ഇന്തോ-പസഫിക് എനർജി സെക്യൂരിറ്റി’ പദ്ധതിക്കും, അത്യാധുനിക സാങ്കേതിക വിദ്യകൾക്ക് ആവശ്യമായ തന്ത്രപ്രധാന ധാതുക്കളുടെ വിതരണ ശൃംഖല ശക്തമാക്കുന്നതിനുള്ള കരാറിലും മന്ത്രിമാർ ഒപ്പുവെച്ചു.
സാങ്കേതിക-പ്രതിരോധ മേഖലകളിൽ നിർണായകമായ ധാതുക്കളുടെ ഖനനം,
സംസ്കരണം, പുനരുപയോഗം എന്നിവയിൽ പരസ്പര സഹകരണം വർദ്ധിപ്പിക്കാൻ ഈ പുതിയ ചട്ടക്കൂട് സഹായിക്കും. ഈ വർഷം അവസാനം നടക്കാനിരിക്കുന്ന ക്വാഡ് ഉച്ചകോടിക്ക് മുന്നോടിയായാണ് ഈ മന്ത്രിതല യോഗം ചേർന്നിട്ടുള്ളത്. ചൈനയിൽ നിന്നുള്ള വ്യാപാര നിയന്ത്രണങ്ങൾ നേരിടുന്ന ജപ്പാൻ ഉൾപ്പെടെയുള്ള രാജ്യങ്ങൾക്ക് ഈ ധാതു വിതരണ കരാർ വലിയ രീതിയിൽ ഗുണം ചെയ്യുമെന്നാണ് വിലയിരുത്തപ്പെടുന്നത്.
Summary: The foreign ministers of the Quad nations—Australia, India, Japan, and the United States—met in New Delhi to strengthen regional cooperation and inject fresh energy into the grouping. They unveiled their first joint infrastructure project to build a port in Fiji, alongside signing pacts on Indo-Pacific energy security and critical minerals supply chains. This diplomatic meeting comes as a significant step to ensure a free and open Indo-Pacific amid evolving global geopolitical challenges.
