കൊച്ചി: ആസ്റ്റർ മെഡ്സിറ്റിയുടെ പ്രമുഖ ബിസിനസ് ഡെവലപ്മെന്റ് ഇനിഷ്യേറ്റീവായ ‘ഗ്രോത്ത് ഫോറം’ (Growth Forum) പത്താം പതിപ്പിന് കൊച്ചിയിൽ തുടക്കമായി (Aster Medcity Growth Forum 10th edition Kochi). മെഡ്സിറ്റി നോളഡ്ജ് ഹബ്ബിൽ നടന്ന പ്രൗഢഗംഭീരമായ ചടങ്ങിൽ കായിക-യുവജനകാര്യ വകുപ്പ് മന്ത്രി അഡ്വ. ഒ. ജെ. ജനീഷ് ഫോറത്തിന്റെ ഔദ്യോഗിക ഉദ്ഘാടനം നിർവ്വഹിച്ചു. ചടങ്ങിൽ പങ്കെടുത്ത പുത്തുപ്പള്ളി എം.എൽ.എ അഡ്വ. ചാണ്ടി ഉമ്മൻ, ആസ്റ്റർ മെഡ്സിറ്റിയുടെ സാമൂഹിക പ്രതിബദ്ധത മുൻനിർത്തിയുള്ള സംരംഭമായ ‘ബാക്ക് ടു സ്കൂൾ’ (Back to School) പദ്ധതിയുടെ മൂന്നാം പതിപ്പിന്റെ ഉദ്ഘാടനവും നിർവ്വഹിച്ചു.
നാളത്തെ മികച്ച നേതാക്കളെ വാർത്തെടുക്കുന്നതിൽ ഇത്തരം ബിസിനസ് കൂട്ടായ്മകൾക്കുള്ള പങ്കിനെക്കുറിച്ച് മന്ത്രി ഒ. ജെ. ജനീഷ് തന്റെ ഉദ്ഘാടന പ്രസംഗത്തിൽ എടുത്തുപറഞ്ഞു.
“നമ്മുടെ നാട്ടിൽ യുവതലമുറയ്ക്കിടയിൽ വർധിച്ചുവരുന്ന ലഹരി ഉപയോഗം തടയുന്നതിനായി സർക്കാർ വലിയ രീതിയിലുള്ള ക്യാമ്പയിനുകൾക്ക് പദ്ധതിയിടുന്നുണ്ട്. ഇത്തരം സാമൂഹിക മുന്നേറ്റങ്ങളിൽ ആസ്റ്റർ പോലെയുള്ള പ്രമുഖ ആരോഗ്യ സ്ഥാപനങ്ങളുടെ സജീവമായ സഹകരണവും പങ്കാളിത്തവും ആവശ്യമാണ്.”
ആസ്റ്ററിന്റെ രോഗി കേന്ദ്രീകൃത സമീപനത്തെ (Patient-centric approach) പ്രത്യേകം അഭിനന്ദിച്ച മന്ത്രി, ചികിത്സ തേടുമ്പോൾ ഒരു രോഗിയും കുടുംബവും ആഗ്രഹിക്കുന്ന ഏറ്റവും പ്രധാനപ്പെട്ട കാര്യം ഇത്തരം സമർപ്പിത പരിചരണമാണെന്നും കൂട്ടിച്ചേർത്തു.
സാമ്പത്തികമായി പിന്നോക്കം നിൽക്കുന്ന കുടുംബങ്ങളിലെ കുട്ടികൾക്ക് പഠനോപകരണങ്ങൾ വിതരണം ചെയ്യുന്ന ആസ്റ്ററിന്റെ പ്രശസ്തമായ പദ്ധതിയാണ് ‘ബാക്ക് ടു സ്കൂൾ’. പദ്ധതിയുടെ മൂന്നാം പതിപ്പിന്റെ ഭാഗമായി, ആസ്റ്ററിലെ ശുചീകരണ വിഭാഗം ജീവനക്കാരുടെ കുടുംബങ്ങളിലെ കുട്ടികൾക്ക് പഠനോപകരണങ്ങൾ നൽകിക്കൊണ്ടാണ് അഡ്വ. ചാണ്ടി ഉമ്മൻ എം.എൽ.എ വിതരണോദ്ഘാടനം നിർവ്വഹിച്ചത്.
കാരുണ്യത്തിലും സഹാനുഭൂതിയിലും ഊന്നിയുള്ള പ്രവർത്തനങ്ങളുടെ ആവശ്യകതയെക്കുറിച്ച് അദ്ദേഹം ചടങ്ങിൽ സംസാരിച്ചു. മറ്റുള്ളവരെക്കൂടി ചേർത്തുപിടിക്കുന്ന സമീപനങ്ങളാണ് വ്യക്തിപരമായ നേട്ടങ്ങളുടെ മാറ്റ് കൂട്ടുകയെന്നും, സഹാനുഭൂതിയുള്ള നേതാക്കളും നിയമങ്ങളുമാണ് ഇന്നത്തെ നാടിന് ആവശ്യമെന്നും എം.എൽ.എ വ്യക്തമാക്കി.
നന്ദിലത്ത് ജി-മാർട്ട് മാനേജിംഗ് ഡയറക്ടറും പ്രമുഖ സംരംഭകയുമായ ഐശ്വര്യ നന്ദിലത്ത് പുതിയ കാലഘട്ടത്തിലെ ബിസിനസ്സ് ലീഡർഷിപ്പ് പാടവങ്ങളെയും വെല്ലുവിളികളെയും ആസ്പദമാക്കി ചടങ്ങിൽ മുഖ്യപ്രഭാഷണം നടത്തി.
വിവിധ മേഖലകളിലെ പ്രമുഖ ഡോക്ടർമാരും ബിസിനസ് രംഗത്തെ വിദഗ്ധരും പങ്കെടുത്ത ചടങ്ങിൽ, കോർപ്പറേറ്റ് വളർച്ചാ സാധ്യതകളെക്കുറിച്ചും ആധുനിക ഹെൽത്ത് കെയർ ലീഡർഷിപ്പ് ട്രെൻഡുകളെക്കുറിച്ചുമുള്ള വിപുലമായ ചർച്ചകൾ നടന്നു. ആസ്റ്റർ മെഡ്സിറ്റി ചീഫ് ഓപ്പറേറ്റിംഗ് ഓഫീസർ (COO) ഡോ. ഷുഹൈബ് കാദർ, ആസ്റ്ററിലെ വിവിധ ഡിപ്പാർട്ട്മെന്റ് മേധാവികൾ, ജീവനക്കാർ എന്നിവർ ചടങ്ങിൽ സംബന്ധിച്ചു.
Story Summary: Minister Adv. O.J. Janeesh inaugurated the 10th edition of Aster Medcity’s ‘Growth Forum’ in Kochi. Puthuppally MLA Adv. Chandy Oommen launched the 3rd edition of the ‘Back to School’ educational support initiative for staff children.
