റിയാദ്: സൗദി ജയിലിൽ കഴിയുന്ന കോഴിക്കോട് ഫറോക്ക് സ്വദേശി അബ്ദുൽ റഹീമിന്റെ മോചനത്തിനായുള്ള നടപടികൾ അതിവേഗം പുരോഗമിക്കുന്നതായി റിയാദിലെ നിയമ സഹായ സമിതി അറിയിച്ചു (Abdul Rahim Saudi jail release). റഹീമിന്റെ ഇരുപത് വർഷത്തെ തടവ് ശിക്ഷാ കാലാവധി പൂർത്തിയായ പശ്ചാത്തലത്തിൽ, കേസ് നടപടികൾ വൈകുന്നതിൽ യാതൊരുവിധ അസ്വാഭാവികതയുമില്ലെന്ന് സഹായ സമിതി വാർത്താക്കുറിപ്പിൽ വ്യക്തമാക്കി.
വർഷങ്ങൾ പഴക്കമുള്ള സങ്കീർണ്ണമായ കേസായതിനാൽ നിയമപരമായ ചില സ്വാഭാവിക നടപടിക്രമങ്ങൾ മാത്രമാണ് ഇപ്പോൾ നടക്കുന്നത്. നിലവിൽ സൗദി അറേബ്യയിൽ പെരുന്നാൾ അവധിയാണെങ്കിലും പ്രധാന സർക്കാർ വകുപ്പുകൾ പ്രവർത്തിക്കുന്നുണ്ട്. വരും ദിവസങ്ങളിൽ ബാക്കി ഔദ്യോഗിക നടപടികൾ വേഗത്തിലാകുമെന്നാണ് പ്രതീക്ഷിക്കുന്നത്. ജയിൽ മോചനത്തിന് ശേഷമായിരിക്കും എമർജൻസി സർട്ടിഫിക്കറ്റിൽ നാട്ടിലേക്ക് വരാനുള്ള എക്സിറ്റ് വിസ ലഭ്യമാക്കുക. ഇതിനായി ഇന്ത്യൻ എംബസിയും അഭിഭാഷകരും നിരന്തരം ശ്രമിച്ചുവരികയാണെന്നും സമിതി അറിയിച്ചു.
2006-ലാണ് സ്പോൺസറുടെ ഭിന്നശേഷിക്കാരനായ സൗദി ബാലൻ അബദ്ധത്തിൽ കൊല്ലപ്പെട്ട കേസിൽ കോഴിക്കോട് ഫറോക്ക് സ്വദേശി അബ്ദുറഹീം ജയിലിലാകുന്നത്. സ്വകാര്യ അവകാശ കേസിൽ അബ്ദുറഹീമിന് സൗദി കോടതി ആദ്യം വിധിച്ചത് വധശിക്ഷയായിരുന്നു. ഇതിനൊപ്പം പൊതു അവകാശ കേസിൽ കോടതി 20 വർഷത്തെ തടവ് ശിക്ഷയും വിധിച്ചിരുന്നു. ഈ തടവ് കാലാവധിയാണ് ഇപ്പോൾ പൂർത്തിയായിരിക്കുന്നത്.
റഹീമിന്റെ ജീവൻ രക്ഷിക്കാനായി 15 മില്യൺ സൗദി റിയാൽ (ഏകദേശം 34 കോടിയോളം രൂപ) മോചനദ്രവ്യമായി നൽകിയാൽ മാപ്പ് നൽകാമെന്ന് കൊല്ലപ്പെട്ട ബാലന്റെ കുടുംബം സമ്മതിച്ചിരുന്നു. ലോകമെമ്പാടുമുള്ള മലയാളികൾ ഒറ്റക്കെട്ടായി കൈകോർത്ത് ദിവസങ്ങൾക്കകമാണ് ഈ വൻ തുക സമാഹരിച്ച് റിയാദിലെ കോടതിയിൽ എത്തിച്ചത്.
തുക കൈമാറിയതോടെ കോടതി റഹീമിന്റെ വധശിക്ഷ റദ്ദാക്കിയിരുന്നു. ഇനി ജയിൽ മോചനത്തിനായുള്ള അവസാനവട്ട പേപ്പർ വർക്കുകൾ മാത്രമാണ് ബാക്കിയുള്ളത്. പ്രിയപ്പെട്ടവൻ ഇരുപത് വർഷത്തിന് ശേഷം ജയിൽ മോചിതനായി സ്വന്തം മണ്ണിലേക്ക് തിരിച്ചെത്തുന്ന നിമിഷത്തിനായി കാത്തിരിക്കുകയാണ് കുടുംബവും കേരളക്കരയും.
Story Summary (English): The Riyadh Legal Aid Committee has confirmed that the release procedures for Kozhikode native Abdul Rahim, who has been in a Saudi prison for 20 years, are progressing smoothly without any unusual delays. Rahim’s 20-year prison sentence under public rights ended recently, following the cancellation of his death penalty after a historic fundraising campaign by Keralites worldwide raised 15 million Saudi Riyals (approx. Rs 34 crores) as blood money. Although Saudi Arabia is currently observing Eid holidays, essential departments are functioning, and final release formalities along with the emergency exit visa from the Indian Embassy are expected to be expedited soon.
