ബുക്കാറസ്റ്റ്: ഗ്രാന്റ് ചെസ്സ് ടൂറിന്റെ ഭാഗമായി റൊമാനിയയിൽ നടക്കുന്ന സൂപ്പർ ചെസ്സ് ക്ലാസിക് ടൂർണമെന്റിലെ ആറാം റൗണ്ടിൽ ഇന്ത്യൻ ഗ്രാൻഡ്മാസ്റ്റർ ആർ. പ്രഗ്നാനന്ദ ഇന്ന് റൊമാനിയയുടെ ഡീക് ബോഗ്ദാൻ-ഡാനിയലുമായി ഏറ്റുമുട്ടും (R Praggnanandhaa Super Chess Classic Bucharest). ടൂർണമെന്റിൽ നിലവിൽ രണ്ടാം സ്ഥാനത്തുള്ള പ്രഗ്നാനന്ദ തുടർച്ചയായ സമനിലക്കുരുക്ക് അഴിക്കാനുറച്ചാണ് ഇന്ന് കരുക്കൾ നീക്കുക. അഞ്ച് റൗണ്ടുകൾ പൂർത്തിയായപ്പോൾ 3.5 പോയിന്റുമായി ജർമ്മനിയുടെ വിൻസെന്റ് കീമറാണ് പട്ടികയിൽ ഒന്നാമത്. കീമറിന് തൊട്ടുപിന്നിൽ മൂന്ന് പോയിന്റുമായി പ്രഗ്നാനന്ദ, ഫാബിയാനോ കരുവാന, അനിഷ് ഗിരി, ജോർഡൻ വാൻ ഫോറസ്റ്റ് എന്നിവരടങ്ങുന്ന സംഘം രണ്ടാം സ്ഥാനം പങ്കിടുന്നു.
രണ്ടാം റൗണ്ടിൽ ജാവോഖിർ സിന്ദാരോവിനെ തോൽപ്പിച്ചതൊഴിച്ചാൽ ബാക്കി നാല് മത്സരങ്ങളിലും പ്രഗ്നാനന്ദ സമനില വഴങ്ങുകയായിരുന്നു. ആറാം റൗണ്ടിൽ കറുത്ത കരുക്കളുമായാണ് താരം കളത്തിലിറങ്ങുന്നത്. വരും റൗണ്ടുകളിൽ മുൻനിര താരങ്ങളായ കരുവാന, വാഷിയർ-ലഗ്രാവ്, അനിഷ് ഗിരി എന്നിവരെ നേരിടേണ്ടതുള്ളതിനാൽ പ്രഗ്നാനന്ദയ്ക്ക് ഇന്നത്തെ മത്സരം നിർണായകമാണ്. നിലവിൽ നാലാം റാങ്കിലുള്ള വിൻസെന്റ് കീമർ ആറാം റൗണ്ടിൽ ഫ്രാൻസിന്റെ അലിറെസ ഫിറൂസ്ജയെ നേരിടുമ്പോൾ, കരുവാനയ്ക്ക് സിന്ദാരോവാണ് എതിരാളി. 3,75,000 യുഎസ് ഡോളർ സമ്മാനത്തുകയുള്ള ഈ ടൂർണമെന്റിൽ ഒന്നാം സ്ഥാനം നേടുന്നവർക്ക് ഒരു ലക്ഷം ഡോളറാണ് ലഭിക്കുക.
Summary: Indian Grandmaster R Praggnanandhaa is set to face Romania’s Deac Bogdan-Daniel in the sixth round of the Super Chess Classic in Bucharest, aiming to break his current streak of draws. After five rounds, Germany’s Vincent Keymer holds a sole lead with 3.5 points, while Praggnanandhaa shares the second spot with 3 points alongside Fabiano Caruana, Anish Giri, and Jorden van Foreest.
