കൊച്ചി: മികച്ച വരുമാനമുള്ള മോഡലിങ് ജോലിയും വിദേശത്ത് മേക്കപ്പ് ആർട്ടിസ്റ്റ് തസ്തികയും വാഗ്ദാനം ചെയ്ത് ദുബായിലേക്ക് കടത്തി ക്രൂരമായ ലൈംഗിക ചൂഷണത്തിന് ഇരയാക്കിയതായി പരാതിക്കാരിയുടെ വെളിപ്പെടുത്തൽ. വിദേശത്ത് എത്തിച്ച ശേഷം ഫോണും പാസ്പോർട്ടും പിടിച്ചുവെക്കുകയും, മദ്യത്തിൽ മയക്കുമരുന്ന് കലർത്തി നൽകി ബോധരഹിതയാക്കി പീഡിപ്പിക്കുകയുമായിരുന്നുവെന്ന് യുവതി പറഞ്ഞു.(Kochi Model Human Trafficking Case Victim Reveals Shocking Torture In Dubai As Main Accused Sindhu Arrested)
പ്രതികരണ ശേഷി നഷ്ടപ്പെടുത്താൻ ക്രൂരമായി മർദിച്ചതായും, നഗ്നദൃശ്യങ്ങൾ മൊബൈലിൽ പകർത്തി നാട്ടിലെ വീട്ടുകാരിലേക്ക് അയച്ചുകൊടുത്ത് ഭീഷണിപ്പെടുത്തിയതായും യുവതി വെളിപ്പെടുത്തി. ഇവന്റ് മാനേജ്മെന്റ് കമ്പനിയുടെ മറവിലാണ് ഈ വൻ മനുഷ്യക്കടത്തും സെക്സ് റാക്കറ്റും പ്രവർത്തിച്ചിരുന്നത്. വിസയ്ക്കായി യുവതിയിൽ നിന്ന് നാല് ലക്ഷം രൂപയാണ് പ്രതികൾ വാങ്ങിയത്.
എന്നാൽ ദുബായ് വിമാനത്താവളത്തിൽ എത്തിയത് മുതൽ ഭീഷണികൾ തുടങ്ങി. ആദ്യം കൊണ്ടുപോയ ഫ്ലാറ്റിൽ മറ്റ് എട്ടോളം യുവതികൾ സമാനമായ രീതിയിൽ തടവിലാക്കപ്പെട്ടിരുന്നു. എങ്ങനെയോ നാട്ടിൽ തിരിച്ചെത്തി പോലീസിൽ പരാതി നൽകിയതിന് പിന്നാലെയും പ്രതികളിൽ നിന്ന് വധഭീഷണി തുടരുകയാണെന്ന് യുവതി വ്യക്തമാക്കി. കേസിൽ പിടിയിലായ അലീന കുപ്രസിദ്ധ ഗുണ്ടാ നേതാവിന്റെ പെൺസുഹൃത്താണ് എന്ന് സ്ഥിരീകരിച്ചിട്ടുണ്ട്.
കേസുമായി ബന്ധപ്പെട്ട് കൊച്ചി മരട് പോലീസിന് നിലവിൽ മൂന്ന് പരാതികളാണ് ലഭിച്ചിട്ടുള്ളത്. മനുഷ്യക്കടത്ത് സംഘത്തിലെ മൂന്ന് സ്ത്രീകളെ പോലീസ് ഇതിനോടകം അറസ്റ്റ് ചെയ്തിട്ടുണ്ട്. വിദേശത്ത് വെച്ച് യുവതികളുടെ പാസ്പോർട്ടും ഫോണും കൈക്കലാക്കി ക്രൂരതയ്ക്ക് നേതൃത്വം നൽകിയ കേസിലെ ഒന്നാം പ്രതി സിന്ധുവിനെ മുംബൈയിൽ നിന്നാണ് പോലീസ് പിടികൂടിയത്. കസ്റ്റഡിയിലെടുത്ത സിന്ധുവിനെ ഇന്ന് കൊച്ചിയിലെത്തിച്ച് വിശദമായി ചോദ്യം ചെയ്യും. കൂടുതൽ യുവതികൾ ഇവരുടെ കെണിയിൽ അകപ്പെട്ടിട്ടുണ്ടോ എന്ന് പോലീസ് അന്വേഷിച്ചുവരികയാണ്.
Story Summary
A victim of a human trafficking racket operating under the guise of modeling jobs in Dubai has revealed harrowing details of abuse, including being drugged, assaulted, and blackmailed with explicit videos. The Maradu police in Kochi have registered three complaints, arrested three women, and are bringing the prime suspect, Sindhu, to Kochi from Mumbai today.
