ഇംഫാൽ: മണിപ്പൂരിൽ വംശീയ സംഘർഷങ്ങൾ പരിഹാരമില്ലാതെ തുടരുന്നതിനിടയിൽ, കുക്കി-സോ ഗോത്രവിഭാഗങ്ങൾക്ക് ഭൂരിപക്ഷമുള്ള മേഖലകൾ ഉൾപ്പെടുത്തി സ്വന്തമായി നിയമസഭയുള്ള ഒരു ‘പ്രത്യേക ഭരണപ്രദേശം’ രൂപീകരിക്കണമെന്ന് ആവശ്യപ്പെട്ട് കുക്കി സംഘടനകൾ പ്രധാനമന്ത്രി നരേന്ദ്ര മോദിക്ക് നിവേദനം നൽകി. ഗോത്രവിഭാഗങ്ങളുടെ കൂട്ടായ്മയായ ‘കുക്കി-സോ കൗൺസിൽ’ സമർപ്പിച്ച 8 ഇന നിവേദനത്തിലാണ് ഈ ആവശ്യങ്ങളുള്ളത്.(Manipur ethnic violence, Kuki Outfits Demand Separate Union Territory From Prime Minister Modi Citing Security Threat)
മണിപ്പൂരിലെ നിലവിലെ ഭരണസംവിധാനത്തിന് കീഴിൽ തങ്ങളുടെ ജീവനും സ്വത്തിനും സുരക്ഷിതത്വമില്ലെന്ന് കുക്കി വിഭാഗം വ്യക്തമാക്കുന്നു. തുടർച്ചയായുണ്ടാകുന്ന വംശീയ ആക്രമണങ്ങൾ തങ്ങളുടെ നിലനിൽപ്പിനെത്തന്നെ ബാധിച്ചതായും മെയ്തേയ്, നാഗാ, കുക്കി വിഭാഗങ്ങൾ തമ്മിലുള്ള ബന്ധം പൂർണ്ണമായും തകർന്നതായും കൗൺസിൽ ചൂണ്ടിക്കാണിക്കുന്നു. ഇപ്പോഴത്തെ സാഹചര്യത്തിൽ ഈ വിഭാഗങ്ങൾക്ക് ഇനി ഒരുമിച്ച് ജീവിക്കാൻ സാധിക്കാത്ത വിധം ഭിന്നത രൂക്ഷമാണെന്നാണ് നിവേദനത്തിൽ പറയുന്നത്.
മെയ്തേയ്, നാഗാ വിഭാഗങ്ങളുമായുള്ള കടുത്ത തർക്കങ്ങൾ കാരണം കുക്കി വിഭാഗക്കാർക്ക്, പ്രത്യേകിച്ച് കാങ്പോക്പി ജില്ലയിലുള്ളവർക്ക് റോഡ് മാർഗ്ഗം യാത്ര ചെയ്യാൻ കടുത്ത സുരക്ഷാ ഭീഷണിയുണ്ട്. ഈ സാഹചര്യത്തിൽ അടിയന്തിര വൈദ്യസഹായങ്ങൾക്കും സുരക്ഷിതമായ യാത്രകൾക്കുമായി തങ്ങളുടെ പ്രദേശങ്ങളിൽ നിന്ന് ചുരാചന്ദ്പൂർ, മോറെ, സിൽച്ചാർ തുടങ്ങിയ സ്ഥലങ്ങളിലേക്ക് പ്രത്യേകം ഹെലികോപ്റ്റർ സർവീസുകൾ അനുവദിക്കണമെന്നും അവർ ആവശ്യപ്പെട്ടു.
കുക്കി, നാഗാ വിഭാഗങ്ങൾ താമസിക്കുന്ന അതിർത്തി പ്രദേശങ്ങളിലും ബഫർ സോണുകളിലും കേന്ദ്ര സുരക്ഷാ സേനയെ കൂടുതൽ വിന്യസിക്കുക. സുരക്ഷാ പ്രശ്നങ്ങൾ കണക്കിലെടുത്ത് കുക്കി വിദ്യാർത്ഥികൾക്കായി ചുരാചന്ദ്പൂർ, കാങ്പോക്പി തുടങ്ങിയ കുക്കി ഭൂരിപക്ഷ ജില്ലകളിൽത്തന്നെ പരീക്ഷാ കേന്ദ്രങ്ങൾ അനുവദിക്കുക. കുക്കി മേഖലകളിലേക്ക് അവശ്യസാധനങ്ങളുടെയും മരുന്നുകളുടെയും തടസ്സമില്ലാത്ത വിതരണം കേന്ദ്ര സർക്കാർ നേരിട്ട് ഉറപ്പാക്കുക എന്നിവയും ഇവരുടെ ആവശ്യങ്ങളാണ്.
Story Summary
The Kuki-Zo Council in Manipur has submitted an 8-point memorandum to PM Narendra Modi demanding a separate administrative territory with a legislative assembly. Citing existential threats and severe travel restrictions due to ongoing ethnic clashes, they have also requested dedicated helicopter services and enhanced central forces deployment.
