ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ വ്യാജ രേഖകൾ ഉപയോഗിച്ച് വോട്ട് ചെയ്ത 25 വിദേശ പൗരന്മാരെ പോലീസ് പിടികൂടി. വിദേശ പാസ്പോർട്ടുള്ള ഇവരുടെ വിരലിലെ വോട്ട് ചെയ്ത അടയാളമാണ് കുടുക്കായതെന്ന് പോലീസ് വൃത്തങ്ങൾ സ്ഥിരീകരിച്ചു.(Foreign Nationals Arrested For Illegal Voting In Tamil Nadu Assembly Election 2026)
തിരഞ്ഞെടുപ്പിന് ശേഷം വിദേശത്തേക്ക് മടങ്ങാൻ വിമാനത്താവളങ്ങളിൽ എത്തിയപ്പോഴാണ് ബ്യൂറോ ഓഫ് ഇമിഗ്രേഷൻ ഉദ്യോഗസ്ഥർ ഇവരെ തടഞ്ഞുവെച്ചത്. പിടിയിലായവരിൽ ഭൂരിഭാഗവും ശ്രീലങ്കൻ പൗരന്മാരാണ്. ബ്രിട്ടീഷ്, കനേഡിയൻ പൗരത്വമുള്ള ഇന്ത്യൻ വംശജരും കസ്റ്റഡിയിലായവരിലുണ്ട്. ഇവർക്കെതിരെ ഭാരതീയ ന്യായ സംഹിത (BNS 2023), ജനപ്രാതിനിധ്യ നിയമം (1950) എന്നിവ പ്രകാരം കേസെടുത്തു.
ചെന്നൈ, മധുര വിമാനത്താവളങ്ങൾ കേന്ദ്രീകരിച്ച് നടത്തിയ പരിശോധനയിലാണ് വോട്ട് രേഖപ്പെടുത്തിയ വിദേശികൾ പിടിയിലായത്. ബ്രിട്ടീഷ് പാസ്പോർട്ടുള്ള ഒരാൾ പട്ടുക്കോട്ടൈ മണ്ഡലത്തിൽ വോട്ട് ചെയ്തതായി കണ്ടെത്തി. വോട്ട് ചെയ്ത ശേഷം വിരലിലെ മഷി മായുന്നതിനായി ചിലർ യാത്ര നീട്ടിവെച്ചതായും അന്വേഷണസംഘം സംശയിക്കുന്നു. തമിഴ്നാടിന് പുറമെ പുതുച്ചേരിയിലും രണ്ട് വിദേശികൾ വോട്ട് ചെയ്തതായി തിരിച്ചറിഞ്ഞിട്ടുണ്ട്. ഇന്ത്യൻ പൗരത്വം ഉപേക്ഷിച്ചവർക്ക് വോട്ടവകാശമില്ലെന്നിരിക്കെ, വ്യാജ മേൽവിലാസങ്ങൾ ഉപയോഗിച്ചാണ് ഇവർ തിരിച്ചറിയൽ രേഖകൾ സംഘടിപ്പിച്ചത്. സംഭവത്തെക്കുറിച്ച് സമഗ്രമായ റിപ്പോർട്ട് തിരഞ്ഞെടുപ്പ് കമ്മീഷന് സമർപ്പിച്ചു. കൂടുതൽ വിദേശികൾ ഇത്തരത്തിൽ വോട്ട് ചെയ്തിട്ടുണ്ടോ എന്നറിയാൻ തിരഞ്ഞെടുപ്പിന് മുൻപ് ഇന്ത്യയിലെത്തിയ വിദേശികളുടെ വിവരങ്ങൾ പോലീസ് വിശകലനം ചെയ്തുവരികയാണ്.
Story Summary
Around 25 foreign nationals, including Sri Lankan, British, and Canadian citizens, were detained for illegally voting in the Tamil Nadu Assembly elections using fraudulent documents. Authorities caught the suspects at airports after noticing indelible ink on their fingers, and a detailed report has been submitted to the Election Commission.
