ന്യൂഡൽഹി: ദേശീയ മെഡിക്കൽ പ്രവേശന പരീക്ഷയായ നീറ്റ് വീണ്ടും വലിയ വിവാദങ്ങളിലേക്ക്. വ്യാപകമായ ക്രമക്കേടുകൾ കണ്ടെത്തിയതിനെത്തുടർന്ന് പരീക്ഷ റദ്ദാക്കാൻ നാഷണൽ ടെസ്റ്റിംഗ് ഏജൻസി (NTA) നിർബന്ധിതരായി. 22 ലക്ഷത്തോളം വിദ്യാർത്ഥികളുടെ ഭാവിയെ ബാധിക്കുന്ന ഈ തട്ടിപ്പിന് പിന്നിൽ വർഷങ്ങളായി പ്രവർത്തിക്കുന്ന ഒരു മാഫിയ സംഘമുണ്ടെന്ന് രാജസ്ഥാൻ പോലീസ് കണ്ടെത്തി.(NEET UG 2026 Exam Cancelled Amidst Major Paper Leak Scam)
രാജസ്ഥാൻ പോലീസിന്റെ സ്പെഷ്യൽ ഓപ്പറേഷൻസ് ഗ്രൂപ്പ് നടത്തിയ അന്വേഷണത്തിൽ ഞെട്ടിക്കുന്ന വിവരങ്ങളാണ് പുറത്തുവന്നത്. പരീക്ഷയ്ക്ക് മുൻപ് വാട്സ്ആപ്പിലൂടെ പ്രചരിച്ച 410 ചോദ്യങ്ങളുള്ള പിഡിഎഫ് ഫയലിലായിരുന്നു തട്ടിപ്പിന്റെ തുടക്കം. യഥാർത്ഥ പരീക്ഷയിലെ 200 ചോദ്യങ്ങളിൽ 120 എണ്ണവും ഈ പിഡിഎഫിൽ ഉൾപ്പെട്ടിരുന്നു.
മഹാരാഷ്ട്രയിലെ നാസിക്കിൽ നിന്നും പിടിയിലായ ശ്യാം ഖൈർനാർ എന്ന ബിഎഎംഎസ് ബിരുദധാരിയാണ് തട്ടിപ്പിലെ പ്രധാന കണ്ണി. 10 ലക്ഷം രൂപയ്ക്ക് ചോർത്തുന്ന ചോദ്യപേപ്പർ ഇയാൾ 15 ലക്ഷം രൂപ നിരക്കിൽ വിവിധ വിദ്യാർത്ഥികൾക്ക് മറിച്ചുവിറ്റു. ഇത്തരത്തിൽ ഒന്നരക്കോടിയോളം രൂപയാണ് ഇയാൾ ഒറ്റയടിക്ക് ലക്ഷ്യമിട്ടത്. വേഷത്തിലും ഹെയർ സ്റ്റൈലിലും മാറ്റം വരുത്തി നാസിക്കിലെ ഒരു മെഡിക്കൽ അഡ്മിഷൻ കൗൺസിലിംഗ് സെന്റർ കേന്ദ്രീകരിച്ചായിരുന്നു ഇയാളുടെ പ്രവർത്തനം.
രാജസ്ഥാൻ, മഹാരാഷ്ട്ര, ഹരിയാന, ആന്ധ്രാപ്രദേശ്, കർണാടക എന്നീ സംസ്ഥാനങ്ങളിലേക്ക് പടർന്നുപന്തലിച്ച ഒരു ശൃംഖലയാണ് ചോദ്യപേപ്പർ മാഫിയയുടേത്. മെഡിക്കൽ അഡ്മിഷൻ കൗൺസിലിംഗ് സെന്ററുകൾ മറയാക്കി വിദ്യാർത്ഥികളെ ഇവർ വലയിലാക്കുന്നു. 2024-ൽ സമാനമായ രീതിയിൽ ബിഹാർ പോലീസ് ചോർച്ച സ്ഥിരീകരിച്ചിട്ടും പരീക്ഷ റദ്ദാക്കാൻ എൻടിഎ തയ്യാറായിരുന്നില്ല. അത് ഒറ്റപ്പെട്ട സംഭവങ്ങളാണെന്ന് പറഞ്ഞ് ഒഴിഞ്ഞുമാറിയ അധികൃതർക്ക് ഇത്തവണ ശക്തമായ തെളിവുകൾ ലഭിച്ചതോടെ മുട്ടുമടക്കേണ്ടി വന്നു. ഭാരതീയ ന്യായ സംഹിത (BNS), പൊതുപരീക്ഷാ തടയൽ നിയമം (2024) എന്നിവ പ്രകാരം സിബിഐ ഇപ്പോൾ കേസ് അന്വേഷണം ഏറ്റെടുത്തിട്ടുണ്ട്. എങ്കിലും, ലക്ഷക്കണക്കിന് വിദ്യാർത്ഥികളുടെ സ്വപ്നങ്ങൾ ചോദ്യപേപ്പർ മാഫിയകൾക്ക് മുന്നിൽ തകരുന്ന അവസ്ഥയ്ക്ക് മാറ്റം വരണമെന്ന ആവശ്യം ശക്തമാണ്.
Story Summary
The NEET UG 2026 exam has been cancelled by the NTA following evidence of a massive question paper leak orchestrated by an interstate mafia. The racket, which utilized WhatsApp to sell leaked questions as ‘guess papers,’ spans multiple states, and the CBI has now taken over the investigation under strict new anti-exam fraud laws.
