തിരുവനന്തപുരം: കേരളത്തിൽ പുതിയ മുഖ്യമന്ത്രിയെ നിശ്ചയിക്കുന്നതുമായി ബന്ധപ്പെട്ട ചർച്ചകളിൽ മുസ്ലിം ലീഗ് സ്വീകരിച്ച നിലപാടിനെതിരെ രൂക്ഷവിമർശനവുമായി കോൺഗ്രസ് നേതാവ് മാത്യു കുഴൽനാടൻ (Mathew Kuzhalnadan on Muslim League). മുസ്ലിം ലീഗിന്റെ ആഭ്യന്തര കാര്യങ്ങളിൽ കോൺഗ്രസ് ഇടപെടാറില്ലെന്നും, അതേ മര്യാദ കോൺഗ്രസിന്റെ കാര്യത്തിൽ തിരിച്ചുണ്ടാകണമെന്നും അദ്ദേഹം മാധ്യമങ്ങളോട് പറഞ്ഞു. വി.ഡി. സതീശന് ലീഗ് നേതാക്കൾ പരസ്യ പിന്തുണ പ്രഖ്യാപിച്ച സാഹചര്യത്തിലാണ് കുഴൽനാടന്റെ ഈ പ്രതികരണം.
രാഷ്ട്രീയമായി മുസ്ലിം ലീഗ് എപ്പോഴൊക്കെ ആക്രമിക്കപ്പെട്ടിട്ടുണ്ടോ അപ്പോഴൊക്കെ കോൺഗ്രസ് ഒപ്പം നിന്നിട്ടുണ്ട്. മുന്നണി എന്ന നിലയിൽ പരസ്പര ധാരണയോടെയാണ് മുന്നോട്ട് പോകേണ്ടത്. കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലി അഭിപ്രായ ഭിന്നതകളില്ലെന്നും പാർട്ടി തീരുമാനിക്കുന്ന വ്യക്തി മുഖ്യമന്ത്രിയാകുമെന്നും അദ്ദേഹം വ്യക്തമാക്കി. യുഡിഎഫിന്റെ ഉജ്ജ്വല വിജയം ആരും വിസ്മരിക്കരുത്. ഏറ്റവും നീതിയുക്തവും ജനാധിപത്യപരവുമായ തീരുമാനം ഹൈക്കമാൻഡിന്റെ ഭാഗത്തുനിന്നുണ്ടാകുമെന്നും മാത്യു കുഴൽനാടൻ കൂട്ടിച്ചേർത്തു.
അതേസമയം, മുഖ്യമന്ത്രിയെ തീരുമാനിക്കാനുള്ള നിർണ്ണായകമായ കോൺഗ്രസ് നിയമസഭാ കക്ഷിയോഗം കെപിസിസി ആസ്ഥാനത്ത് ആരംഭിച്ചു. എഐസിസി നിരീക്ഷകരായ അജയ് മാക്കനും മുകുൽ വാസ്നിക്കും 63 എംഎൽഎമാരെയും നേരിൽ കണ്ട് അഭിപ്രായം തേടും. മുതിർന്ന നേതാക്കളുമായുള്ള ചർച്ചകൾ രാവിലെ തന്നെ പൂർത്തിയായിരുന്നു. വൈകുന്നേരം ഘടകകക്ഷി നേതാക്കളുമായും നിരീക്ഷകർ കൂടിക്കാഴ്ച നടത്തും. ഹൈക്കമാൻഡിനെ തീരുമാനമെടുക്കാൻ ചുമതലപ്പെടുത്തിക്കൊണ്ടുള്ള പ്രമേയം യോഗത്തിൽ പാസാക്കും. ഞായറാഴ്ചയോടെ പുതിയ മുഖ്യമന്ത്രിയുടെ കാര്യത്തിൽ ഔദ്യോഗിക പ്രഖ്യാപനമുണ്ടാകുമെന്നാണ് സൂചന.
Summary: Congress leader Mathew Kuzhalnadan criticized the Muslim League for interfering in the internal matters of the Congress regarding the Chief Minister selection. He stated that Congress has always respected the League’s internal affairs and expects the same in return. Kuzhalnadan emphasized that there is no internal rift in Congress and the High Command will make a democratic decision soon.
