ഗുവാഹത്തി: അസം നിയമസഭാ തിരഞ്ഞെടുപ്പിന്റെ വോട്ടെണ്ണൽ പുരോഗമിക്കുമ്പോൾ ഭരണകക്ഷിയായ ബിജെപി നയിക്കുന്ന എൻഡിഎ സഖ്യം കേവല ഭൂരിപക്ഷം മറികടന്നു (Assam Election Results). ആകെയുള്ള 126 സീറ്റുകളിൽ 68 സീറ്റുകളിലും ബിജെപി സഖ്യം ലീഡ് ചെയ്യുന്നതോടെ സംസ്ഥാനത്ത് ഭരണത്തുടർച്ച ഉറപ്പായിരിക്കുകയാണ്. കേവല ഭൂരിപക്ഷത്തിന് 64 സീറ്റുകളാണ് വേണ്ടത്.
68 സീറ്റുകളിൽ മുന്നേറ്റം തുടരുന്നു. മുഖ്യമന്ത്രി ഹിമന്ത ബിശ്വ ശർമ്മ ജലൂക്ബാരി മണ്ഡലത്തിൽ വ്യക്തമായ ലീഡ് നിലനിർത്തുന്നുണ്ട്. ബിജെപി നേതാവ് പീജുഷ് ഹസാരിക ജാഗി റോഡിലും മുന്നിലാണ്. കോൺഗ്രസ് നയിക്കുന്ന മഹാസഖ്യം നിലവിൽ 19 സീറ്റുകളിൽ മാത്രമാണ് മുന്നിട്ടുനിൽക്കുന്നത്. ജോർഹട്ടിൽ ഗൗരവ് ഗൊഗോയിയും, ദിസ്പൂരിൽ പ്രദ്യുത് ബോർദോലോയിയും ബിഹ്പുരിയയിൽ ഭൂപൻ ബോറയും ലീഡ് ചെയ്യുന്നുണ്ട്. ശിവസാഗറിൽ റൈജോർ ദൾ നേതാവ് അഖിൽ ഗൊഗോയിയും, ഖോവാങ്ങിൽ ലുറിൻജ്യോതി
ഗൊഗോയിയും മുന്നേറ്റം തുടരുന്നത് ശ്രദ്ധേയമാണ്.
തിരഞ്ഞെടുപ്പ് കമ്മീഷന്റെ ഔദ്യോഗിക കണക്കുകൾ പുറത്തുവരുന്നതോടെ ലീഡ് നിലകളിൽ കൂടുതൽ വ്യക്തത വരും. നിലവിലെ സൂചനകൾ പ്രകാരം അസമിൽ ഹിമന്ത ബിശ്വ ശർമ്മയുടെ നേതൃത്വത്തിലുള്ള സർക്കാർ വീണ്ടും അധികാരത്തിലേറുമെന്ന് ഉറപ്പായിട്ടുണ്ട്.
Summary: The BJP-led NDA has crossed the majority mark in the 126-member Assam Assembly, leading in 68 seats. While Chief Minister Himanta Biswa Sarma maintains a lead in Jalukbari, the Congress-led alliance trails with 19 seats. Notable leaders like Gaurav Gogoi and Akhil Gogoi are also leading in their respective constituencies as counting continues.
