കോട്ടയം/ഇടുക്കി: നിയമസഭാ തെരഞ്ഞെടുപ്പ് ഫലം പുറത്തുവരാൻ മണിക്കൂറുകൾ മാത്രം ബാക്കിനിൽക്കെ വോട്ടർമാരെ നേരിൽ കാണാൻ സജ്ജമായി യുഡിഎഫ് സ്ഥാനാർത്ഥി ( Kerala Election Results 2026). ഇടുക്കി മണ്ഡലത്തിലെ യുഡിഎഫ് സ്ഥാനാർത്ഥി റോയി കെ. പൗലോസിന്റെ പ്രചാരണ വാഹനമാണ് കോട്ടയം ഈരാറ്റുപേട്ടയിൽ തയ്യാറായിരിക്കുന്നത്.
വോട്ടർമാർക്ക് നന്ദി അറിയിക്കുന്നതിനൊപ്പം ഇനിയുള്ള നാളുകളിൽ കൂടെയുണ്ടാകുമെന്ന ഉറപ്പും നൽകുന്ന ഫ്ലക്സുകൾ പതിപ്പിച്ചാണ് വാഹനം ഒരുക്കിയിരിക്കുന്നത്. ഫലം വന്നാലുടൻ മണ്ഡലത്തിലുടനീളം പര്യടനം നടത്താനാണ് തീരുമാനം. യുഡിഎഫ് നേതാക്കളുടെ വിജയത്തിനായി പുതുപ്പള്ളി പള്ളിയിൽ പ്രത്യേക കുർബാന അർപ്പിച്ച് യൂത്ത് കോൺഗ്രസ് നേതാവ്. പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല, പി.വി. അൻവർ തുടങ്ങി പ്രധാനികളായ 13 നേതാക്കളുടെ വിജയത്തിനായാണ് പ്രാർത്ഥന നടത്തിയത്.
യൂത്ത് കോൺഗ്രസ് പത്തനംതിട്ട ജില്ലാ ജനറൽ സെക്രട്ടറി റിജോ വള്ളംകുളമാണ് നേതാക്കൾക്കായി പുതുപ്പള്ളിയിൽ ഈ കുർബാന നേർച്ചയായി അർപ്പിച്ചത്.
തെരഞ്ഞെടുപ്പ് ഫലം അനുകൂലമാകുമെന്ന ഉറച്ച വിശ്വാസത്തിലാണ് കോൺഗ്രസ് പ്രവർത്തകർ. സംസ്ഥാനത്തുടനീളം വലിയ മുന്നേറ്റമുണ്ടാകുമെന്ന പ്രതീക്ഷയിലാണ് നേതാക്കൾക്കായി ഇത്തരം വഴിപാടുകളും ഒരുക്കങ്ങളും നടത്തുന്നത്. വോട്ടെണ്ണൽ ആരംഭിക്കുന്നതോടെ ഈ പ്രതീക്ഷകൾ യാഥാർത്ഥ്യമാകുമോ എന്ന് വ്യക്തമാകും.
Story Summary: UDF is expressing strong confidence as the assembly election counting approaches. In Idukki, a vehicle has been prepared for candidate Roy K. Paulose to thank voters immediately after the results. Meanwhile, Youth Congress leader Rijo Vallamkulam offered a special mass at Puthuppally Church for the victory of 13 key leaders, including V.D. Satheesan, Ramesh Chennithala, and P.V. Anwar.
