തിരുവനന്തപുരം: സംസ്ഥാനത്ത് വേനൽച്ചൂട് അതികഠിനമായതോടെ വൈദ്യുതി ഉപയോഗം ചരിത്രത്തിലാദ്യമായി സർവ്വകാല റെക്കോർഡിലെത്തി ( Kerala Electricity Consumption Record). ഏപ്രിൽ 18-ന് രേഖപ്പെടുത്തിയ 117.16 ദശലക്ഷം യൂണിറ്റാണ് ഇതുവരെയുള്ളതിൽ വെച്ച് ഏറ്റവും ഉയർന്ന പ്രതിദിന ഉപയോഗം. വൈകുന്നേരം 6 മുതൽ രാത്രി 10 വരെയുള്ള പീക്ക് സമയത്തെ ആവശ്യകതയും ആദ്യമായി 6000 മെഗാവാട്ട് കടന്ന് 6033 മെഗാവാട്ടിലെത്തി.
വൈദ്യുതി ആവശ്യകത കുതിച്ചുയർന്നതോടെ പ്രസരണ-വിതരണ ശൃംഖലകൾ കടുത്ത സമ്മർദ്ദത്തിലാണ്. പലയിടങ്ങളിലും വോൾട്ടേജ് ക്ഷാമം അനുഭവപ്പെടുന്ന സാഹചര്യത്തിൽ ഉപഭോക്താക്കൾ ഉപയോഗം ക്രമീകരിക്കണമെന്ന് കെഎസ്ഇബി അഭ്യർത്ഥിച്ചു.
കെഎസ്ഇബി നൽകുന്ന നിർദ്ദേശങ്ങൾ:
- പീക്ക് സമയത്തെ നിയന്ത്രണം: വൈകുന്നേരം 6 മണി മുതൽ രാത്രി 11 മണി വരെ വൈദ്യുതി ഉപയോഗം പരമാവധി കുറയ്ക്കുക.
- അമിത ഉപയോഗം ഒഴിവാക്കുക: പമ്പ് സെറ്റ്, ഇൻഡക്ഷൻ സ്റ്റൗ, വാട്ടർ ഹീറ്റർ, ഇസ്തിരിപ്പെട്ടി, വാഷിംഗ് മെഷീൻ തുടങ്ങിയവ പീക്ക് സമയത്ത് പ്രവർത്തിപ്പിക്കരുത്.
- ഇവി ചാർജിംഗ്: വൈദ്യുത വാഹനങ്ങളുടെ ചാർജിംഗ് രാത്രി 11 മണിക്ക് ശേഷമോ പകൽ സമയത്തോ ആയി ക്രമീകരിക്കുക.
- എസി ക്രമീകരണം: എയർ കണ്ടീഷണറുകളുടെ താപനില 24°C – 26°C ഡിഗ്രി സെൽഷ്യസിൽ ക്രമീകരിക്കുന്നത് വൈദ്യുതി ലാഭിക്കാൻ സഹായിക്കും.
ആഭ്യന്തര ഉത്പാദനം വർദ്ധിപ്പിച്ചും പുറത്തുനിന്ന് അധിക വൈദ്യുതി വാങ്ങിയും തടസ്സമില്ലാത്ത വിതരണം ഉറപ്പാക്കാൻ ശ്രമിക്കുകയാണെന്നും, ജനങ്ങളുടെ സഹകരണം ഉണ്ടെങ്കിൽ മാത്രമേ വൻ പ്രതിസന്ധി ഒഴിവാക്കാൻ കഴിയൂ എന്നും കെഎസ്ഇബി അറിയിച്ചു.
Summary: Electricity consumption in Kerala has hit an all-time high of 117.16 million units per day due to the extreme summer heat. Peak demand surpassed 6000 MW for the first time in history. KSEB has urged consumers to limit the use of high-power appliances like induction stoves, water heaters, and EV chargers between 6 PM and 11 PM to prevent grid failure and manage voltage fluctuations.
