ബീഹാറിൽ നിന്ന് അമേരിക്കയിലേക്ക് കുടിയേറിയ അർഹം ഇഷ്തിയക് എന്ന യുവാവ് പങ്കുവെച്ച വീഡിയോ സോഷ്യൽ മീഡിയയിൽ വൈറലാകുന്നു (Life in Bihar vs USA). അമേരിക്കയിലെ ശരാശരി ജീവിതവും താൻ വളർന്നുവന്ന ബീഹാറിലെ ജീവിതവും തമ്മിലുള്ള വലിയ അന്തരമാണ് ഈ വീഡിയോയിൽ അദ്ദേഹം വ്യക്തമാക്കുന്നത്. നല്ല ജോലി, പുതിയ ഐഫോൺ, യാത്രകൾ, വസ്ത്രധാരണം തുടങ്ങിയവ ഇന്ത്യയിൽ പലപ്പോഴും ആഡംബരമായി കാണപ്പെടുമ്പോൾ, അമേരിക്കയിൽ അതൊക്കെ തികച്ചും സാധാരണമായ ജീവിതശൈലിയുടെ ഭാഗമാണെന്ന് അർഹം ചൂണ്ടിക്കാട്ടുന്നു.
തന്റെ ജീവിതം പൂർണ്ണമായി സെറ്റായി എന്ന് നാട്ടിലുള്ളവർ കരുതുന്നുണ്ടെങ്കിലും, താൻ അനുഭവിക്കുന്നത് അവിടെയുള്ള ശരാശരി ജനങ്ങളുടെ ജീവിതം മാത്രമാണെന്നും അതിനപ്പുറത്തേക്ക് ഉയരാൻ ഇനിയും സാധിക്കുമെന്നും അദ്ദേഹം പറയുന്നു. ഈ വീഡിയോ സമൂഹമാധ്യമങ്ങളിൽ വലിയ ചർച്ചകൾക്കാണ് തിരികൊളുത്തിയത്. ജീവിത നിലവാരത്തിലും സാമൂഹിക വികസനത്തിലും കൂടുതൽ ശ്രദ്ധ കേന്ദ്രീകരിക്കേണ്ടതിനെക്കുറിച്ച് പലരും അഭിപ്രായങ്ങൾ രേഖപ്പെടുത്തി. അതേസമയം, അമേരിക്കൻ സ്വപ്നത്തിന് പിന്നാലെ പോയി വൻ കടക്കെണിയിൽ പെട്ട മറ്റൊരു ഇന്ത്യൻ ദമ്പതികളുടെ വാർത്തയും ഈ വിഷയത്തിൽ ശ്രദ്ധനേടുന്നുണ്ട്.
View this post on Instagram
