Follow on Google News
മുംബൈ: ജിം ട്രെയിനറിൽ നിന്ന് ആത്മീയ ഗുരുവായ ചമഞ്ഞ് ജനങ്ങളെ കബളിപ്പിച്ചു വന്ന റിഥം പഞ്ചാൽ എന്ന മുപ്പത്തേഴുകാരനെ മുംബൈ പോലീസ് അറസ്റ്റ് ചെയ്തു (Mumbai Fake Godman Arrested). ‘മോണ്ടി ബാബ’ എന്ന പേരിൽ അറിയപ്പെട്ടിരുന്ന ഇയാൾ മല്ഡിലെ വിജനമായ ഒരു സ്ഥലത്ത് ‘ദർബാർ’ നടത്തിയാണ് വിശ്വാസികളെ വലയിലാക്കിയിരുന്നത്. അറുപതോളം പേരുടെ പരാതിയെത്തുടർന്ന് ദിന്ദോഷി പോലീസാണ് ഇയാളെ പിടികൂടിയത്.
ബാധ ഒഴിപ്പിക്കാനെന്ന പേരിൽ വായിൽ സിഗരറ്റ് കത്തിച്ചുപിടിച്ച് അർദ്ധരാത്രിയിൽ അഘോരി പൂജകൾ നടത്തുകയായിരുന്നു ഇയാളുടെ രീതി. ചൊവ്വ, ശനി ദിവസങ്ങളിൽ രാത്രി 8 മുതൽ പുലർച്ചെ 7 വരെയായിരുന്നു ഇയാളുടെ ദർബാർ. പൂജകൾക്കായി പണത്തിന് പുറമെ വിദേശമദ്യം, സിഗരറ്റ്, ജീവനുള്ള കോഴി, ആടിന്റെ കരൾ എന്നിവയാണ് ഇയാൾ ഭക്തരോട് ആവശ്യപ്പെട്ടിരുന്നത്. കുട്ടികളില്ലാത്ത ദമ്പതികളെയും രോഗബാധിതരെയും ലക്ഷ്യം വച്ചായിരുന്നു തട്ടിപ്പ്. ദേവി തന്റെ ശരീരത്തിൽ ആവേശിക്കുന്നുണ്ടെന്ന് വിശ്വസിപ്പിച്ചാണ് ഇയാൾ സ്ത്രീകളെ ചൂഷണം ചെയ്തിരുന്നത്.
പണം നൽകാൻ വിസമ്മതിക്കുന്നവരുടെ വീടുകളിലേക്ക് ഗുണ്ടകളെ അയച്ച് ഭീഷണിപ്പെടുത്തുന്നതും ഇയാളുടെ പതിവായിരുന്നു. ഇതോടെയാണ് തട്ടിപ്പിനിരയായവർ പോലീസിനെ സമീപിച്ചത്. മുൻ ബിജെപി കോർപ്പറേറ്റർ അഡ്വ. സിദ്ധാർത്ഥ് ശർമ്മയുടെ സഹായത്തോടെയാണ് ഇരകൾ പരാതി നൽകിയത്. ഇയാൾക്ക് ആത്മീയമായ യാതൊരു പശ്ചാത്തലവുമില്ലെന്നും നാല് വർഷം മുൻപ് വരെ ജിം ട്രെയിനറായിരുന്നുവെന്നും പോലീസ് അന്വേഷണത്തിൽ വ്യക്തമായി. മഹാരാഷ്ട്രയിലെ അന്ധവിശ്വാസ വിരുദ്ധ നിയമപ്രകാരമാണ് ഇയാൾക്കെതിരെ കേസെടുത്തിരിക്കുന്നത്.
Summary: A 37-year-old former gym trainer, Rhythm Panchal alias ‘Monty Baba’, was arrested in Mumbai for posing as a spiritual healer and defrauding over 60 people. Operating from a vacant plot in Malad, he conducted midnight rituals involving expensive liquor, cigarettes, and animal sacrifices. Panchal claimed to be possessed by a goddess and targeted vulnerable women under the guise of helping them conceive. Following complaints of financial extortion and threats, Dindoshi Police arrested him under the Anti-Superstition Act.
