ഡെറാഡൂൺ: ഉത്തരാഖണ്ഡ് ഗോൾഡ് കപ്പ് ക്രിക്കറ്റ് ടൂർണമെന്റിൽ (Uttarakhand Gold Cup) ഗോവയ്ക്കെതിരെ റൺമല കേറി കേരളത്തിന് ഉജ്ജ്വല വിജയം (Uttarakhand Gold Cup cricket match Kerala vs Goa). വാശിയേറിയ പോരാട്ടത്തിൽ വി.ജെ.ഡി (VJD Method) നിയമപ്രകാരം 19 റൺസിനായിരുന്നു കേരളത്തിന്റെ തകർപ്പൻ ജയം. ഗോവ ഉയർത്തിയ 376 റൺസിന്റെ കൂറ്റൻ വിജയലക്ഷ്യം പിന്തുടർന്ന കേരളം, 46 ഓവറിൽ 5 വിക്കറ്റ് നഷ്ടത്തിൽ 350 റൺസെടുത്തു നിൽക്കെ കളി തടസ്സപ്പെടുത്തി മഴയെത്തുകയായിരുന്നു. തുടർന്ന് വി.ജെ.ഡി നിയമം പ്രകാരം കേരളത്തെ വിജയികളായി പ്രഖ്യാപിച്ചു. കളിയിലെ താരം (Player of the Match) പദവി സ്വന്തമാക്കിയത് അത്യുജ്ജ്വല സെഞ്ച്വറിയോടെ ഒരറ്റത്ത് ഉറച്ചുനിന്ന് ടീമിന് വിജയം ഒരുക്കിയ കേരളത്തിന്റെ സൂപ്പർ ബാറ്റർ മുഹമ്മദ് അസറുദ്ദീനാണ്.
ടോസ് നേടി ആദ്യം ബാറ്റിങ്ങിന് ഇറങ്ങിയ ഗോവ നിശ്ചിത 50 ഓവറിൽ 7 വിക്കറ്റ് നഷ്ടത്തിൽ 375 റൺസെന്ന കൂറ്റൻ സ്കോറാണ് പടുത്തുയർത്തിയത്. ഓപ്പണർ വീർ യാദവ് (15) തുടക്കത്തിൽ തന്നെ പുറത്തായെങ്കിലും, രണ്ടാം വിക്കറ്റിൽ ഒന്നിച്ച മന്ഥൻ ഖുട്കറും അഭിനവ് തേജ് റാണയും ചേർന്ന് 96 റൺസിന്റെ മികച്ച കൂട്ടുകെട്ടുണ്ടാക്കി. മന്ഥൻ 44 റൺസെടുത്ത് മടങ്ങിയപ്പോൾ, ഒരറ്റത്ത് തകർത്തടിച്ച അഭിനവ് തേജ് റാണ സെഞ്ച്വറി സ്വന്തമാക്കി. 115 പന്തുകളിൽ നിന്നും 134 റൺസാണ് അഭിനവ് അടിച്ചുകൂട്ടിയത്. ഇന്നിങ്സിന്റെ അവസാന ഓവറുകളിൽ ക്യാപ്റ്റൻ ദീപ് രാജ് ഗാവൊങ്കറും (28 പന്തിൽ 50), മോഹിത് റെഡ്കറും (30 പന്തിൽ 59) നടത്തിയ വെടിക്കെട്ട് ബാറ്റിങ്ങാണ് ഗോവൻ സ്കോർ 375-ൽ എത്തിച്ചത്. കേരളത്തിനായി ബോളിങ്ങിൽ ഫാനൂസ് ഫായിസും ഷോൺ റോജറും രണ്ട് വിക്കറ്റ് വീതം വീഴ്ത്തി.
മറുപടി ബാറ്റിങ്ങിന് ഇറങ്ങിയ കേരളത്തിന്റെ തുടക്കം പാളിച്ചകളോടെയായിരുന്നു. സൂപ്പർ ഓപ്പണർ രോഹൻ കുന്നുമ്മലിനെ തുടക്കത്തിൽ തന്നെ നഷ്ടമായെങ്കിലും, ഓപ്പണർ മുഹമ്മദ് അസറുദ്ദീനും കൃഷ്ണപ്രസാദും ചേർന്ന് രണ്ടാം വിക്കറ്റിൽ 83 റൺസ് കൂട്ടിച്ചേർത്ത് കേരളത്തെ മത്സരത്തിലേക്ക് തിരികെ കൊണ്ടുവന്നു. കൃഷ്ണപ്രസാദ് 66 റൺസെടുത്ത് പുറത്തായി. പിന്നീട് വന്ന മിഡിൽ ഓർഡർ ബാറ്റർമാർക്കൊന്നും വലിയ ഇന്നിങ്സുകൾ കെട്ടിപ്പടുക്കാൻ കഴിഞ്ഞില്ലെങ്കിലും, ഒരു വശത്ത് ക്രീസുറപ്പിച്ച അസറുദ്ദീൻ ഗോവൻ ബോളർമാരെ തലങ്ങും വിലങ്ങും പ്രഹരിച്ചു. 117 പന്തുകളിൽ 7 ഫോറും 10 സിക്സറുകളുമടക്കം 158 റൺസുമായി അസറുദ്ദീൻ പുറത്താകാതെ നിന്നു.
മറ്റ് ബാറ്റർമാരിൽ അഹമ്മദ് ഇമ്രാൻ (23), ഷോൺ റോജർ (31), സൽമാൻ നിസാർ (22), അഭിഷേക് (27) എന്നിവർ ചെറിയ സംഭാവനകൾ നൽകി അസറുദ്ദീന് പിന്തുണയേകി. ഗോവയ്ക്ക് വേണ്ടി കൗശികും ദർശൻ മിസാലും രണ്ട് വിക്കറ്റ് വീതം വീഴ്ത്തി. കളി 46-ാം ഓവറിൽ നിൽക്കെ കനത്ത മഴ പെയ്തതോടെ മത്സരം ഉപേക്ഷിക്കുകയും, റൺറേറ്റ് പരിശോധിച്ചുള്ള വി.ജെ.ഡി നിയമപ്രകാരം കേരളത്തിന് അർഹിച്ച വിജയം അനുവദിക്കുകയുമായിരുന്നു.
Story Summary:Kerala secured a 19-run victory over Goa via the VJD method in the Uttarakhand Gold Cup cricket tournament. Chasing Goa’s mammoth total of 375, Kerala was at 350/5 in 46 overs when rain stopped play, with Mohammed Azharuddeen smashing an unbeaten 158.
